Արեւելեան Ա․Մ․Ն.-ի «Արցախ Ֆոնտ» ․- Աւելի Քան 40 հազար Տոլար Հաւաքուեցաւ Նիւ Ճըրզիի Մէջ

0 0
Read Time:4 Minute, 27 Second

Նիւ Ճըրզիի գաղութը 200 ներկաներով տօնեց Մայիս 28, 1918-ի Մայիսեան փառաւոր յաղթանակը, հայոց պետականութիւնը եւ Հայաստանի անկախութիւնը: Ամերիկայի Արեւելեան Շրջանի «Արցախ Ֆոնտ»-ի կազմակերպած այս ձեռնարկը, որ տեղի ունեցաւ Յունիս 4-ին, Ռիճֆիլտի կեդրոնին մէջ, գաղութին ներկայացուց յետ պատերազմի Արցախի մէջ իրագործած իր ծրագիրները եւ մօտ ապագայի կատարուելիք աշխատանքները. գաղութը իր բարոյական նեցուկը  յայտնեց «Դիմադրութիւն» շարժումին,  ըսաւ ԱՅ՛Ո Դիմադրութեան եւ Ո՛Չ Արցախի հայաթափումին. բարոյականի կողքին, նիւթականով նաեւ մասնակից դարձան ներկաները Արցախ Ֆոնտի ծրագիրներուն: Մթնոլորտը յուզիչ էր. բայց միաժամանակ վճռակամ եւ պատրաստ յաղթահարելու բոլոր դժուարութիւնները որպէսզի կարելի ըլլայ պահպանել մեր հայրենիքը եւ զոյգ անկախ հանրապետութիւնները:

Հ․Մ․Ը․Մ․-ի սկաուտական կազմի դրօշակակիրներու մուտքով եւ Հայաստանի ու Արցախի քայլերգներու երգեցողութենէն ետք, օրուայ հանդիսավարը՝ «Արցախ Ֆոնտ»-էն Փօլին Տոսթումեան կատարեց բացման խօսքը:  Ան ըսաւ․-

«Այսօրուայ ձեռնարկը կազմակերպած է Ամերիկայի Արեւելեան Շրջանի Արցախ Ֆոնտը՝ տօնելու Հայաստանի Ա. Հանրապետութեան 104րդ ամեակը եւ միասնաբար զօրակցելու Արցախին: Շնորհակալութիւն ձեր ներկայութեան:

Անդրադառնալով 1918-ի Մայիսեան յաղթանակի նախօրէին, Սիմոն Վրացեան կը գրէ- թուրքը կուգար ամէն կողմէ եւ կը կոտորեր հային. փախուստը հաւասար էր մահուան. յանձնուիլը նաեւ հաւասար էր մահուան. ելք չկար. ելքը՝ կռիւն էր, ելքը՝ դիմադրութիւնն էր. եւ ահա կը կատարուի հրաշքը: Այդ հրաշքը հայոց պետականութեան ստեղծումն էր Ցեղասպանութեան նոր ենթարկուած ժողովուրդին կողմէ, 1.5 միլիոն զոհերով եւ բազմահազար հայրենազուրկ տեղահանուածներով: Ան ուղղակի արդիւնք էր այն ճիշդ որոշումին որ կայացուց հայ քաղաքական վերնախաւը այդ օրերուն՝ ղեկավարութեամբ Հայ Յեղափոխական Դաշնակցութեան, նշանակելով Արամ Մանուկեանը ընդհանուր պատասխանատու դիկտադորի լիազoրութիւններով:

Արամը իր հարուստ փորձառութեամբ եւ հմուտ ղեկավարութեամբ յուսալքուած հայ ժողովուրդին ներշնչեց հաւատք եւ յոյս, համախմբեց ժողովուրդը, միասնականութիւն ստեղծեց եւ հիմը դրուեցաւ մեր պետականութեան, անկախ Հայաստանին: Վերջապէս ունեցանք մեր ազգային դրօշը, Եռագոյնը, քայլերգը եւ պետական կառոյցները: Միասնական ջանքերով եւ քաջ որդոց սուրբ արիւնով՝ «խենթերը» գտան հանր:

1988-1994 Արցախի ժողովուրդը իր ինքնիշխան, ազատ ապրելու իրաւունքը պաշտպանելով, հաւատքով եւ վճռակամութեամբ ոտքի կանգնեցաւ եւ կրկին իր քաջ որդոց սուրբ արիւնով ազատագրեց Արցախը: Շուշին կրկին գրկեց իր հարազատ զաւակները: «Խենթերը» կրկին գտան հնար:

2020-ի Արցախեան պատերազմը նորէն ոտքի հանեց մեր ժողովուրդը միասնական կամքով: Սակայն այս անգամ թշնամին միայն արտաքին չէր, այլ նաեւ ներքին, պառակտելով մեր ազգը: Փաստ է որ մեր ահաւոր կորուստները ուղղակի արդիւնք էին հայրենի իշխանութիւններու անհեռատես, անհաւասարակշիռ, ապազգային եւ դաւադիր քաղաքականութեան: Այսօր անոնք կառչած կը մնան իրենց պաշտօններուն, ամէն օր, ամէն ժամ զիջելով կտոր մը հող մեր հայրենիքէն:

Ձեռնարկի կազմակերպիչ յանձնախումբի անդամները՝ Նայիրի Գաբրիէլեան, Մարինա Եագուպեան, Փօլին Տոսթումեան, Յովիկ Քէօշկէրեան, Մարալ Գաբրիէլեան, Անի Քէշիշեան,  Նայիրի Տիրացուեան, երգիչ Գէորգ Արթինեանի հետ։

 

Մեր ազգային գոյութիւնը այսօր վտանգուած է: Կրկին ելք չկայ. բացի դիմադրութիւն։  Դիմադրութիւն առանց ցնցումներու, առանց արիւնահեղութեան։

Դիմադրութիւն որ Զարթիր Լաօ կարգախօսով այսօր կը քալէ Երեւանի փողոցներուն մէջ, Գիւմրիի, Վանաձորի փողոցներուն մէջ, Ստեփանակերտի մէջ՝ պահանջելով ազգադաւ իշխանութիւններու հրաժարականը, միայն ու միայն փրկելու համար հայրենիքը եւ յետդարձ ընելու կործանարար զիջումներէն:

Մեր հայրենիքի, Հայաստանի եւ Արցախի սահմանները գծուած են նահատակ մատղաշ սերունդի սուրբ արիւնով, որոնք երբեք սակարկութեան առարկայ չեն:

Մենք պարտաւոր ենք ապագայ սերունդներուն փոխանցել ապահով, կայուն եւ հզօր հայրենիք:

Եկէք միանանք հայրենիքի մէջ Դիմադրութեան շարժումի «խենթերուն» ըսելով՝

Ո՛Չ Հայաստանի թրքացումին։

Ո՛Չ Արցախի հայաթափումին։

Անկախ Արցախը երբեք չի կրնար մաս դառնալ Ատրպէյճանի։

Առանց Արցախի չկայ Հայաստան եւ Առանց Հայաստանի չկայ Սփիւռք։

Միանալով եւ զօրակցելով այսօրուայ չակերտեալ «խենթերուն» կը շարունակենք մեր ազգային ազատագրական պայքարը. եթէ պէտք ըլլայ մեր կեանքի գնով:    

Վստահ եղէք սիրելի հայրենակիցներ որ «խենթերը» շուտով կը գտնեն հնար»:

Ապա երիտասարդութեան խօսքը անգլերէնով փոխանցեց Նայիրի Տիրացուեան, որ անդրադարձաւ Սարդարապատի երգի տողերուն ընդմէջէն փոխանցուած պատգամին՝ «երբ չի մնում ելք ու ճար, խենթերն են գտնում հնար»: Ան վերահաստատեց երիտասարդութեան հաստատակամ երթը Հայ Դատին բոլոր կարելի միջոցներով պայքարելու, գիտակից իրեն կտակուած պարտականութեան՝ «սերունդնե՛ր, դուք ձեզ ճանաչէք Սարդարապատից»:

Օրուայ հիւր պատգամաբերն էր Ամերիկայի Արեւելեան Շրջանի «Արցախ Ֆոնտ»-ի պատասխանտու եւ Արեւելեան Ա․Մ․Ն․-ի Կեդրոնական Կոմիտէի անդամ՝ Սեպուհ Հացագործեան, որ power point-ով հետաքրքիր կերպով  ներկայացուց «Արցախ Ֆոնտ»-ի յետ պատերազմի իրականացուած աշխատանքները, ինչպէս նաեւ ներկայ եւ ապագայ ծրագիրները Մարտունիի սահմանամերձ գիւղերուն համար: Ան հաստատեց որ մեր բռնագրաւուած հայրենի հողերու ազատագրումը միակ միջոցն է ապահովելու մեր հայրենի պետականութիւնը եւ զոյգ հանրապետութիւններու անկախութիւնը: «Վստահ ենք որ Շուշին կրկին հայութեամբ պիտի շնչէ. երեխաներու ժպիտը կրկին պիտի վերադառնայ եւ Ղազանջեցոց եկեղեցւոյ զանգակները կրկին պիտի ղօղանջեն» ըսաւ ան, եզրակացնելով՝ «Մենք յանձնուելու իրաւունք չունինք. մենք ձախողելու իրաւունք չունինք. որովհետեւ եթէ ձախողինք՝ կը կորսնցնենք մեր հայրենիքը. եկէք սկսինք այսօր, յաջողցնենք այս ձեռնարկը, հետեւաբար կը յաջողին Արցախի մեր ծրագիրները եւ այդպիսով գիւղացին կը մնայ իր հայրենի հողին վրայ. Արցախը կը մնայ հայ եւ կը գոյատեւէ»։

Սուրբ Վարդանանց եկեղեցւոյ հովիւ՝ Հայր Սահակ Ծ.Վրդ. Եմիշեան օրհնեց սեղանը եւ փոխանցեց իր քաջալերանքի խօսքը «Արցախ Ֆոնտ»-ի ծրագիրնրուն:

Արցախի Աղաւնոյ գիւղի գիւղապետ, Անդրանիկ Չաւուշեան, արձանագրուած տեսերիզով մը հանդէս եկաւ շնորհակալութիւն յայտնելով Արեւելեան Ամերիկայի «Արցախ Ֆոնտ»-ին եւ փոխանցեց իր վճռակամութիւնը մնալու հայրենի հողին վրայ, չյանձնուելու, եւ միասնական ջանքերով հասնելու մեր ծրագիրներու իրագործման: Հացագործեանի շահեկան ներկայացումը եւ Չաւուշեանի պատգամը ներկաները քաջալերեց նիւթապէս մասնակցելու «Արցախ Ֆոնտ»-ի ծրագիրներու իրականացման եւ խանդավառ մթնոլորտի մէջ։ Գէորգ Արթինեանի եւ իր նուագախումբի առաջնորդութեամբ հայրենասիրական երգերու երեկոն շարունակուեցաւ որուն ընթացքին նուիրատուութիւններու ընդհանուր գումարը անցաւ 40 հազար տոլար:

Նիւ Ճըրզիի գաղութը, թօթափած պարտուողականութիւնը, եկաւ ամրապնդելու իր կամքը՝ օժանդակելու Արցախին եւ վերահաստատելու որ սփիւռքի այս փոքր քաղաքը «Դիմադրութեան» կողքին է. Արցախի կողքին է բարոյապէս եւ նիւթապէս. Արցախը երբեք մաս չի կրնար կազմել Ատրպէյճանի: Հեռախօսները լուսաւորելով՝ ներկաները «Զարթի՛ր Լաօ» երգեցողութեամբ յոտնկայս զօրակցեցան «Դիմադրութիւն» պայքարին։ Լաօն զարթնած է:

Շնորհակալութիւն Նիւ Ճըրզիի գաղութի աշխոյժ մասնակցութեան: Շնորհակալութիւն տեղական ձեռնարկի կազմակերպիչ յանձնախումբի անդամներուն՝ Փօլին Տոսթումեան, Յովիկ Քէօշկէրեան, Մարալ Գաբրիէլեան, Անի Քէշիշեան, Մարինա Եագուպեան, Նայիրի Գաբրիէլեան, Նայիրի Տիրացուեան:

Ուս ուսի բոլորս Արցախի կողքին։

Թղթակից

 

 

 

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles