ՆԻՒ ԵՈՐՔԻ Հ.Օ.Մ.Ի “ՄԱՅՐ“ ՄԱՍՆԱՃԻՒՂԻ ՄԱՅՐԵՐՈՒ ՕՐԸ

0 0
Read Time:2 Minute, 41 Second

???????????????????????????????  Մ. ՇԱՄԼԵԱՆ-ԵՓՐԵՄԵԱՆ

Ամէն տարի բնութեան ծաղկումին հետ կը տօնախմբենք մայրերու օրը: Նիւ Եորքի Հայ Օգնութեան Միութեան “Մայր“ մասնաճիւղը, նշեց աւանդութիւն դարձած այս տօնը, Ուրբաթ, Մայիս 9ին, Ուտսայտի Հայ Կեդրոնէն ներս: Ճաշկերոյթին ներկայ էին՝ Սուրբ Լուսաւորիչ Մայր Եկեղեցւոյ հովիւ՝ Տէր Մեսրոպ Քհնյ. Լագիսեան, Հ.Յ.Դ “Արմէն Գարօ“ կոմիտէութեան ներկայացուցիչ՝ Վալոտ Աթախանեան, Հ.Օ.Մ.ի Արեւելեան շրջանի Շրջանային Վարչութեան անդամ եւ Մ.Ա.Կ.ի ներկայացուցիչ՝ Վալանթին Պէրպէրեան, Հ.Օ.Մ.ի “Էրէբունի“ մասնաճիւղի ատենապետուհի Նայիրի Զօհրապեան եւ այլ հիւրեր։
“Մայր“ մասնաճիւղի ատենապետուհի Անայիս Չօլաքեան

Անայիս Չօլաքեան
Անայիս Չօլաքեան

բարի գալուստ մաղթեց ներկաներուն, շնորհաւորեց մայրերու տօնը եւ հետեւեալը ըսաւ իր բացման Խօսքին մէջ. “Սիրելիներ Հայ Օգնութեան Միութեան “Մայր“ մասնաճիւղի Վարչութիւնը կ`ողջունէ եւ կը շնորհաւորէ բոլոր ներկայ Հայ մայրերը։ Հ.Օ.Մ.ը հիմնուած է յստակ նպատակներու համար: Հ.Օ.Մ.ի կազմութեան եւ գործունէութեան մղիչ ոյժը հայ ժողովուրդի ազնիւ նկարագրի յատկութիւններն են: Ծառայութեան, օգնութեան, անսակարկ նուիրումի, եւ մարդասիրութեան առաքինութիւնները մաս կը կազմեն Հ.Օ.Մ.ին: Մայրական գորովը սէրն ու գգուանքը կը ճառագայթին Հ.Օ.Մ.ի անդամուհիներէն:
Հայ ժողովուրդի անզուգական Միութիւնն է Հ.Օ.Մ.ը՝ որու հանդէպ հպարտութեան զգացումներ ունեցած են բոլոր սերունդները Սփիւռքի և Հայրենիքի մէջ“: Ան յիշեցուց նաեւ թէ՝ Մայիս 9ը կը զուգադիպէր նաեւ Շուշիի ազատագրման, որուն հետ կապուած են Հայ ժողովուրդի նորագոյն պատմութեան ամենէն պանծալի էջերը, հայ ժողովուրդին յաղթանակը:
Ապա բեմ հրաւիրուեցաւ մասնաճիւղի
ատենադպրուհի՝ Մարիա Եփրեմեանը, փոխանցելու Հ.Օ.Մ.ի խօսքը: Ան Հ.Օ.Մ.ի հակիրճ պատմականը ներկայացնելէն ետք, նշեց որ Հ.Օ.Մ.ը միշտ օգնութեան հասած է հայ եւ ոչ հայ կարիքաւորներուն ։ “Հ.Օ.Մ.ը իր մասնակցութիւնը բերած է Հայաստանի վերանկախացումէն ետք թէ՛ Արցախի եւ թէ՛ Հայաստանի մէջ: Ներկայիս Հ.Օ.Մ.ը կը շարունակէ օժանդակել Սուրիահայութեան: Յիշենք որ Արեւելեան Շրջանայինի 93 րդ Պատգամաւորական Ժողովի ընթացքին կէս ժամուայ ընթացքին 17.750 տոլար հաւաքուած էր ի նպաստ Սուրիահայութեան որը օգտագործուեցաւ վառելանիւթի եւ հայկական վարժարաններուն համար:

Մարիա Եփրեմեան
Մարիա Եփրեմեան

Ան իր խօսքը աւարտեց “մաղթելով Հ.Օ.Մ.ին կենսունակութիւն: Շնորհակալութիւն յայտնեց բոլոր անոնց, որոնք իրենց լուման ի սպաս կը դնեն բարի ու ազգօգուտ նպատակներու“, ըսաւ ան։
Ապա Տէր Մեսրոպ Քհնյ. Լագիսեան օրհնեց սեղանները։ Ան շնորհաւորեց բոլոր մայրերուն տօնը եւ աղօթեց բոլոր Մայրերուն համար որոնք հեռացած են մեզմէ, ըսելով. “Աստուած բոլոր ննջեցեալ մայրերուն հոգիները լուսաւորէ եւ երկինքի արքայութեան արժանացնէ“։
Ճաշերը սպասարկուեցան մեղմ հայկական նուագներու ընկերակցութեամբ Խաժակի: Նշելի է նաեւ սրահի եւ սեղաններու գեղեցիկ զարդարանքն ու համեղ ճաշերու պատրաստութիւնը, որուն պատասխանատուն էր մասնաճիւղի ընկերուհիներէն՝ Թաթիանա Քէրէսթէճեան:
Բոլոր ներկաները մեծ գոհունակութեամբ վայելեցին այդ համեղ ճաշերը, ընտանեկան մտերմիկ մթնոլորտի մէջ։
Յայտագրի յաջորդ բաժինը ճոխացուց “Աղթամար“ պարախումբը ներկայացնելով փունջ մը պարեր ղեկավարութեամբ պարուսոյց Սիլվա ԳանթարճեանԱսատուրեանի։ Պարողները հանդիսատեսներու խանդավառ ծափերու կշռոյթով շարունակեցին պարել։ Իրենց վերջին պարը Արցախի պարն էր, որուն ընթացքին եռագոյն թաշկինակներ բարձրաձուցին, ի յիշատակ հայ ժողովուրդի յաղթանակին: Ներկաներու բուռն փափաքին ընդառաջելով խումբը կրկնեց այս պարը։
Ձեռնարկի աւարտին տեղի ունեցաւ վիճակահանութիւն որը վարեց Հուրի Կէօտէլէքեան: Իրեն ընկերակցեցաւ Անահիտ Ուղուրլայեան։ Բախտաւորները ստացան գեղեցիկ նուէրներ որոնք նուիրուած էին անհատներու եւ “Մայր“ մասնաճիւղի ընկերուհիներուն կողմէ։
Ընկհ.Անայիս փակեց ձեռնարկը շնորհակալութիւն յայտնելով Խաժակին, “Աղթամար“ պարախումբին եւ ներկաներուն, որ քաջալերեցին Հ.Օ.Մ.ը: Շնորհակալութիւն յայտնեց նաեւ վարչական կազմին եւ բոլոր ընկերուհիներուն իրենց տարած աշխատանքին համար: Թող Աստուած միշտ ամուր ու կենսունակ պահէ Հայ մայրը եւ Հայ Օգնութեան Միութիւնը։

 

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles