0
0
Հ.Յ.Դ. Ա.Մ.Ն. Արեւելեան շրջանի «Շիրակեան» Կեդրոնական Կոմիտէէն պատուիրակութիւն մը, վերջերս այցելութիւններ տուաւ Մեծի Տանն Կիլիկիոյ եւ Ամէնայն Հայոց Առաջնորդարաններ, շնորհաւորելու համար վերընտրուած Առաջնորդներ՝ Սրբազան Օշական Արք. Չօլոյեանն ու Սրբազան Խաժակ Արք. Պարսամեանը: Կեդրոնական Կոմիտէի պատուիրակութիւնը կը բաղկանար Անդրանիկ Գասպարեանէ եւ Հրայր Պարոնեանէ, որոնց կ’ընկերանային Նիւ Եորքի շրջանէն ներկայացուցիչներ:
Առաջին հանդիպումը, կատարուեցաւ Սուրբ Էջմիածնի Ամէնայն Հայոց Եկեղեցւոյ Առաջնորդ Սրբազան Խաժակ Արք. Պարսամեանի հետ, Յունիս 17-ի երեկոյեան:
Նաեւ ներկայ էին շրջանի յարաբերական յանձնախումբի անդամներ՝ Մարտիկ Չոլագեան եւ Մարի Քէշիշեան:
Ապա, Յունիս 24-ի երեկոյեան, պատուիրակութիւնը տեսնուեցաւ Մեծի Տանն Կիլիկիոյ Առաջնորդ՝ Սրբազան Օշական Արք. Չօլոյեանի հետ: Սիրալիր մթնոլորտի մէջ կատարուած այս այցելութիւններուն ընթացքին, արծարծուեցան Հայ Դատի առնչութեամբ եւ ընդհանրապէս գաղութին հետ, առնչուող հարցեր:
Երկու հանդիպումներ ալ տեւեցին մէկ ժամէն աւելի: Յառաջիկայ ամիսներուն, նմանօրինակ հանդիպումներ պիտի կրկնուին:
