«ՏԻՒՏԻՒԿ» ԱԹԱՆԱՍ ԴԱՍԱՐԱՆ ԿԸ ՓՈԽԷ

0 0
Read Time:1 Minute, 26 Second

 

            Կեդրոնականցի Արմենակի հետ հայկական արուարձանի սրճարանը նստած կը զրուցէինք:

            Մեզի միացաւ թաղի «զառամած թոշակառու մտաւորական» Աթանաս: Որպէսզի զինք չմոռնան, դարձած է երգիչներու եւ ճաշկերոյթներու թղթակից, տեւաբար կը  նշէ անոնց  երաժշտական կամ խոհանոցային թերիները,:

            Միացան ուրիշներ, քանի մը երիտասարդներ ալ: Ի հարկէ խօսուեցան Հայաստան, Արցախ, կուսակցութիւններ, եկեղեցի, թաղապետական ընտրութիւններու հայերու մասնակցութիւն: Իսկական համայնքային ժողով:

            Աթանաս, իւրաքանչիւր խօսողէ ետք, կը միջամտէր, եւ կ’ըսէր.  «Ըսածդ թերի է, ճիշդ չէ, այսպէս պէտք է ըսել»: Իսկական հայկական թաղային թատրոն եւ Աթանաս իրաւարարի դերով:

            Իմաստութիւններու հանդէսը օղակ փոխեց եւ մարդիկ սկսան խօսիլ Հայաստանի վարչապետի, իշխանութեան, ընդդիմութեան, պատերազմի, պարտութեան, կուսակցութիւններու, Թուրքիոյ հետ սիրաբանութեան, երեք եկեղեցիներու եւ աղանդներու մասին: Աթանաս երջանիկ էր: Իւրաքանչիւրի խօսքէն ետք կը կրկնէր. «ճիշդ չէ, յստակացո՛ւր»:

            Երիտասարդ մը քանի մը անգամ խօսեցաւ: Ուշադրութեամբ կը լսէինք: Աթանաս այս անգամ «ճիշդ է, ճիշդ չէ» չկրցաւ ըսել, բայց յիշեցնելու համար իր ներկայութիւնը, երիտասարդին դիտողութիւն ըրաւ, որ ան պէտք է «իր հայերէնը սրբագրէ, հոլովները յարգէ, օտար բառեր չգործածէ»:

            Մինչ այդ լուռ մնացած Կեդրոնականցին խօսքը Աթանասին ուղղելով ըսաւ. «Սուս եղի՛ր, ժամ մըն է տիւտիւկութիւն կ’ընես, ըսելիք բան մը ունիս, ըսէ՛: Երիտասարդը մի՛ խանգարեր: Փոխանակ համրիչ շրխկացնելով «տիւտիւկութիւն» ընելու, դրամներդ արդուկելով պահելու, թող հայերէն սորվեցնէիր: «Տիւտիւկութեամբ» մի՛ խանգարեր»: Երիտասա՛րդ, խնդրեմ, շարունակէ՛ բան մը սորվինք»:

            Թաղային ակադեմեան ծափահարեց:

            «Տիւտիւկ» Աթանա սուսիկ-փուսիկ հեռացաւ: Ոչ ոք ըսաւ, «Մի՛ երթար, նստի՛ր, պարոն Աթանաս»:

            Քանի մը շաբաթ ետք կրկին նոյն սրճարանն էինք Արմենակին հետ: Սպասեակը քմծիծաղով ըսաւ.

            – Տիւտիւկ ըլլալէ ետք Աթանաս այլեւս սրճարան չի գար: Եթէ կ’ուզէք զինք տեսնել, թուրքերու սրճարանը գացէ՛ք: Հոն հիմա իր թրքերէնը կը կատարելագործէ, որպէսզի Հայաստանի ապագայ թուրք տուրիստներուն հետ հիւրընկալ հայերը սխալ չխօսին:

            Երբ փողոցն էինք, Կեդրոնականցին տրտմութեամբ ըսաւ.

            – Մակա՛ր, գիտես, բոլոր «տիւտիւկ»-ները կը նմանին կուշտ ջորիի: Ամուլ են:

 

Մակար ի Գաղիա, 30 Դեկտեմբեր 2021

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %
Previous post ՏԱԿԼԸՍԹԸՆ․- ԳԵՐՇ․ Տ․ ԱՆՈՒՇԱՒԱՆ ԱՐՔ․ ԴԱՆԻԷԼԵԱՆ ՄԱՍՆԱԿՑԵՑԱՒ ՍՈՒՐԲ ՍՏԵՓԱՆՈՍԻ ՏՕՆԻ ԱՐԱՐԱՐՈՂՈՒԹԵԱՆ 
Next post ՔԱՂԱՔԱԿԱՆ ԱՇԽԱՐՀԸ «ՃԻՇԴ ԿԱՐԴԱԼՈՒ» ՀՄՏՈՒԹԻՒՆԸ

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles