0
0
Ռէյիսեանի համաձայն, առաւել վտանգաւոր են այն շրջանները, ուր տեղակայուած են արձակազէնները: Անոնց փամփուշտները կրնան վնաս հասցնել, բայց մարդիկ կը զգուշանան եւ կը խուսափին այդ փողոցներուն մէջ երթեւեկելէ: Հալէպի մէջ առկայ ջուրը հետզհետէ դարձած է անգտանելի, նաեւ պարբերաբար կ՛ընդհատուի ելեկտրականութիւնը: Աշխատանք տարուած է որ ջրամատակարարումը վերականգնուի, նաեւ ելեկտրականութիւնը:
Բերիոյ Թեմի Ազգային Առաջնորդարանի բանբերը նշեց թէ, հայկական դպրոցները կը շարունակեն փակ մնալ, հակառակ անոր որ դպրոցներու տնօրէնները եւ ուսուցիչները արդէն կազմակերպչական աշխատանքներ կը տանին: Յատուկ աւարտական դասարաններուն համար, որոնք համալսարան մտնելու սեմին կը գտնուին, աւելի ապահով վայրերու մէջ արդէն դասընթացքներ կը տրուին: Ռէյիսեան կը վստահեցնէ, որ անախորժ անակնկալներ եւ նորանոր բարդութիւններ չարձանագրուելու պարագային Հոկտեմբերի սկիզբը հայկական դպրոցները բանան իրենց դռները: Մինչ այդ իրենց դռները բացած են միայն “Լազար Նաճարեան“, “Գալուստ Կիւլպէնկեան“, “Կրթասիրաց“ եւ “Բեթէլ“ վարժարանները, իսկ մնացեալ կրթօճախները ցնոր տնօրինում կը մնան փակ:
Ազգային “Քարէն Եփփէ“ Ճեմարանի տարածքը տակաւին կը նկատուի վտանգաւոր գօտի: Այդ պատճառով յատուկ դասաւորում մը կատարուած է 12րդ կարգի աշակերտներուն համար, որոնց համար վերամուտը սկսած են այլ ապահով կեդրոնի մը մէջ:
Տնտեսական ծանր իրավիճակ ստեղծուած է, բազմաթիւ հաստատութիւններ փակուած են եւ անգործներուն թիւը բարձրացած է: Ռէյիսեան կը շեշտէ թէ վնասներ կրած են եկեղեցիներ, մզկիթներ, կառոյցներ, որոնց վերաշինութեան մասին խօսիլը դեռ շուտ է:
Անդրադառնալով այլ շրջաններու մասին, կացութիւնը նոյնը չէ Դամասկոսի, Գամիշլիի, Քեսապի եւ Լաթաքիոյ մէջ, ուր հայկական վարժարանները արդէն սկսած են գործելու: Նկատի առնելով, որ համեմատաբար իրավիճակը աւելի խաղաղ է, բացած են հայ աշակերտութեան դիմաց: Նշենք, թէ Սուրիոյ տարածքին կան մօտ 38 հայկական ամէնօրեայ եւ կիրակնօրեայ վարժարաններ:
