Հալէպի Մէջ Սուրիահայ Օգնութեան Խաչի 95-Ամեակի Նշում

0 0
Read Time:3 Minute, 10 Second

ars syria1 Հովանաւորութեամբ՝ Բերիոյ Հայոց ԹԵմի Բարեջան Առաջնորդ Գերշ․ Տէր Շահան Սրբ․ Արք․ Սարգիսեանի, կազմակերպութեամբ՝ Սուրիոյ Օգնութեան Խաչի Շրջանային Վարչութեան,Կիրակի, Յունուար 4, յետմիջօրէին տեղի ունեցաւ Սուրիահայ Օգնութեան Խաչի հիմնադրութեան 95-ամեակի հանդիսաւոր նշումը, ներկայութեամբ հայ երեք համայնքապետներուն, Պատկան Մարմնին եւ Բերիոյ Հայոց Թեմի Ազգային Վարչութեան ներկայացուցիչներուն, Հ․Օ․Մ․-ի Կեդրոնական Վարչութեան ներկայացուցիչին, հոգեւոր հայրերուն եւ բազմաթիւ խաչուհիներուն։

Օրուան հանդիսավարն էր Հուրի Տէրտէրեան-Տիլպէրեան։
Բացման խօսքով Անի Կարապետեան-Մուրատեան, նշեց, թէ Հայոց Ցեղասպանութեան 100ամեակի սեմին ենք, ցեղասպանութեան երկունքէն ծնունդ առած եւ Հ․Օ․Մ․-ի հաստաբուն կաղնիէն ընձիւղնած Սուրիահայ Օգնութեան Խաչը քաջօրէն կը գիտակցի, թէ ամեակներու նշումը առիթ է միութեան անցեալն ու ներկան քննարկելով նոր մարտահրաւէրներու դիմագրաւման համար նոր լուծումներ որոնելու։
Արաբերէն լեզուով Մարալ Գալայճեան-Սեմերճեան յայտնեց, թէ այսօր Հալէպի մէջ յուզումնախառն ապրումներով կը տօնենք միութեան 100ամեակը, որովհետեւ երկրի տագնապին հետեւանքով միութիւնը դիմագրաւեց բազում դժուարութիւններ, ունեցաւ կորուստներ, նիւթական ահաւոր վնասներ, սակայն իւրաքանչիւր նահատակի ու կորուստի գօտեպնդուեցաւ վճռակամութեամբ եւ վերանորոգեց ժողովուրդին ծառայելու իր ուխտը, յատկապէս տագնապի ծանր օրերուն։
ars syria3Օրուան բանախօս Աւօ Գաթրճեան հակիրճ ակնարկ մը նետեց Սուրիահայ Օգնութեան Խաչի հիմնադրութեան վրայ, սկսելով միութեան կազմաւորման սկզբնաղբիւրէն, հասնելով մինչեւ Ցեղասպանութեան յաջորդող տարիներուն Սուրիոյ մէջ Հայոց Ցեղասպանութենէն ճողոպրած հայորդիներու ծառայութեան կոչուած Սուրիահայ Օգնութեան Խաչի կազմաւորման եւ տարուէ տարի ծաւալող աշխատանքներուն։
Ան իր խօսքին մէջ լուսարձակի տակ առաւ միութեան բազմաբնոյթ աշխատանքները, շեշտելով, որ Սուրիահայ Օգնութեան Խաչը սոսկ որբախնամ, բարեսիրական միութիւն մը չեղաւ, այլ՝ դարձաւ հայատիպ օջախ մը։
Բանախօսը այնուհետեւ նշեց, թէ Սուրիոյ ու մանաւանդ Հալէպ քաղաքին վիճակուած տագնապին մէջ միութիւնը զօրաշարժի ենթարկեց իր ուժերն ու իր մասնաճիւղերու հարիւրաւոր անդամուհիներով նուիրուեցաւ սուրիահայութեան ծառայելու նուիրական գործին։
Այնուհետեւ անդրադարձաւ Հ․Օ․Մ․-ի սուրիահայութեան օժանդակութեան ուղղուած ծրագիրներուն, Ս․Օ․Խ․-ի Հալէպի ընկերաբժշկական կեդրոնի ծառայողական բազմաթիւ աշխատանքներուն։
Եզրափակելով բանախօսը ըսաւ, թէ ամէն գնահատանքէ վեր է Ս․Օ․Խ․-ի ընկերուհիներուն կամաւոր նուիրումը, դիտել տալով, որ յատկապէս Սուրիոյ տագնապալի օրերուն, ան կրեց բազում դժուարութիւններ, կորուստներ, նուազեցաւ անդամուհիներու թիւը, սակայն միշտ պատնէշի վրայ մնաց, հասաւ անկարին, կարիքաւորին ու դարձաւ լոյսի անսպառ աղբիւր։
Հ․Օ․Մ․-ի խօսքը ներկայացուց Կեդրոնական Վարչութեան ներկայացուցիչ Զեփիւռ Է․ Րէյիսեան, որ անդրադարձաւ Հ․Օ․Մ․-ի Հայոց Ցեղասպանութեան 100ամեակի համահայկական տարողութեամբ նշման, գնահատեց Ս․Օ․Խ․-ի աշխատանքը Սուրիոյ մակարդակով, թէ Հ․Օ․Մ․-ի համընդհանուր ծրագիրներու ծիրէն ներս, ապա մանրամասնօրէն անդրադարձաւ Հ․Օ․Մ․-ի սուրիահայութեան օժանդակութեան ուղղուած ծրագիրներուն, որոնք ի կատար ածուած են սուրիահայութեան ծանր բեռը մեղմացնելու նպատակով։ Րէյիսեան նշեց, թէ Հ․Օ․Մ․-ի ծրագիրները լուսարձակի տակ կ՛առնէ ոչ թէ քարոզչական նպատակով, այլ՝ պարզաբանելու տարուած աշխատանքին տարողութիւնը։
Հուսկ Զեփիւռ Է․ Րէյիսեան յայտնեց, թէ այս առիթով Հ․Օ․Մ․-ը յատուկ գնահատագրերով կը մեծարէ Ս․Օ․Խ․-էն ներս 50 տարուան ծառայութիւն ունեցող Հալէպի երեք մասնաճիւղերու վաստակաւոր խաչուհիները։
Ապա խօսք առաւ Ս․Օ․Խ․-ի Շրջ․ Վարչութեան ատենապետուհի Աննա ՏէրՅակոբեան եւ անդրադարձաւ Ս․Օ․Խ․-ի 95ամեայ նպատակասլաց ծառայութեան, յատկապէս լուսարձակի տակ առաւ խաչուհիներու տքնաջան աշխատանքով ու բարերաներու նիւթական ներդրումով քար առ քար կերտուած Ս․Օ․Խ․-ի Հալէպի Ընկերաբժշկական կեդրոնն ու անոր յարկին տակ կատարուած բազմաբնոյթ աշխատանքները, յայտնելով, որ թէեւ կեդրոնը հրթիռակոծումներու հետեւանքով ամայացած ու կիսաքանդ է, անոր տարբեր սարքերը տեղափոխուած են ազգային տարբեր կառոյցներ, այնուամենայնիւ Ս․Օ․Խ․-ի անդամուհիները, որպէս մայրեր եւ արիասիրտ հայուհիներ առանց ընկրկումի եւ յուսալքութեան կը շարունակեն իրենց աշխատանքները՝ հասնելու սուրիահայութեան եւ յատկապէս հալէպահայութեան բազում կարիքներուն։ ars syria2
Այնուհետեւ յիսուն եւ աւելի տարիներու ծառայութիւն ունեցող 17 վաստակաւոր խաչուհիներ Հ․Օ․Մ․-ի Կ․ Վարչութեան կողմէ գնահատագրեր ստացան, ձեռամբ Թեմի Բարեջան Առաջնորդին եւ Հ․Օ․Մ․-ի Կ․Վարչութեան ներկայացուցիչին, ինչպէս նաեւ թեմիս առաջնորդին կողմէ նուիրուած Հայոց Ցեղասպանութեան 100ամեակը խորհրդանշող զարդասեղներ զետեղուեցան անոնց կուրծքերուն։
Օրուան եզրափակիչ պատգամը ներկայացուց Բերիոյ Հայոց ԹԵմի Բարեջան Առաջնորդ Գերշ․ Տէր Շահան Սրբ․ Արք․ ՍԱրգիսեան, որ անդրադառնալով Ս․Օ․Խ.-ի կեդրոնի քանդումին շեշտեց, թէ գաղափարները քարով եւ քարեղէնով չեն պայմանաւորուիր, այլ՝ աշխատանքով եւ նուիրումով։ Սրբազան հայրը բարձրօրէն գնահատեց Ս․Օ․Խ․-ի աշխատանքն ու շնորհաւորեց պարգեւատրուող խաչուհիները։
Գեղարուեստական յայտագիրով ելոյթ ունեցաւ Սիլվա Քէշիշեան-Արսլանեան, մեներգելով «Կարմիր Վալս»-ն ու Սայաթ Նովայի երգերէն փունջ մը, դաշնամուրի ընկերակցութեամբ՝ Կարօ Արսլանեանի։

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles