Առցանց Զեկուցում՝ Սեւրի Դաշնագրի 100-ամեակին Առթիւ

0 0
Read Time:1 Minute, 28 Second

 

ՈՒԱԹԸՐԹԱՈՒՆ (Մասաչուսէց)․- Օգոստոս 20-ին, կազմակերպութեամբ Հայ Դատի արեւելեան Ա․Մ․Ն․-ի յանձնախումբին տեղի ունեցաւ հետաքրքրական առցանց հաւաք մը, մասնակցութեան երեք փաստաբաններու՝ Վիգէն Սոնենց Փափազեան, Սթիւ Տէտէեան եւ Արմէն Յովհաննէսեան։ Նիւթն էր․- «Սեւրի դաշնագիր՝ անաւարտ պարտականութիւն մը»։

Զրուցավարն էր Վիգէն Սոնենց Փափազեանը, որ յայտնեց, թէ յանուն Հայաստանի՝ Սեւրի Դաշնագիրը ստորագրեց Հ.Հ. Պատուիրակութեան նախագահ Աւետիս Ահարոնեան։ Իսկ Օսմանեան Կայսրութեան անունով Դաշնագիրը ստորագրեցին թրքական պատուիրակութեան չորս անդամները` Ռիզա Թեւֆիք, Մեծ Վեզիր Տամաթ Ֆերիտ փաշա, դեսպան Հատի փաշա եւ կրթութեան նախարար Րեշիտ Հալիս, որոնք լիազօրուած էին սուլթան Մեհմետ 6-րդի կողմէ։ Ան աւելցուց, թէ Սեւրի Դաշնագիրը նաեւ եղաւ միջազգային օրէնքի եւ իրաւունքի այն միակ եւ այդ բաժնով ցարդ չփոխարինուած փաստաթուղթը, ուր մանրամասնօրէն ճշդուած ու քարտէսագրուած են հայկական եւ թրքական պետութեանց միջեւ միջազգային սահմանները՝ Ամերիկայի Միացեալ Նահանգներու ատենի նախագահ Վուտրօ Ուիլսընի իրաւարարութեամբ։

Արմէն Յովհաննէսեան մանրամասն տեղեկութիւններ փոխանցեց, տեղեկացնելով, թէ դաշնագրի ստորագրութեան պաշտօնական ու հանդիսաշուք արարողութիւնը կատարուեցաւ Սեւրի աշխարհահռչակ Փորսըլէնի Գործարանի ցուցասրահներէն մէկուն մէջ։ Ֆրանսա նախագահեց արարողութեան։ Դաշնագիրը պատրաստուեցաւ երեք լեզուներով՝ ֆրանսերէն (առաջնային), անգլերէն ու իտալերէն եւ ստորագրուեցաւ, լատինական այբուբենի կարգով, Հայաստանի, Պելճիքայի, Ֆրանսայի, Յունաստանի, Հիճազի (արաբական թագաւորութիւն), Իտալիոյ, Ճափոնի, Լեհաստանի, Փորթուկալի, Ռումանիոյ, Միացեալ Թագաւորութեան, Եուկոսլաւիոյ եւ Օսմանեան Կայսրութեան կողմէ։

Սթիւ Տէտէեան շեշտեց, թէ Սեւրի Դաշնագիրը մէկն էր Առաջին Աշխարհամարտին աւարտը իրաւականօրէն հաստատագրող այն դաշնագիրներէն, որոնք պատերազմի յաղթական Դաշնակից Ուժերուն կողմէ պարտադրուեցան պարտեալ Կեդրոնի Ուժերուն՝ Գերմանիոյ, Աւստրօ-Հունգարիոյ, Պուլկարիոյ եւ Օսմանեան Կայսրութեան։ Սեւրի Դաշնագիրը հանդիսացաւ պարտեալ Օսմանեան Կայսրութեան եւ յաղթական Դաշնակիցներուն միջեւ կնքուած խաղաղութեան ու հաշտութեան պայմանագիրը։

Հետաքրքրական զրոյցը բաւական երկար տեւած ըլլալով, յառաջիկային հարց-պատասխանի յատուկ առցանց հաւաք մը, տեղի պիտի ունենայ։ Այս ձեռնարկը կազմակերպուած էր, գործակցաբար հայ դատաւորներու ընկերակցութեան, Հայ Դատի արեւմտեան Ա․Մ․Ն․-ի եւ Գանատայի յանձնախումբերուն։

Նշենք, թէ Պոսթընի «Սարդարապատ» կոմիտէն ալ նմանօրինակ առցանց ձեռնարկ մը կազմակերպած էր Օգոստոս 23-ին եւ օրուան բանախօսն էր Երեւանի համալսարանի դասախօս՝ Խաչատուր Ստեփանեան։

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles