Նիւ Եորք.- ԱՌԱՋՆՈՐԴ ՍՐԲԱԶԱՆ ԳԵՐՇ. Տ. ԱՆՈՒՇԱՒԱՆ ԱՐՔ. ԴԱՆԻԷԼԵԱՆ ՄԱՍՆԱԿՑԵՑԱՒ «ՀԱՄԱԶԳԱՅԻՆ»-Ի ՀԱՆԳԱՆԱԿՈՒԹԵԱՆ՝ ՄԱՅՐ ԵԿԵՂԵՑՒՈՅ ՄԷՋ

0 0
Read Time:1 Minute, 44 Second

ՆԻՒ ԵՈՐՔ․- Կիրակի Մարտ 13-ին, Ա․Մ․Ն․ Արեւելեան թեմի բարեջան Առաջնորդ՝ Գերշ. Տ. Անուշաւան Արքեպիսկոպոս Դանիէլեան, մասնակցեցաւ սուրբ եւ անմահ Պատարագին ու քարոզեց Սուրբ Լուսաւորիչ Մայր Եկեղեցւոյ մէջ։ Յաւարտ Սուրբ Պատարագին, «Բաշալեան» սրահին մէջ Սրբազան Հայրը նախագահեց Արցախի եւ Լիբանանի հայ ուսանողներուն համար «Համազգային»-ի մեծ ընտանիքին կողմէ կազմակերպուած հանգանակութեան, որմէ գոյացաւ 25 հազար տոլարի գումար մը։

Եկեղեցւոյ հոգեւոր հովիւ՝ Արժպ. Տ. Մեսրոպ Քհն. Լագիսեան, բարի գալուստ մաղթելէ ետք ներկաներուն, սրտի խոր գոհունակութեամբ յայտնեց, թէ պսակաձեւ ժահրի ստեղծած տագնապէն ետք այս առաջին ձեռնարկով, Մայր Եկեղեցին իր բնականոն կեանքին կը սկսէր։ Այնուհետեւ հրաւիրեց Լալիկ Վարդանեանը («Համազգային», Նիւ Եորք), Մարիա Ապրիմեանը (Հ․Օ․Մ․-ի Նիւ Եորքի «Մայր» մասնաճիւղ), Դրօ Թիւրպէնտեանը (Հ․Յ․Դ․-ի Նիւ Եորքի «Արմէն Գարօ» կոմիտէ), Արեւիկ Գաբրիէլեան («Համազգային»-ի արեւելեան շրջանի ատենապետուհի) եւ Անի Չաղլասեանը (Հ․Յ․Դ․-ի արեւելեան շրջանի Կեդրոնական Կոմիտէ) որպէսզի իրենց սրտի խօսքը ուղղեն։ Չաղլասեան այցելած ըլլալով հայրենիք, սահիկներով համապարփակ կերպով ներկայացուց Արցախի կեանքը։

Առաջնորդ Սրբազան Հայրը խօսք առնելով, բարձր գնահատեց «Համազգային»-ի Կեդրոնական Վարչութեան կազմակերպած այս ազգաշէն արշաւը։ Յայտնեց, թէ «Համազգային», որպէս մշակութային միութեան մը անունը, նաեւ մտածողութեան մը ուղղութիւնը կը պատգամէ։ Սրբազան Հայրը, բացատրելով իր խօսքը, ըսաւ․ «Ոմանց համար հայ ժողովուրդը իր գոյութեամբ եւ երազներով կ՛ըմբռնուի Երեւանի շրջակայքով, առաւելագոյնը՝ մկրատուած Հայաստանով, իսկ ուրիշներու համար Քալիֆորնիայէն Արցախ եւ Արցախէն մինչեւ Աւստրալիա։ Ահա, այս մեծ պատկերով՝ որպէս «Համազգային»-ի տեսլականով տոգորուած եւ գործող հայորդիներ կ՛ողջունեմ ձեր բոլորին ներկայութիւնը, որ վստահաբար պիտի ալիքաւորուի ի խնդիր Սփիւռքի հզօրացման եւ հայրենիքի զօրակցութեան»։ Սրբազան Հայրը օրուան բանախօս՝ Անի Չաղլասեանի այնքան դիպուկ մէկ խօսքին մէջբերումը կատարեց, թէ երբ հարց կը տրուէր արցախցի տասը տարեկան մանուկի մը, որ կը պարէր դպրոցի բակը, թէ չէ՞ր վախնար, մինչ հանդիպակաց լեռը թշնամիին կողմէ գրաւուած էր եւ շրջակայքը՝ օրն ի բուն խիստ հսկողութեան տակ, մանչուկը կը պատասխանէ Արցախի բարբառով․ «Գիտեմ որ կը նային, բայց թող գիտնան որ մենք կոտրուած չենք»։ Այս խորիմաստ արտայայտութեամբ, Սրբազան Հայրը եզրափակեց իր խօսքը, ըսելով «Արցախի հողի հարազատ ծնունդ եղող այս մանչուկին խօսքը ո՛չ միայն մեզ, այլ համայն հայութիւնը պէտք է զօրաշարժի ենթարկէ հաւատալու եւ յուսալու Սփիւռքի եւ Հայրենիքի մեր ժողովուրդի անսասան երթին, եւ արդար իրաւունքներու պաշտպանման ու տիրացման»։

 

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %
Previous post ՏԱՐԱԾՔԱՅԻՆ ԻՐԱՒՈ՛ՒՆՔ ԵՒ ՊԱՀԱ՛ՆՋՔ
Next post ՀԱՅՐԵՆԱԴԱՐՁՈՒԹԻՒՆ-ԲՆԱԿԵՑՈՒՄ ԻՆՉՈ՞Ւ ՀԻՄՆԱԿԱՆ ԱՌԱՋԱԴՐԱՆՔ ՉԵՆ ԵՂԱԾ ԵՒ ՉԵՆ

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles