0
0
ԵՐԵՒԱՆ․- Հայ Դատի կեդրոնական գրասենեակը կը տեղեկացնէ, թէ խորհուրդի նախաձեռնութեամբ Օգոստոսի 7-ին գումարուեցաւ Հայ Դատի յանձնախումբերու եւ գրասենեակներու առցանց խորհրդակցութիւն մը, հիմնական օրակարգ ունենալով Արցախի շահերու պաշտպանութիւնը:
Հաշուի ունենալով 44-օրեայ պատերազմէն ետք ստեղծուած նոր իրավիճակը եւ վերջին ամիսներու զարգացումները` կատարուեցան քաղաքական առաջնահերթութիւններու յստակեցումներ ու մարտավարական ճշգրտումներ, որոնք կը միտին լոպիինկի կիրառմամբ յառաջ մղել Արցախի ժողովրդի իրաւունքներն ու օրինական շահերը:
Այս խորհրդակցութեան մասնակցեցան երեսուն երկիրներու մէջ գործող Հայ Դատի յանձնախումբեր։
Որոշուեցաւ յառաջիկայ ամիսներու ընթացքին նոր թափ տալ Արցախի շահերու պաշտպանութեան, ժողովուրդի ինքնորոշման իրաւունքի եւ անկախութեան ճանաչման եւ միջազգային յարաբերութիւններու շեշտակի ընդլայնման: Նպատակադրուած աշխատանք պիտի կատարուի նաեւ Արցախի մարդասիրական ճգնաժամի յաղթահարման, բռնագրաւուած տարածքներու մէջ գտնուող մշակութային ժառանգութեան պաշտպանութեան, ռազմագերիներու եւ քաղաքացիական պատանդներու վերադարձի, անոնց իրաւունքներու պաշտպանութեան, ինչպէս նաեւ ատրպէյճանաթրքական տեղեկատուական սադրանքներու չէզոքացման ուղղութիւններով:
“Ներկայումս, առաւել քան երբեւէ, Արցախի մեր հայրենակիցներն առարկայօրէն պէտք է զգան համայն հայութեան զօրակցութիւնը` ստեղծուած ծանրագոյն իրավիճակի յաղթահարման եւ առաւել քան 30 տարի առաջ սկսուած ազգային- ազատագրական պայքարը յաղթական աւարտին հասցնելու համար”, կ՛եզրակացնէ Հայ Դատի կեդրոնական գրասենեակը։
