Նիւ Հեմշիրի Ներկայացուցիչներու Տունը Մերժեց Ազերի-Ամերիկեան Համագործակցութեան Բանաձեւը

0 0
Read Time:1 Minute, 14 Second

NH

ՔՈՆՔՈՐՏ.- Արեւելեան Ամերիկայի Հայ Դատի յանձնախումբը կը տեղեկացնէ, թէ ատրպէյճանական լոպին անգամ մը եւս ձախողած է հակահայ քարոզչական արշաւին մէջ, երբ Նիւ Հեմշիր նահանգի Ներկայացուցիչներու Տունը, Փետրուար 11ին մերժած է Ատրպէյճանի կողմէ առաջարկուած բանաձեւ մը՝ Արցախի ազատութեան դէմ:
Հայ Դատի յանձնախումբը դիմած էր օրէնսդիրներուն, որպէսզի մերժեն բանաձեւը: Ձախողութիւնը ապահովելու աշխատանքին մէջ մեծ ջանք տարած էր նահանգի Ներկայացուցիչներու տան անդամ Հերի Ազարեանը՝ իր պաշտօնակիցներուն ներկայացնելով Պաքուի բռնարարքները։
Միացեալ Նահանգներու մօտ Արցախի Հանրապետութեան մշտական ներկայացուցիչ Ռոպերթ Աւետիսեան, այս գծով իր գոհունակութիւնը յայտնեց եւ ըսաւ թէ ցաւալի է, որ ատրպէյճանական վարչակազմը հայերու հանդէպ ատելութիւն տարածելու նպատակով կը շարունակէ իր ապատեղեկատուութեան արշաւը Ամերիկայի տարածքին՝ պատմութիւնը աղաւաղելով եւ Արցախի դէմ իր բռնարարքներու պատասխանատուութենէն խուսափիլ փորձելով:
«Մենք շնորհակալ ենք Արեւելեան Ամերիկայի Հայ Դատի յանձնախումբի՝ այս շրջանին մէջ գործող խումբին եւ Նիւ Հեմշիրի ողջ հայութեան, պատմական փաստերը նահանգի օրէնսդիր մարմինին ներկայացնելու նպատակով արագ եւ համակարգուած ջանքեր գործադրելնուն համար», եզրակացուց Ռոպերթ Աւետիսեան:
Արեւելեան Ամերիկայի Հայ Դատի յանձնախումբի վարչութեան ատենապետ Սթիւ Մեսրոպեան, իր կարգին խօսք առնելով, նշեց թէ Նիւ Հեմշիրի Ներկայացուցիչներու տունը արդարացուց իր «Ազատ ապրէ կամ մեռիր» կարգախօսը՝ մերժելով ենթարկուիլ Ալիեւի միջազգային հակաքարոզչական արշաւին, որուն նպատակն է Արցախի ինքնորոշման իրաւունքը ոտնակոխել: «Ուրախ ենք, որ Նիւ Հեմշիրը միացաւ Քոլորատոյին, Միսիսիփիին, Հարաւային Տաքոթային, Թենըսիին, Հաուայիին եւ Ուայոմինկին՝ մերժելով օժանդակել Ատրպէյճանի իշխանութիւններուն», եզրակացուց Մեսրոպեան:
Նշենք թէ, աւելի քան շաբաթ մը առաջ Ամերիկայի Միացեալ Նահանգներու Հայ Դատի Յանձնախումբը կը հաղորդէ թէ Քոլորատօ նահանգի Ծերակոյտը մերժած է քննել հակասական ու խնդրայարոյց բանաձեւ մը, Resolution SJR 15-006 անուանումով, որ կ՚անդրադառնար ազերի-ամերիկեան համագործակցութեան ամրապնդման նպաստող քայլերու եւ ծրագիրներու:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles