Հ.Յ.Դ.-ի Սահմանադրական Հանրաքուէի Քարոզարշաւ

0 0
Read Time:2 Minute, 36 Second

p5 left1
ԵՐԵՒԱՆ.- Անցեալ շաբաթավերջին, ազդանշանը տրուեցաւ Հ.Յ.Դ.-ի սահմանադրական հանրաքուէի քարոզարշաւին: Արդարեւ, Կոտայքի մարզի Չարենցաւան քաղաք ժամանեցին Հ.Յ.Դ. Հայաստանի Գերագոյն մարմինի ներկայացուցիչ, Ազգային ժողովի Հ.Յ.Դ. խմբակցութեան քարտուղար Աղուան Վարդանեան, եւ Հայաստանի Գերագոյն Մարմինի անդամներ՝ Լիլիթ Գալստեան եւ Պետրոս Մեղրեան, որոնք հանդիպեցան տեղացիներուն հետ:
Աղուան Վարդանեանը, խօսելով Հ.Յ.Դ.-ի` առանձին իրականացուող քարոզչութեան մասին, նշեց, որ մարզային հանդիպումներու ծիրին մէջ Չարենցաւանի մէջ հանդիպումը առաջինն է:
Անդրադառնալով սահմանադրական փոփոխութիւններուն մասին` Աղուան Վարդանեան նշեց, որ սահմանադրութիւնը այն փաստաթուղթն է, որուն միջոցով երկիրը պիտի ապրի յառաջիկայ 10-20 տարիներուն` անկախ անկէ` կþընդունուի՞ն սահմանադրական փոփոխութիւնները, թէ՞ ոչ:
«Ուղղակի «ոչ» ըսել սահմանադրական փոփոխութիւններուն, չքննարկելով այդ փոփոխութիւններուն բովանդակութիւնը եւ չհամեմատել նախկինին հետ, կը նշանակէ մասնակից չըլլալ:
«Դաշնակցութիւնը ընդդիմութիւն է, բայց կողմ է սահմանադրական փոփոխութիւններուն, որովհետեւ Դաշնակցութիւնը 20-23 տարի շարունակ անընդհատ ըսած է, որ ճիշդը խորհրդարանական համակարգն է, այլ ոչ թէ նախագահական կամ կիսանախագահական համակարգը: Մենք մեր տեսակէտներն ու սկզբունքները երբեք չենք փոխած»,- ըսաւ ան, որ եզրակացուց թէ, սահմանադրական փոփոխութիւնները կը քննարկուին իշխանութիւն-ընդդիմութիւն շրջագիծին մէջ, այսինքն` եթէ իշխանութիւնը կողմ է սահմանադրական փոփոխութիւններուն, ուրեմն ընդդիմութիւնը անպայման պէտք է դէմ ըլլայ:
Հ.Յ.Դ. Բիւրոյի քաղաքական ներկայացուցիչ, եւ պատգամաւորական խմբակցութեան ղեկավար Արմէն Ռուստամեան այցելեց Արարատի մարզի Մասիս քաղաք: Ան հանդիպելով բնակիչներուն հետ, նշեց, որ Հ.Յ.Դ.-ի տեսակէտը սահմանադրական բարեփոխումներուն վերաբերեալ վաղուց յայտնի է. «Հ.Յ.Դաշնակցութիւնը առաջինն էր, որ կողմ արտայայտուած է խորհրդարանական կառավարման ձեւին: Եթէ սահմանադրութիւնը պարզապէս թուղթի վրայ է, եւ իրագործման մեքանիզմները չեն գործեր, ատիկա մեռած է», ըսաւ ան:
«Մարդիկ կը մտածեն, թէ որքա՛ն մօտիկ ըլլան այդ մարդուն (նախագահին), այնքան աւելի պաշտպանուած կ՛ըլլան: Այստեղ կը գործէ ծանօթի, բարեկամի սկզբունքը: Հայաստանի մէջ միշտ ալ այս վիճակը եղած է: Երեք նախագահ փոխած ենք, այդպէս եղած է», ըսաւ Ռուստամեան եւ ընդգծեց, որ այս բոլորը կառավարման համակարգի արդիւնքով, որովհետեւ կառավարումը անձնակեդրոն դարձած է:
Արմաւիրի մարզին մէջ, Էջմիածինցի ընտրողներուն հետ հանդիպումին ընթացքին Հ.Յ.Դ. Բիւրոյի նախկին անդամ, նախկին նախարար Դաւիթ Լոքեան ներկայացուց գործող սահմանադրութեան թերութիւններն ու նախատեսուող փոփոխութիւնները` մասնաւորապէս կառավարման ձեւը փոխելու անհրաժեշտութիւնը: Լոքեան յայտնեց թէ Հ.Յ.Դ. երբեք չէ փոխած իր սկզբունքը: Ան աւելցուց.- «Այսօր աշխարհի զարգացած երկիրներուն մեծամասնութիւնը խորհրդարանական կառավարման ձեւ ունի, իսկ մեր երկրին մէջ ժամանակը ցոյց տուած է, որ կառավարման կիսանախագահական ձեւը արդիւնաւէտ ձեւով չþաշխատիր: Մենք նախագահը պաշտպանելու խնդիր չունինք, եւ եթէ կան մարդիկ, որոնք կը կարծեն, թէ մենք ինչ որ ակնկալիքներ ունինք, կը սխալին: Եթէ այդպէս ըլլար` ժամանակին չէինք հրաժարեր մեր պաշտօններէն: Մէկ-երկու տարի առաջ, երբ կը բանակցէինք նախագահին հետ, ան չէր ընդուներ խորհրդարանական ձեւը, բայց մենք կրցանք փաստերով համոզել, որ ատիկա լաւագոյն լուծումն է: Շատեր կþըսեն, որ մենք կը պաշտպանենք իշխանութիւններուն առաջարկած սահմանադրութիւնը, բայց մեր կարծիքով` ասիկա Դաշնակցութեան սահմանադրութիւնն է»:
Հ.Յ.Դ. Հայաստանի Գերագոյն մարմինի անդամ Արսէն Համբարձումեան նշեց, որ սահմանադրական բարեփոխումները կ՛ենթադրեն ակնառու փոփոխութիւններ, որոնք ոչ միայն կառավարման ձեւին կը վերաբերին, այլեւ` դատական համակարգին: «Այսօր մենք ունինք փտած դատական համակարգ: Առաջարկուող փոփոխութիւններով կարելի է հասնիլ դատական համակարգի անկախութեան», նշեց Արսէն Համբարձումեան:
Ըստ անոր` միամտութիւն է կարծել, թէ «ոչ» ըսելով` իշխանափոխութիւն տեղի կ՛ունենայ. «ոչ» կը նշանակէ այսօրուան վիճակի ամրագրում, իսկ իշխանափոխութեան կարելի է հասնիլ սահմանադրական փոփոխութիւններէն ետք: Հ.Յ.Դ.-ի անդամ, նախկին պատգամաւոր Ռուզաննա Առաքելեանի խօսքով` առաջարկուող փոփոխութեամբ` երկրի կառավարման պատասխանատուութիւնը կը դրուի գաղափարախօսութիւն կրող կուսակցութիւններուն վրայ:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles