ՏԻԳՐԱՆԱԿԵՐՏԻ ՍՈՒՐԲ ԿԻՐԱԿՈՍ ԵԿԵՂԵՑՒՈՅ ՄԷՋ ՍՈՒՐԲ ԶԱՏԿՈՒԱՆ ՀԱՒԱՔ

ՊՈԼԻՍ, “Մարմարա“. Տիգրանակերտի Սուրբ Կիրակոս եկեղեցւոյ մէջ Կիրակի, Մարտ 31ին, Սուրբ Զատկուան առիթով հաւաք մը տեղի ունեցաւ, առանց պատարագի մատուցման:
Ներկաները աղօթքէն ետք կատարեցին Զատկուան հաւկթախաղ եւ զիրար շնորհաւորեցին‘ համտեսելով նաեւ Զատիկի խմորեղէններ:
Թրքական “Տողան“ լրատու գործակալութիւնը կը գրէ, թէ հաւատացեալները իրենց ջանքերով եւ հայոց լեզուի ուսուցիչ Գէորգ Ֆիքրիի օգնութեամբ իրականացուցած են սոյն հաւաքը:
Նշենք, որ 1400 անձ ընդունելու կարելիութիւն ունեցող Սուրբ Կիրակոս եկեղեցին կառուցուած է 1376ին: Մերձաւոր Արեւելքի ամենամեծը հանդիսացող սոյն եկեղեցւոյ զանգակատունը 1913ին քանդուած էր կայծակի մը հարուածէն, որմէ ետք տեղւոյն հայերը նոր զանգակատուն կառուցեցին` զանգը ձուլելով ոսկիի եւ պղինձի խառնուրդէ մը: 1914ին, թուրքերը թնդանօթով քանդեցին զանգակատունը, պարզապէս, որովհետեւ անիկա աւելի բարձր էր շրջակայքի մզկիթներու մինարեթներէն: Սուրբ Կիրակոս եկեղեցին 1980էն ի վեր լքուած էր բախտի քմահաճոյքին: Ուստի, Պոլսոյ մէջ ապրող տիգրանակերտցի հայերը միասնաբար ստեղծեցին Սուրբ Կիրակոս հիմնադրամը` վերանորոգելու համար եկեղեցին: Վերանորոգման ծախսերու եօթանասուն տոկոսը ապահովեց սոյն հիմնադրամը, իսկ մնացեալը` քաղաքապետարանը:
“Ռատիքալ“ թերթը կը գրէ, թէ Սուրբ Զատկուան օրը հաւատացեալներ Ս. Կիրակոս եկեղեցին հաւաքուեցան, բայց հոգեւորականի չգոյութեան պատճառաւ` արարողութիւն չկատարուեցաւ: Թաղային խորհուրդի անդամներէն Գէորգ Չալըշ յայտնած է, թէ հոգեւորականի պակասի պատճառով արարողութիւն չէ կատարուած ու ներկաները բաւարարուած են աղօթքով եւ մոմ վառելով` միաժամանակ յոյս յայտնելով, որ յառաջիկայ տարի արարողութիւն կը կատարուի: Չալըշ նաեւ ըսած է, թէ մօտաւորապէս 50 տարուան ընդհատումէ մը ետք, անցեալ տարի Զատիկի արարողութիւն կատարուած էր այս եկեղեցւոյ մէջ:
“Անցեալ տարի զանգակ չունէինք, այս տարի այդ ալ ունեցանք“, ըսած է ան աւելցնելով.“Շէնքը շինուեցաւ, բայց ոգին դեռ կը պակսի“: Ան յոյս յայտնած է, որ “յառաջիկայ տարի կացութիւնը աւելի լաւ կ՛ըլլայ, որովհետեւ երկիրը կ՛երթայ դէպի ժողովրդավարութիւն, եւ լաւ բաներ կը պատահին երկրին մէջ: Այս աշխարհագրութեան մէջ մարդիկ կը ցանկան ապրիլ խաղաղութեամբ“:
Պոլսոյ Հայոց պատրիարքարանը չէ կրցած հոգեւորական մը ուղարկել` Սուրբ Պատարագ իրականացնելու համար, սակայն խոստացած է մէկ շաբաթ ետք հոգեւորական մը ղրկել: Չալըշ նշած է, որ Պոլսոյ բոլոր եկեղեցիները հոգեւորականներ ունին, սակայն Սուրբ Կիրակոսը ցարդ մնայուն հոգեւորական չունի: Ան նաեւ շեշտած է, թէ ասիկա առաջին անգամն է, որ Ս. Զատիկը կը նշուի ամբողջովին վերանորոգուած համալիրին մէջ:

ան