“ԲԱՐՁՐԱՑՈՂ ԵՒ ԲԱՐՁՐԱՑՆՈՂ“ ՆԵՐԿԱՅՈՒԹԻՒՆ

0 0
Read Time:1 Minute, 39 Second

hmemՀԱՅՐԵՆԻՔ

Ա.Մ.Ն. Արեւելեան շրջանի Հ.Մ.Ը.Մ.-ին համար Յուլիսի առաջին շաբաթավերջը միայն անկախութեան տօնակատարութիւն չէ, այլ նաեւ “Բարձրացող եւ Բարձրացնող“ ներկայութիւն:

Այս անգամ Նիւ Եորքի մէջ կը կատարուի փառատօնը՝ Նաւասարդեան 24-րդ խաղերը:
Շաբաթավերջ մը շարունակ Հ.Մ.Ը.Մ.-ականներ եւ համակիրներու հսկայ զանգուած մը պիտի բարձրացնեն նորահաս սերունդը առկայ սովորական եւ այլասերիչ միջավայրէն վեր: Իրենց հետ պիտի բարձրանայ նաեւ հայկական ու մարզավայել ոգին, հեռու կիրքերէ, անհատապաշտութիւններէ եւ եսասիրութիւններէ:
Այս տեսիլքով եւ նշանաբանով պիտի ծածանին դրօշները: Հ.Մ.Ը.Մ.-ականի ոգին է որ պիտի տողանցէ, բարձունքներ նուաճելու փափաքով եւ միտումով:
Անգամ մը եւս, իր մթնոլորտով, առաքելութեամբ եւ ներկայութեամբ Հ.Մ.Ը.Մ. պիտի շարունակէ հայակերտման եւ տիպար մարդակերտման իր կրթական ծրագիրը: Ի վերջոյ, իւրայատուկ դպրոց մըն է Հ.Մ.Ը.Մ.-ը:
Հայրենիքէն մղոններ հեռու, հայրենիքին համար է որ կը շնչէ այս միութիւնը եւ պատահեկան չէ որ, իր հայրենատենչ պատգամով եւ ազգայնաշունչ մթնոլորտով կը թրծէ սերունդ, իր ազնուական սկզբունքներով եւ վեհ գաղափարախօսութեամբ եւ իտէալներով:
Որքա՜ն տարիները կը թաւալին, այդքան կը դժուարանան միութեան եւ միութենական օրէնքներուն կառչած մնալը: Կեանքն ու ապրելաձեւը փոխուած ու մեքենայացած է: Ելեկտրոնային ներկայութիւնը, բոլոր բնագաւառներէն ներս այնքան մը դիւրացուցած է պայմանները, որ նոյնիսկ միութենական կեանքն ալ ազդուած է: Եւ այս դրութեան մէջ, նաեւ ժխտական երեւոյթ մըն ալ ստեղծուած է: Հետզհետէ թէ՛ ձանձրացուցիչ եւ տէ՛ ձեւական կը նկատուին, օրին մեծ հետաքրքրութիւն ստեղծող հաւաքներ կամ բարզ ժողովներ:
Յատկապէս այս օրերուն դժուար է Հ.Մ.Ը.Մ.-ականին պաշտօնն ու պարտականութիւնը՝ վարչական պատասխանատուութիւններ ստանձնել, նուիրաբերումով ծառայել եւ “Բարձրանալ ու Բարձրացնել“:
Հակառակ այս բոլորին, Հ.Մ.Ը.Մ.-ը կանգուն է եւ ամենայն ինքնավստահութեամբ կը գործէ: Հ.Մ.Ը.Մ.-ականը կը հաւատայ իր յաւերժական իտէալին եւ ուժին: Ան շարունակ կը հաւատայ ապագայ սերունդներուն, որոնք պիտի մնան “Բարձրացող եւ Բարձրացնող“ ներկայութիւն: Փաստօրէն ներկան անցեալի հայելին է:
Յառա՜ջ…Տողանցենք, մրցինք եւ տօնենք Հայ Մարմնակրթական Ընդհանուր Միութեան համար: Դրօշն ու ջահը փոխանցուած են ու կը փոխանցուին սերունդէ սերունդ ի պատի՛ւ հայութեան եւ Հայաստանին…Պարծանք անոնց եւ Հ.Մ.Ը.Մ.-ին:

 

 

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles