0
0
Ուրբաթ, Մայիս 19-ին, Ազգային Երեսփոխանական Ժողովի նիստերու երկրորդ օրուան աւարտին, Ազգային Առաջնորդարանը կազմակերպած էր տարեկան ճաշկերոյթը՝ Ուորուիքի «Քրաուն Փլազա» պանդոկին մէջ։ Միացեալ Նահանգներու, Հայաստանի եւ Արցախի ազգային քայլերգներու երգեցողութենէն, Ա․Մ․Ն․ Արեւելեան Թեմի բարեջան Առաջնորդ՝ Անուշաւան Արք․ Դանիէլեանի բացման աղօթքէն ու ընթրիքէն ետք, հանդիավարը՝ Ազգային Վարչութեան ատենապետ՝ Յակոբ Սրկ. Խաչատուրեան, բացման խօսքը կատարեց, յայտնելով, թէ երեկոյեան պատուոյ հիւրերն էին Ռոտ Այլընտի Ներկայացուցիչներու Տան խօսնակ՝ Ք. Ճոզէֆ Շեքարչի, եւ Ռոտ Այլընտի նահանգային ծերակուտական՝ Տէյվիտ Փ. Թիքոյեան։
Խաչատուրեան շնորհակալութիւն յայտնեց հիւրընկալող՝ Սրբոց Վարդանանց եկեղեցւոյ եւ անոր հոգեւոր հովիւ՝ Արժպ. Տ. Գաբրիէլ Քհն. Նազարեանին,
Հոգաբարձութեան, Տիկնանց Միութեան, Արանց ակումբին եւ կազմակերպիչ յանձնախումբին, որոնք իրենց ջանքերը չէին խնայած ժողովի հեզասահ կազմակերպութեան համար։ Ան յայտնեց, թէ Ն.Ս.Օ.Տ.Տ. Արամ Ա. Կաթողիկոսի նամակը Ազգային Երեսփոխանական Ժողովին կը բխէր «խորին համոզումէն, որ ուժեղ Սփիւռք մը կը նշանակէ ուժեղ Հայրենիք մը, եւ, փոխադարձաբար, ուժեղ Հայրենիք մը նախապայմանն է ուժեղ Սփիւռքի մը համար»։
Եզրակացնելով իր խօսքը, ան դիտել տուաւ, որ Ազգային Վարչութեան գործունէութեան այս տարուան ծրագիրը եւ այս ժողովի ընթացքին յանձնախումբերու քննարկումները «պէտք է դարձեալ ուժեղացնեն մեր յանձնառութիւնը ծառայելու Հաւատքով, Յոյսով եւ Սիրով, եւ ամէն բանէ վեր, ուժեղացնեն մեր սփիւռքահայ ինքնութիւնը»։
Ձեռնարկի գեղարուեստական բաժնին իրենց մասնակցութիւնը բերին Ռաֆֆի Ռշտունի (դաշնակ), Պեթանի Սօուսա Ռշտունի (ջութակ), Թալին Տօնոյեան եւ Ռոստոմ Մկրտիչեան (մեներգ)։
Բարի գալուստի խօսքը արտասանեցին Արժպ. Տ. Գաբրիէլ Քհն. Նազարեան եւ Ս. Վարդանանց եկեղեցւոյ հոգաբարձութեան ատենապետ՝ Լեւոն Աթթարեան, որ անդրադարձաւ խօսքէ դէպի գործ երթալու կարեւորութեան մասին՝ «մեր փոքրիկ Հայաստանը վերակառուցելու համար։ Արդէն ենթակառուցուածքը ունինք. նպատակը անոր պահպանումն էր եւ բարելաւումը՝ անցեալէն աւելի լաւ։ Պէտք է հետեւինք երեք քայլերու. նորարարութիւն, ներշնչում եւ յանձնառութիւն», ակնարկելով համավարակին յաջորդող ժամանակաշրջանին Արեւելեան Թեմին մէջ։
Յայտագրի յաջորդ բաժնին մէջ, Առաջնորդարանի գնահատագրեր յանձնուեցան Փրաւիտըսնի համայնքէն չորս երիտասարդներու՝ Արփի Տօնոյեանին, Մայքըլ Սիմոնեանին, Ներսէս Տօնոյեանին եւ Սարգիս Մէնիսեանին, Հայ Եկեղեցւոյ կեանքին մէջ անոնց օրինակելի մասնակցութեան եւ համայնքի երիտասարդութեան իբրեւ օրինակ ծառայելուն համար։ Դրուատալից եւ ներշնչող խօսքերով, Գաբրիէլ Քհն. ներկայացուց երիտասարդները, որոնց գնահատագրերը յանձնուեցան Առաջնորդ Սրբազան Հօր կողմէ։
Քաթրին Ղազարեան՝ Ռոտ Այլընտի Ներկայացուցիչներու Տան մեծամասնութեան վարիչ, ներկայացուց Ներկայացուցիչներու Տան խօսնակ Ճոզէֆ Շեքարչին, ընդգծելով անոր հայանպաստ աշխատանքը, ներառեալ Հայոց Ցեղասպանութեան ճանաչումն ու ոգեկոչումը, որոնք իրեն արժանի դարձուցած էին «Արծիւ՝ Առաջնորդարանի» մրցանակին, զոր յանձնեց Անուշաւան Արքեպիսկոպոս։ Պրն. Շեքարչի շնորհակալութիւն յայտնեց Առաջնորդ Սրբազան Հօր ու Առաջնորդարանին այս մեծարանքին համար եւ վերահաստատեց իր հայանպաստ դիրքորոշումը, հաստատելով, որ «այնքան ատեն, որ Ներկայացուցիչներու Տան խօսնակ եմ, հայերը բարեկամ մը պիտի ունենան հոն»։
Արժպ. Տ. Կոմիտաս Ա. Քհն. Պաղսարեան՝ նախկին հոգեւոր հովիւ Ս. Վարդանանց եկեղեցւոյ (Փրաւիտընս, Ռոտ Այլընտ), ներկայացուց եկեղեցւոյ երկարամեայ ծխական՝ ծերակուտական Տէյվիտ Թիքոյեանը, իբրեւ Ազգային Առաջնորդարանի «Տարուան Մարդ»ը։ Ծերակուտական Թիքոյեան շնորհակալութիւն յայտնեց «այս իմաստալից մրցանակով մեծարուելու անհաւատալի ու խորունկ պատիւը», աւելցնելով, թէ «չեմ կրնար առանձինս ընդունիլ այս պատիւը, որովհետեւ օրհնուած եմ շրջապատուած ըլլալով ընտանիքով, բարեկամներով եւ հոգեւոր ղեկավարներով, որոնք իրենց աջակցութիւնը տուած են ինծի, զիս առաջնորդած եւ ուղեցոյց եղած եմ՝ միշտ ճիշդը գործելու եւ լաւ ընտրութիւններ կատարելու»։
Անուշաւան Արք․ Դանիէլեանի իմաստալից փակման խօսքերէն եւ «Կիլիկիա» երգի յոտնկայս երգեցողութենէն ետք, օրուան վերջին պահը կազմեցին Ազգային Առաջնորդարանի եւ Արեւելեան Թեմի Առաջնորդարանի Տիկնանց Միութիւններու Ընկերակցութեան վիճակահանութիւնները։
