0
0
ՓԱՐԻԶ.- Հ.Հ. նախագահ Սերժ Սարգսեան աշխատանքային այցելութիւն մը կատարեց Ֆրանսա եւ այդ ծիրին մէջ, հանդիպում մը ունեցաւ Ֆրանսայի նախագահ Էմանուէլ Մաքրոնի հետ:
Երկու նախագահները կարեւոր նկատեցին հայ-ֆրանսական խորհրդարանական յարաբերութիւններու շարունակական զարգացումը, տնտեսական մարզին մէջ համագործակցութեան աշխուժացումը` ընդգծելով, որ տնտեսական յարաբերութիւնները անհրաժեշտ է հասցնել վերընթաց զարգացող երկկողմանի քաղաքական յարաբերութիւններու ներկայիս բարձր մակարդակին:
«Այս բարդ շրջանին մէջ Ֆրանսան ձեր կողքին պիտի ըլլայ եւ պիտի օժանդակէ, որպէսզի յառաջ շարժիք: 2018 թուականը շատ կարեւոր է Հայաստանի համար», ըսաւ Մաքրոն` աւելցնելով, որ Մայիս 28-ին` Հայաստանի Ա. Հանրապետութեան 100-ամեակին, Ֆրանսայէն պիտի մասնակցի արտաքին գործոց նախարարը: Նաեւ Մաքրոն պաշտօնապէստեղեկացուց, որ Հոկտեմբերին պիտի այցելէ Հայաստան` Ֆրանսախօս երկիրներու վեհաժողովին մասնակցելու նպատակով:
