0
0
Ռումանահայ մշակութային հարուստ ժառանգութեան նուիրուած ձեռնարկներու ծիրէն ներս, կազմակերպութեամբ Հայաստանի եւ Ռումանիոյ մշակոյթի նախարարութիւններուն, Հայաստանի դեսպանութեան եւ ռումանական ակադեմիային, աջակցութեամբ Ռումանիոյ Հայոց միութեան եւ ռումանահայոց թեմին, Հոկտեմբեր 30-ին, Պուքրէշի մէջ Ռումանիոյ Ազգային գրադարանի մեծ սրահին մէջ տեղի ունեցաւ ռումանահայ մշակութային ժառանգութեան նուիրուած միջազգային գիտաժողովի բացում: Գիտաժողովին բացումը կատարեցին Ռումանիոյ մշակոյթի նախարար Տանիէլ Պարպու եւ Հայաստանի դեսպան Համլէթ Գասպարեան: Ողջոյնի խօսքերով հանդէս եկան Ռումանիոյ կառավարութեան անդամներ եւ բարձրաստիճան պաշտօնեաներ, Ռումանիոյ Հայոց թեմի առաջնորդ Տաթեւ եպս. Յակոբեան եւ Ռումանիոյ Հայոց միութեան նախագահ Վարուժան Ոսկանեան:
Գիտաժողովի զեկուցումները ընդգրկեցին ռումանահայոց պատմութեան, հոգեւոր եւ մշակութային ժառանգութեան հարցեր, որոնց վերաբերեալ հաղորդումներով հանդէս եկան Ռումանական ակադեմիայի անդամներ, Հայաստանի Գ.Ա.Ա. պատմութեան եւ գրականութեան բաժանմունքներու, Հայաստանի Ազգային գրադարանի, Երեւանի Մատենադարանի, Պուքրէշի, Եաշի, Քլուժի, Կալացի շարք մը ակադեմիաներու համալսարաններու, Լվովի եւ Քրամթորսքի (Ուքրայինա), Լայփցիկի (Գերմանիա) եւ Ֆրանսայի գիտահետազօտական հիմնարկներու հեղինակաւոր գիտաշխատողներ եւ հայագէտներ:
Նշենք թէ Հոկտեմբեր 17-ին Պուքրէշի մէջ “ճազ“ային կատարումներով հանդէս եկաւ տաղանդաւոր դաշնակահար Տիգրան Համասեան: Համոյթը կազմակերպուած էր հովանաւորութեամբ Ռումանիոյ Հայաստանի դեսպանութեան: Յայտագիրը կ՛ընդգրկէր Կոմիտասի ստեղծագործութիւններէն կտորներ: Նաեւ, ելոյթ ունեցաւ այլ դաշնակահար մը` Հերի Դաւիթեան:
