Արցախի Ազգային Ժողովի Յայտարարութիւնը
Արցախի Հանրապետութեան Ազգային ժողովը, որպէս արցախահայութեան օրինական ներկայացուցչական մարմին, խստօրէն դատապարտում է Ազրպէյճանի իշխանութիւնների կազմակերպած շինծու «դատավարութիւնները» Արցախի Հանրապետութեան գերեվարուած հայազգի ռազմաքաղաքական գործիչների եւ քաղաքացիական անձանց նկատմամբ:
Այդ գործընթացներում ներկայացուած շինծու մեղադրանքներն ու դրանց հիման վրայ ընդունուած դատավճիռները որեւէ կապ չունեն արդարադատութեան հետ եւ հանդիսանում են պետական ահաբեկչութեան ու քաղաքական հաշուեյարդարի բացայայտ դրսեւորում` նպատակ ունենալով վարկաբեկել հայութեան երեք տասնամեակից աւելի տեւած սեփական իրաւունքների պաշտպանութեանն ուղղուած պայքարը, որն իրականացուել է միջազգային իրաւունքի, մասնաւորապէս, դրա հիմնարար սկզբունքներից մէկի` ինքնորոշման իրաւունքի լիակատար համապատասխանութեամբ:
Ազրպէյճանում այդ շինծու «դատավարութիւնները» շարունակութիւնն են Արցախի դէմ 2020 թուականին սանձազերծուած պատերազմական յանցագործութիւններով ուղեկցուող ռազմական նախայարձակումի եւ 2023 թուականին իրականացուած ցեղային զտումների ու ցեղասպանական գործողութիւնների, որոնք միջազգային իրաւունքը միանշանակօրէն որակում է որպէս մարդկութեան դէմ կատարուած յանցագործութիւններ:
Անընդունելի եւ դատապարտելի է Հայաստանի Հանրապետութեան իշխանութիւնների շարունակական անգործութիւնն ու անտարբերութիւնը ոչ միայն հայրենակիցների նկատմամբ ներկայացուած շինծու մեղադրանքների ու կայացուած սարքովի «դատավճիռների» նկատմամբ, այլեւ քաղաքական կարճատեսութիւնը, քանի որ դրանով Հայաստանի Հանրապետութեան դէմ ձեւաւորւում են ապագայում ներկայացուելիք մեղադրանքների հիմքեր` որպէս ահաբեկչութիւնը խրախուսած պետութիւն:
Անկախ այն բանից` միջազգային հանրութիւնը աշխարհաքաղաքական վայրիվերումների բովում նկատում է դա, թէ ոչ, Լեռնային Ղարաբաղի հակամարտութիւնը երեք տասնամեակից աւելի եղել է միջազգային յարաբերութիւնների ու ՄԱԿ-ի եւ ԵԱՀԿ-ի օրակարգերի անբաժան մասն ու 15 տարի շարունակ Մինսքի խմբի համանախագահներն ու ՄԱԿ Անվտանգութեան խորհրդի երեք մշտական անդամ պետութիւնների` Միացեալ Նահանգների, Ռուսաստանի, Ֆրանսայի ղեկավարները հաստատել են, որ հակամարտութիւնը պէտք է լուծուի բանակցութիւնների միջոցով եւ ինքնորոշման իրաւունքի հիման վրայ:
Հետեւաբար, այդ հաստատութիւնների համապատասխան արձագանգի բացակայութեան դէպքում Արցախի ռազմաքաղաքական ղեկավարութեան նկատմամբ Պաքւում ընդունուած «դատավճիռները» հաւասարապէս վերաբերում են այդ երկրների ու միջազգային կազմակերպութիւնների ղեկավարներին:
Արցախի Հանրապետութեան Ազգային ժողովը յայտարարում է`
մենք հետեւողականօրէն պայքարելու ենք մեր հայրենակիցների իրաւունքների պաշտպանութեան ու մեր ժողովրդի` հայրենի բնակավայրեր վերադառնալու համար եւ համոզուած ենք, որ ի վերջոյ արդարութիւնը յաղթելու է եւ իրական յանցագործները ստանալու են իրենց արժանի պատիժը:
ԱՐՑԱԽԻ ՀԱՆՐԱՊԵՏՈՒԹԵԱՆ ԱԶԳԱՅԻՆ ԺՈՂՈՎ
6 Փետրուար 2026
