ՈՉ ԵՒՍ Է ՄԱԷՍԹՐՕ ՂԱՐԱԲԵԿԵԱՆ

0 0
Read Time:1 Minute, 29 Second

Aram_Gharabekian1

Յունուար 11-ին, Լոս Անճելըսի մէջ, յանկարծամահ եղաւ անուանի խմբավար Արամ Ղարաբեկեանը, որ շարունակ տասնեւերկու տարի, մինչեւ 2009 թուական, գլխաւորած էր Հայաստանի պետական կամերային նուագախումբը:  Հ.Հ. արուեստի վաստակաւոր գործիչ` Ղարաբեկեան արժանացած էր “Մովսէս Խորենացի“ մետալին:

Ծնած Իրան` 1955ին, ան ուսումը ստացած էր Պոսթընի “Նիւ Ինկլընտ“ երաժշտանոցէն ներս, ապա շարունակած էր իր մասնագիտութիւնը, Գերմանիոյ Մայնց քաղաքի երաժշտանոցէն ներս: Ղարաբեկեան 1983ին հիմնած էր Պոսթընի “Սինֆոնովա“ նուագախումբը, որուն ղեկավարն էր  մինչեւ 1991:

Ան ղեկավարած էր բազմաթիւ նուագախումբեր` Չինաստանի, Խրուաթիոյ, Ուքրայինայի եւ Գերմանիոյ մէջ:

 

Արամ Ղարաբեկեան ղեկավարն էր “Բաց երաժշտութեան ընկերակցութիւն՛՛ հիմնարկին: Սեպտեմբեր 2012-ին, ան հրաւիրուած էր պատրաստելու արուեստի իւրայատուկ ներկայացում մը, Լոս Անճելըսի միջազգային օդակայանին մէջ տեղի ունենալիք “Ինտեւըր“ անջրպետանաւը դիմաւորելու արարողութեան ընթացքին:Raffi Hadidian

“Բաց երաժշտութեան ընկերակցութիւն“ հիմնարկէն աւելի քան երեսուն արուեստագէտներ  մասնակցած էին այս ներկայացման պատրաստութեան, մօտէն գործակցելով Գալիֆորնիոյ գիտութեան կեդրոնին հետ, որ հիւրընկալեց անջրպետանաւը:

Ղարաբեկեանի կողքին, ներկայացման խմբակին գլխաւոր անդամներն էին` Այտա Ամիրխանեան, Ալինի Քութունեան, Քիթ Տիքսըն, Մարք Մարտոյեան, Ռաֆֆի Կանումեան, Արսինէ Շիրվանեան եւ Վարանդ Գիւրճեան:

Դիմաւորման արարողութիւնը կազմակերպողներուն համաձայն` մօտաւորապէս երեք հարիւր պաշտօնատարներ հրաւիրուած էին դիմաւորման հանդիսութեան, որ տեղի ունեցաւ միջազգային լրատուական գործակալութեանց լուսարձակներուն տակ:

Հոկտեմբեր 2008-ին, Արամ Ղարաբեկեանի ղեկավարութեամբ,  Հայաստանի սենեկային նուագախումբը անմոռանալի ելոյթներ ունեցաւ, Արցախի մէջ կատարուած դասական երաժշտութեան փառատօնին:

Այս ծրագրի իրագործման նախագիծը կը պատկանէր մաէսթրօ  Ղարաբեկեանին, որովհետեւ ան, շարունակ կը շեշտէր թէ, համոզուած է, որ Արցախը պէտք է դառնայ հայութեան հոգեւոր կեդրոնը, իսկ հինաւուրց Շուշին` հայ մշակոյթի քաղաք:

“Արցախցիների մէջ առանձնայատուկ կորով կայ: Ես դա հէնց առաջին համերգից եմ զգացել: Այստեղ ես ինձ շատ հարազատ եմ զգում: Այդ պատճառով ես այստեղ գալիս եմ նաեւ առանց նուագախմբի, պարզապէս որպէս հայ մարդ: Արցախի ամէն ինչն եմ սիրում` բնութիւնը, մարդկանց… Մեր գործունէութեան տասը տարուայ ընթացքում մենք եօթը անգամ Արցախ ենք եկել: Յոյսով եմ, որ Արցախեան փառատօնը կ’ընդլայնի իր շրջանակները` իր մէջ աւելի ու աւելի շատ ներքաշելով հռչակուած երաժիշտների, խմբերի“, կը նշէր Ղարաբեկեան:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles