ԴԻՏԱՐԿԵԼ՝ ԼԱՒԱԳՈՅՆՍ ԳՈՐԾԵԼՈՒ ՀԱՄԱՐ

0 0
Read Time:3 Minute, 16 Second

P11 Angela-Merkel-006ՌՈՊԷՐ ԱՅՏԱՊԻՐԵԱՆ

Գերմանիոյ վարչապետ Մերքել կը սահմանագծէ Եւրոպան՝ Վոսփորէն վեր, Ատլանտեանէն Ուրալ:

“Պատմութեան հեգնանքը. մինչ Ցամաքահանումի ծովափներուն վրայ կը նշենք յաղթանակը Գերմանիոյ դէմ, արդարեւ եօթանասուն տարի ետք, մեր փրկութիւնը անկէ պիտի գայ“ կը գրէ տնտեսագէտ Էրիք Լը Պուշէ, Յունիս 6ի “Լէ զ՛Էքօ“ին մէջ։

Այս տեսակէտը բնականաբար կը բաժնեմ, նկատի ունենալով որ 70ականներուն առիթը ունեցած եմ հաստատելու գերմանական ուժականութիւնը՝ ճարտարարուեստի եւ առեւտրական ոլորտներուն մէջ, շփում ունենալով Շթութկարթի ՀուլէթՓաքարտ գործատան պաշտօնէութեան եւ Եւրոպայի գործի մարդոց հետ, որոնք ներկայ էին եւրոպական բոլոր մեծ օդակայաններուն մէջ։
Արդարեւ 1970ին էր, որ իմացանք այն սփոփիչ լուրը, թէ Գերմանիոյ սոցիալդեմոկրատական վարչապետ Ուիլի Պրանթ (19691973) ստորագրած է գերմանասովետական եւ գերմանալեհական համաձայնագրերը եւ թէ ծնրադրած է Վարշաւայի կէթթոյի յուշարձանին առջեւ։ Եւրոպական սահմաններու անբռնաբարելիութեան եւ Պերլինի կարգավիճակին քառամասն բնոյթի ճանաչումի այս խելացի եւ հետեւողական դիւանագիտութիւնը թոյլ տուաւ, որ միջազգային յարաբերութիւնները իրենց լարւած վիճակէն դուրս գան եւ հեռանայ երկու գեր ուժերու միջեւ (Միացեալ Նահանգներ եւ Խորհրդային Միութիւն) հիւլէական պատերազմի սպառնալիքը, որ կը սաւառնէր մեր գլուխներուն վրայ։ Արեւելաեւրոպական այս նոր քաղաքականութիւնը՝ Օսթփոլիթիքը Հէլմութ Քոհլին թոյլ տուաւ բանակցութիւններու (եւ քանի մը միլիառ տէօյչէ մառքի) միջոցով Կորպաչովէն փրցնել Գերմանիոյ վերամիացումը։
Այսօր, քրիստոնեայդեմոկրատական Անկելա Մերքէլի կարգն է անցեալի խելացի դիւանգիտութեան օգուտները քաղելու, եւ որպէս Եւրոպայի տնտեսապէս առաջատար ուժ, իր գերիվերութիւնը հաստատելու՝
ամրապնդելու համար Եւրոպական Միութիւնը, ելմտական, տնտեսական եւ քաղաքական ոլորտներուն մէջ (տե՛ս. քովի սիւնակի գրութիւնը)
երկխօսութեան ճամբով Փութինի հետ պատրաստելու համար Ուքրաինայի տնտեսական փրկութիւնը։ Ինչ որ արդէն անդադրում կերպով ըրաւ վեց ամիսէ ի վեր։
Վիլնիուսի դառն ձախողութեան լոյսին տակ, յղանալու համար Եւրոպական գործընկերութեան նոր քաղաքականութիւն մը, որ ընդունելի ըլլայ ներգրաւելի բոլոր երկիրներէն, ներառեալ՝ Ռուսաստանէն։
եւ վերջապէս արգելք հանդիսանալու համար Պարոն Էրտողանի (ՌԹԷ) մահմետաազգայնական քարոզչութեան՝ իր երկիրը ներթափանցումին, որ գերմանացի քաղաքացիներուն համար ոչ նուազ կարեւոր հարց մըն է։
Այս վերջին կէտին կապակցութեամբ կը գնահատենք Տիկին Մերքէլի աննկուն կեցուածքը ՌԹԷի կողմէ կատարուած բազմաթիւ գրգռութիւններու եւ ներքին միջամտութիւններու նկատմամբ, երբ վերջինս կը յարձակէր ծագումով թուրք գերմանացի խորհրդարանականներու եւ նախարարներու վրայ, որոնք դէմ են իր քաղաքականութեան։
Եթէ ֆրանսացի ղեկավարները նման կեցուածք որդեգրած ըլլային, վստահաբար գործատիրական արհմիութիւնները եւ Թուրքիոյ կողմէ գանձատրուած հիմնարկները պիտի չյաջողէին խոչընդոտել Պուայէի օրէնքը Սահմանադրական Խորհուրդին մէջ։

Անկելա Մերքէլ չի մոռնար, ինչպէս ըրաւ 2014 Փետրուարին, ՌԹԷէն պահանջելու, որ “առերեսի իր պատմութեան հետ“։ Նկատի ունենալով 1915ի Ցեղասպանութեան ընթացքին Գերմանիոյ մեղսակցութիւնը Երիտթուրքերուն հետ, 2015ը պատշաճ առիթը պիտի ըլլայ, որ գերմանացի վարչապետուհին ապաշխարէ հայկական ոգեկոչումներու ընթացքին։
Հետեւաբար, մեզի կը թուի թէ աւելի քան յարմար առիթ է, որ Հայաստան եւ Պէրլինի իր դեսպանը այս ուղղութեամբ շփումներուն զարկ տան… ամուր ու մնայուն յարաբերութիւններ զարգացնելէ անդին՝ արդիւնաբերող այդ հզօր երկրին հետ, որ դարձած է եօթանասուն տարիներու ընթացքին ժողովրդավարական եւ խաղաղասէր Գերմանիան։

ՀԱՏՈՒԱԾ՝
ԷՐԻՔ ԼԸ ՊՈՒՇԷԻ ՅՕԴՈՒԱԾԷՆ
“ԵՐԲ ԳԵՐՄԱՆԻԱՆ ՄԵԶ ՊԻՏԻ ՓՐԿԷ“

Գերմանիան՝ ապագան է նաեւ Ֆրանսայի: Ճիշդ է, որ “Ա.Մ.Ն.ն կը մնայ իշխող կայսրութիւնը, անոր տնտեսութիւնն է որ կ՚իշխէ ամբողջ մոլորակին վրայ, եւ իր օրէնքները կը կիրարկէ քմահաճօրէն, վկայ՝ BNPն, որ ունեցաւ սուղ արժող փորձառութիւն։ Բայց Գերմանացիներն են, որ մեզ դուրս պիտի հանեն թակարդէն, ընկճումէն եւ կամ եթէ համարձակինք ըսել՝ “տարօրինակ պարտութենէն“, որու մէջ կը գտնուինք այսօր՝ 2014ին, ճիշդ այնպէս ինչպէս կը գտնուէինք 1940ին։ Վերընթերցել Մարք Պլոքը եւ հասկնալ, որ ֆրանսական բանակը յանցաւոր էր, երբ հաւատք ընծայեց Մաժինոյի գիծի պաշտպանականութեան, բայց ան միակը չէր։ Ամբողջ Ֆրանսան լկտիաբար փակուած էր վտանգին պատճառած կուրութեան մէջ։ Ղեկավար դասերը որոնք “կը տարածեն իր տկարութիւններուն մատչելի՝ խուճապի հոգեվիճակ“, արհմիութենականութիւն մը որ կը մերժէ զոհողութիւն կատարել, ձեռնակատէրեր որոնք “կը հաշուեն իրենց լումաները“, “անշունչ մնացած“ մտաւորականութիւն եւ խեղճուկ թերթեր“։

Ֆրանսա Գերմանիայէն կրնայ ձեռք ձգել չորս բարելաւում՝
“Նոր զարկ“՝ տարադրամին: Եւրոպայի Կեդրոնական Դրամատան նախագահը Մարիօ Տրակի այդ ուղղութեամբ վերջերս որոշում կայացուց:
Որոշ բարեացակամութիւն՝ պակասորդի 3%ի սահմանի յարգանքի նկատմամբ:
Նոր զարկ՝ սպառումին, ինչ որ արդէն մասամբ կատարուած է գերմանական աշխատավարձերու յաւելումով:
Եւ Եւրոպայի քաղաքական փրկութիւն:
Եւրոպական ընտրութիւնները Ֆրանսան տկարացուցին: Անկելա Մերքէլ ինքզինք կը գտնէ եւրոթերահաւատութեան դէմ պայքարելու պատասխանատւութեան առջեւ:
Էրիք Լը Պուշէի կարծիքով “պատմութեան տարօրինակ շրջադարձ մըն է, հիմա Գերմանիոյ կարգն է աջի ծայրայեղութեան դէմ պայքարելու… Բայց նաեւ անոր կը մնայ դուրս ելլել իր գերմանակեդրոնացած տեսիլքներէն, որպէսզի ընէ ինչ որ կ՚ակնկալենք իրմէ՝ հաստատել եւրոպական համարկող կամք, ստեղծել ապագան պատրաստելու միջոցներ, յառաջացնել եւ գանձատրել հասարակաց պաշտպանութիւն մը“։

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles