ԱՐԱՄ Ա. ԿԱԹՈՂԻԿՈՍ ԱՅՑԵԼԵՑ ՈՒԱՇԻՆԿԹԸՆԻ ՀԱՅ ԴԱՏԻ ԿԵԴՐՈՆ ԵՒ Հ.Հ. ԴԵՍՊԱՆԱՏՈՒՆ

0 0
Read Time:4 Minute, 51 Second

p6 aram anca  Ուրբաթ, Սեպտեմբեր 12-ին, Արամ Ա. Կաթողիկոս այցելեց Ուաշինկթընի Հայ Դատի գրասենեակը, ընկերակցութեամբ շրջանի Բարեջան Առաջնորդ Գերշ. Տ. Օշական Արք. Չօլոյեանի, Կաթողիկոսարանի Միջ-եկեղեցական Յարաբերութեանց վարիչ Գերպ. Տ. Յուսիկ Ծ. Վրդ. Մարտիրոսեանի եւ Ազգային Կեդրոնական Վարչութեան անդամ Տոքթ. Տրդատ Մանկիկեանի:

Ողջունելով Վեհափառ Հայրապետին այցելութիւնը, կեդրոնատեղիի աշխատակազմի ղեկավարը՝ Տիար Արամ Համբարեան, իր ուրախութիւնը յայտնեց, որ հակառակ Նորին Սրբութեան ժողովական բազմազբաղ վիճակին, կ’այցելէ Հայ Դատի աշխատանքները կազմակերպող ու հետապնդող Ուաշինկթընի կեդրոնը: Համբարեան մասնակցած ըլլալով Միջին Արեւելքի քրիստոնէութեան նուիրուած Ուաշինկթընի միջազգային համագումարին, իր հրճուանքը արտայայտեց Վեհափառ Հայրապետին կատարած կարեւոր դերին, ինչպէս նաեւ յաճախակի առիթներով Հայոց Ցեղասպանութեան գծով կատարուած յիշեցումներուն: Ան նաեւ վեր առաւ, Հայ Եկեղեցւոյ ու յատկապէս Մեծի Տանն Կիլիկիոյ Կաթողիկոսութեան բերած նպաստը, հայ ժողովուրդի իրաւունքներու հետապնդման աշխատանքներուն:
Արամ Ա. իր յատուկ ուրախութիւնը յայտնեց, որ կը գտնուի իրեն համար միշտ սիրելի եղած Հայ Դատի աշխատանքներուն կեդրոնը: “Մեծի Տանն Կիլիկիոյ Կաթողիկոսութեան առաքելութեան կենսական մարզերէն մէկն է, մեր ժողովուրդի իրաւունքներու հետապնդումը:…Ժամանակը հասած է, որ Հայոց Ցեղասպանութեան աշխատանքները փոխադրուին իրաւական դաշտ: Հեզասահ պիտի չընթանայ այս գործընթացքը, սակայն մենք քաջութիւնը պիտի ունենանք նման քայլի մը դիմելու“, ըսաւ Վեհափառը: Ան նաեւ անդրադարձաւ Ուաշինկթընի համագումարի աշխատանքներուն եւ նախագահ Օպամային հետ տեղի ունեցած հանդիպումին՝ պատասխանելով իրեն ուղղուած շարք մը հարցերուն, կեդրոնի աշխատակազմին ու ներկայ հիւրերուն կողմէ:p6 aram anca2
Ընդառաջելով Հայ Դատի կեդրոնատեղիի պատասխանատուներու խնդրանքին, Քեփիթոլ Հիլ գտնուած միջոցին, Արամ Ա. հանդիպում մը ունեցաւ Քոնկրէսի մեծամասնական պլոքի ղեկավար Քէվըն ՄըքՔարթիի հետ: Հանդիպման ընթացքին քննարկուեցան, Արեւմտեան Հայաստանի եւ Կիլիկիոյ վանքերն ու եկեղեցիները իրենց իրաւատէրերուն վերադարձնելու գծով, քոնկրէսի ենթայանձնախումբին կողմէ ներկայացուած նախագիծին առնչուած հարցեր:
Ժողովական աշխատանքներուն առընթեր, Ուրբաթ, Սեպտեմբեր 12-ին, Վեհափառ Հայրապետը, Գերշ. Տ. Օշական Արք. Չօլոյեանի՝ Առաջնորդ Ա.Մ. Նահանգներու Արեւելեան Թեմի, Կաթողիկոսարանի Միջ-եկեղեցական Յարաբերութեանց վարիչ Գերպ. Տ. Յուսիկ Ծ. Վրդ. Մարտիրոսեանի եւ Ազգային Կեդրոնական Վարչութեան անդամ Տոքթ. Տրդատ Մանկիկեանի ընկերակցութեամբ, առիթը ունեցաւ այցելելու Ուաշինկթընի Հայաստանի դեսպանատունը, ուր ընդունուեցաւ Հայաստանի դեսպան Տիգրան Սարգսեանի, Արցախի ներկայացուցիչ Տիար Ռոպերթ Աւետիսեանի եւ իրենց աշխատակազմին կողմէ: Նորին Սրբութիւնը նախ առանձին հանդիպում մը ունեցաւ դեսպանին հետ, որու ընթացքին տեղեակ պահեց զինք, համագումարի աշխատանքներուն եւ նախագահ Օպամային հետ ունեցած հանդիպման մասին:
Ապա, աշխատակազմի եւ Վեհափառ Հայրապետին այցելութեան առիթով հրաւիրուած ազգայիններու ներկայութեան, դեսպան Սարգսեան ողջունեց Արամ Ա. Կաթողիկոսի դեսպանատուն այցելութիւնը, յիշեցնելով, որ դեսպանատունը փոքրիկ Հայաստան մըն է Ամերիկայի հողին վրայ եւ դեսպանատան ճամբով իրենց կարելին կը կատարեն նպաստելու Հայաստանի միջազգային յարաբերութիւններուն ու տնտեսական վերելքին: Դեսպանը շեշտեց եկեղեցւոյ դերը Հայաստանի հզօրացման գործընթացքին մէջ: Խօսք առաւ նաեւ Արցախի ներկայացուցիչը, որ անդրադառնալով վերջին շրջանին Ատրպէյճանի կողմէ կատարուած ապահովական խախտումներուն, շեշտեց Արցախի բանակին ու ժողովուրդին ամուր կամքը եւ հայրենասիրութիւնը, դիմագրաւելու Ատրպէյճանի կողմէ ներթափանցելու որեւէ մէկ փորձ: Խօսք առաւ Օշական Արք. Չօլոյեան, որ անդրադարձաւ համագումարի ընթացքին Վեհափառ Հայրապետին առանցքային դերին ու ժողովի աշխատանքներուն անոր բերած, ժողովականներուն իսկ վկայութեամբ, կարեւոր նպաստին:
Արամ Ա. Կաթողիկոս, առաջին հերթին, իր ուրախութիւնը յայտնեց, Հայաստանի դեսպանատան մէջ գտնուելուն համյար, որ միշտ կը մնայ ու պէտք է մնայ, հայ ժողովուրդի զաւակներուն գուրգուրանքի ու զօրակցութեան առարկան, բոլոր երկիրներէն ներս: Ան ողջունեց դեսպան Սարգսեանի նշանակումը, մաղթելով որ իր ունեցած մասնագիտութեամբ, տնտեսական մարզէն ներս, ինչպէս նաեւ որպէս վարչապետ իր ձեռք ձգած փորձառութեամբ, կարեւոր նպաստ պիտի բերէ Հայաստանի եւ Միացեալ Նահանգներու դիւանագիտական յարաբերութեանց: Նորին Սրբութիւնը նաեւ անդրադարձաւ Հայոց Ցեղասպանութեան հարիւրամեակին եւ յառաջիկայ շաբաթ, Հայաստանի մէջ տեղի ունենալիք Հայաստան-Սփիւռք համաժողովին, շեշտելով որ նման նախաձեռնութիւններ առիթ պէտք է դառնան մեր ժողովուրդի միասնականութեան ամրապնդման:
Արամ Ա. նաեւ այցելեց Լիբանանի դեսպանատուն, ուր ներկայ գտնուեցաւ Լիբանանի դեսպան Անթուան Շտիտի, ի պատիւ պատրիարքներուն սարքած ճաշկերոյթի, որուն ներկայ գտնուեցան նաեւ Վատիկանէն ժամանած կարտինալներ, քոնկրէսի անդամներ եւ այլ բարձրաստիճան հիւրեր:
Նշենք թէ, այցելութեան առաջին օրը, Արամ Ա. Կաթողիկոս, նախագահած էր Ուաշինկթընի Սուրբ Խաչ եկեղեցւոյ մէջ մատուցուած Սուրբ եւ Անմահ Պատարագը: Ան առաջին հերթին, յայտնած էր, որ դարձեալ կը գտնուի Սուրբ Խաչ եկեղեցւոյ մէջ, շրջապատուած հայ ժողովուրդի զաւակներով: Ան իր ուսանողութեան օրերուն յաճախակի կերպով այցելած էր այս եկեղեցին եւ իր խօսքը ուղղած՝ ժողովուրդին: Ողջունելէ ետք Ա.Մ. Ն. Արեւելեան Թեմի Առաջնորդ Գերշ. Տ. Օշական Արք. Չօլոյեանը եւ Ազգային Իշխանութիւնը, Արամ Ա.IMG_9542-1024x682
իր պատգամին գլխաւոր նիւթը ընտրած էր ՀԱՒԱՏՔԸ, որպէս հիմքը քրիստոնէական կեանքին: “Քրիստոս իր երկրաւոր առաքելութեան ընթացքին յաճախակի կերպով անդրադարձած է, մարդկային կեանքին մէջ հաւատքի կենսական կարեւորութեան: Քրիստոսի ուսուցումներուն ու հրաշքներուն մէջ, հաւատքը առանցքային ներկայութիւն է: Ապա, Վեհափառ Հայրապետը բացատրեց հաւատքին իմաստը: Ան ըսաւ, որ մարդը անկատար արարած է, իրմէ վեր ու հզօր ուժի մը հաւատալը բնական մղում մըն է մարդու կեանքին մէջ: Հին դարերէն սկսեալ, մարդը հաւատացած է բնութեան ուժերուն եւ ստեղծած իր չաստուածները: Քրիստոս եկաւ ամբողջութեամբ շրջելու հաւատքին իմաստը, առարկան ու նպատակը: Քրիստոս ըսաւ ես եմ կեանքը, ճամբան ու ճշմարտութիւնը, հետեւաբար, ան որ ինծի կը հաւատայ պէտք է ետեւէս գայ: Արդ, քրիստոնեայ մարդուն համար Քրիստոս ի՛նքն է հաւատքի աղբիւրը, Քրիստոսի հաւատալ կը նշանակէ Քրիստոսի ուսուցումները գործադրել, աւետարանին արժէքներն ու սկզբունքները մեր կեանքին հետ շաղախել: Քրիստոսի ճամբէն քալել կը նշանակէ գալել խաչի ճամբէն, ինչպէս Քրիստոս ինք ըսաւ, հաւատքը զոհողութիւն եւ յանձնառութիւն կ’ենթադրէ: Հաւատքը կեանքի աղբիւր է, ինչպէս Քրիստոս ինք ըսաւ, ով որ հաւատայ պիտի ապրի: Հաւատքը հզօրութեան երաշխիք է, իր կեանքը հաւատքով թրծած մարդը չի՛ վախնար աշխարհի վտանգներէն“, ըսաւ Արամ Ա., ախելցնելով թէ, այս գիտակցութեամբ Հայ ժողովուրդը ապրեցաւ քրիստոնէական հաւատքը: “Ան ո՛չ միայն Քրիստոսի հետեւող առաջին ժողովուրդը եղաւ, այլ նաեւ՝ իր հաւատքին համար արիւն թափող առաջին ժողովուրդը: Հայ ժողովուրդը քրիստոնէական հաւատքը այնքան նոյնացուցած էր իր կեանքին հետ, որ ան դարձած էր պատմիչին բառերով մորթի գոյն: Ահա թէ ինչո՞ւ, երբ հինգերորդ դարուն հայ ժողովուրդի թշնամին կ’ուզէր արմատախիլ ընել քրիստոնէական հաւատքը, ան հաւաքական կամքով ըսաւ, այս հաւատքէն մեզ աշխարհի ոչ մէկ ուժ կրնայ հեռացնել: Արդ, քրիստոնէական հաւատքը մեր ժողովուրդին համար եղաւ աղբիւր հզօրութեան: Այդ հաւատքով զօրացած մեր ժողովուրդը մնաց կանգուն պատմութեան ընթացքին“, շեշտեց Վեհափառը:
Աւարտին, Նորին Սրբութիւնը կոչ ուղղեց մեր ժողովուրդի զաւակներուն, կառչած մնալու քրիստոնէական հաւատքին ու համախմբուելու, քրիստոնէական հաւատքը մեր կեանքին մէջ կենդանի պահած, Հայ Եկեղեցւոյ շուրջ: Վեհափառ Հայրապետը նաեւ յիշեցուց, որ Հայոց Ցեղասպանութեան 100-ամեակի սեմին, Հայութիւնը միակամ, ցեղասպան թուրքէն ու աշխարհէն պէտք է պահանջեն իրենց բռնաբարուած իրաւունքները՝ հաւատարիմ մնալով մեր մէկուկէս միլիոն նահատակներու նուիրական կտակին:
Պատարագին ներկայ էին Հայաստանի դեսպան Տիար Տիգրան Սարգսեան, Արցախի ներկայացուցիչ Տիար Ռոպերթ Աւետիսեան, Ազգային Իշխանութեան անդամներ եւ մեծ թիւով ներկաներ: Սուրբ եւ Անմահ Պատարագէն յետոյ տեղի ունեցաւ աջահամբոյր:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles