Ստեփանակերտ.- Արայիկ Յարութիւնեանի Հրաժարականը Պահանջուեցաւ

0 0
Read Time:1 Minute, 6 Second


ՍՏԵՓԱՆԱԿԵՐՏ.- Երկուշաբթի, Յունիս 21-ի երեկոյեան, Վերածնունդի հրապարակին վրայ տեղի ունեցաւ քաղաքացիներու ինքնաբուխ հաւաք, որ վայրկեաններու ընթացքին վերածուեցաւ ցոյցի:
Հաւաքը, որուն մասին յայտարարուեցաւ Դիմատետրի վրայ, նախաձեռնուեցաւ, երբ Արայիկ Յարութիւնեանը շնորհաւորեց Նիկոլ Փաշինեանը` Հայաստանի Ազգային ժողովի ընտրութիւններուն տարած յաղթանակին առիթով:
Արցախի քաղաքացիները պահանջեցին նախագահ Արայիկ Յարութիւնեանի հրաժարականը:
Տրուած ըլլալով, որ Յարութիւնեան Երեւան կը գտնուէր, պետական նախարար Արտակ Բեգլարեան յայտնեց, որ Արցախի նախագահը պատրաստ է վերադարձին անձամբ հանդիպելու ցուցարարներուն հետ:
Յաջորդ օրը վերադառնալով Երեւանէն, Արցախի Հանրապետութեան նախագահը, Ստեփանակերտի Վերածնունդի հրապարակին վրայ խօսեցաւ իր հրաժարականը պահանջող ցուցարարներուն հետ: Ան իր խօսքին մէջ անդրադարձաւ ցուցարարներուն հիմնական հարցերուն:
Նախագահը ներում հայցեց Արցախի ժողովուրդէն` իր կողմէ թոյլ տրուած սխալներուն ու բացթողումներուն համար:
Խօսելով Հայաստանի եւ Արցախի յարաբերութիւններուն մասին, ան հաստատեց, որ պատրաստ է բոլորին հետ երկխօսութեան: «Թող արտայայտեն իրենց կարծիքը, պատրաստ եմ լսելու ե՛ւ հրապարակայնօրէն, ե՛ւ առանձին, պատրաստ եմ լսելու անոնց, որոնք այստեղ տարբեր վանկարկումներ կը կատարեն, պատրաստ եմ պատասխանելու բոլոր հարցումներուն», շեշտեց Յարութիւնեան:
«Յիմարութիւն պիտի ըլլայ կարծել, թէ հաճոյք կը ստանամ ներկայ իրավիճակէն: Կամ թէ ես որեւէ անձնական շահագրգռուածութիւն ունիմ շարունակելու պաշտօնավարումս, կամ կառչած եմ աթոռին: Ամենեւին ոչ: Ես պարզապէս ինքիզինքս պատասխանատու կը զգամ մեր ժողովուրդին եւ յաջորդ սերունդներուն առջեւ: Այնքան պատասխանատու, որ յանկարծ իմ յուզական ու անհեռատես փախուստովս չկործանեմ մեր պետականութիւնը», ըսաւ Արայիկ Յարութիւնեան:
Ելոյթի աւարտէն ետք, նախագահ Յարութիւնեանի առաջարկով, հանրահաւաքի մասնակիցները քայլերթով ուղղուեցան դէպի եղբայրական գերեզմանոց` յարգանքի տուրք մատուցելու զոհուածներու յիշատակին:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles