3
0
ԿԼԵՆՎԻՈՒ (Իլինոյ)․- Տէր եւ տիկին Ժիրայր եւ Շարի Գազարեան, որոնք միշտ ալ նեցուկ կանգնած են Շիքակոյի հայ գաղութին, տեղւոյն կեդրոնի վերանորոգման նուիրեցին հարիւր հազար տոլար։ Ժիրայր (Ճերի) եւ Շարի Գազարեան այս իշխանական նուիրատութիւնը կատարեցին, ի յիշատակ իրենց ծնողքին՝ Մովսէս եւ Ատէլ Գազարեանին, որոնք իրենց կարգին միշտ ալ օժանդակած են գաղութին։
Շրջանի կեդրոնը, որ կը գտնուի տեղւոյն Ամենայն Սրբոց եկեղեցւայ մօտ, աւելի քան յիսուն տարիէ ի վեր կը նկատուի գաղութին բազկերակը, կազմակերպելով հաւաքներ եւ ձեռնարկներ։
«Մենք երախտապարտ ենք Գազարեան ընտանիքին, որ կատարեց այս մեծ նուրատուութիւնը։ Վստահ ենք, որ այլ հայորդիներ պիտի հետեւին Գազարեաններու օրինակին։ Մեր գաղութը կը գործէ շնորհիւ նմանօրինակ տիպար ընտանիքներու կատարած նուիրատութեան», ըսաւ տեղւոյն Հ․Յ․Դ․ «Քրիստափոր» կոմիտէութեան ներկայացուցիչ Յակոբ Սուլաքեան աւելցնելով, թէ հակառակ Պսակաձեւ Ժահրի ստեղծած ներկայ դաժան պայմաններուն, գաղութը կրցած է ամէն գնով կազմակերպել ձեռնարկներ։
