0
0
ՊՐԻՒՔՍԷԼ․- Կիրակի, Հոկտեմբեր 1-ին, Գերմանիայէն, Ֆրանսայէն, Նետերլանտներէն եւ Պելճիքայէն ժամանած տասը հազարէ աւելի հայորդիներ մասնակցեցան “Ռոպերթ Շուման” հրապարակին վրայ կատարուած հաւաքին, ի զօրակցութիւն Արցախին: «Եւրոպացիները Յանուն Արցախ»-ի նախաձեռնութեան կազմակերպած հանրահաւաքին մեկնարկը տրուեցաւ Հայաստանի եւ Արցախի օրհներգերով:
Հանրահաւաքի մասնակիցները պաստառներով կը մեղադրէին Եւրոպական Միութիւնը եւ Եւրոպական յանձնաժողովի ղեկավար Ուրսուլա ֆոն Տէր Լեյընը` Ալիեւի վարչակարգը անպատժելի ձգելու համար։ Հանրահաւաքին մասնակցելու համար Ֆրանսայէն եկած էին բարձրաստիճան քաղաքական գործիչներ, երեսփոխաններ, շրջաններու ղեկավարներ եւ քաղաքապետներ:
Պելճիքայի Հայ կոմիտէի վեհաժողովի նախագահ Կարէն Թադեւոսեան նշեց. «Այսօր այստեղ հաւաքուածներէդ իւրաքանչիւրը կը կրէ պատասխանատուութիւն բոլոր այն մարդոց առջեւ, որոնք կ՛աշխատին, որպէսզի Արցախի 120 հազար հայերուն ճակատագիրը չմատնուի անտէրութեան: Մենք արդէն կուշտ ենք յայտարարութիւններէն, եւ եկած է ժամանակը, որպէսզի Եւրոպան գործէ եւ անդրադառնայ հարցին առ այն, որ մենք` իբրեւ Եւրոպայի քաղաքացիներ, ունինք հաւասար իրաւունքներ պահանջելու այն ամէնը, ինչ որ իւրաքանչիւր եւրոպացին կը պահանջէ: Այսօր միակ բանը, որ մենք կրնանք ընել, բռունցք ըլլալն է, որպէսզի կարենանք մէկ բռունցք եղած պայքարիլ այն բոլոր անարդարութիւններուն դէմ, որոնք, ցաւօք, կը թելադրեն աշխարհաքաղաքական խաղերը»:
Հաւաքուածները խորհրդանշական երդում տուին` պայքարելու յանուն Հայաստանի եւ Արցախի. «Պիտի չզիջինք եւ պիտի չհաշտուինք: Հայաստանի եւ Արցախի հայութիւնը կրնայ ապաւինիլ մեզի»:
