ԱՆԳԱՐԱՆ…ՃՆՇՈՒՄԻ ՏԱԿ

0 0
Read Time:1 Minute, 47 Second

p1 khemp

ՀԱՅՐԵՆԻՔ
Օգոստոս 11, 2015

Պայթում մը…Պոլսոյ ոստիկանատան սեմին եւ ապա քանի մը ժամ ետք կրակոցներու տարափ մը Միացեալ Նահանգներու հիւպատոսարանի մուտքին:
Միեւնոյն օրը, այս անգամ հարաւ-արեւելեան շրջանէն ներս այլ պայթում մը, որուն թիրախն են ներքին ապահովութեան ուժերը:
Տասնեակ մը զոհեր եւ վիրաւորներ: Ըստ երեւոյթին, այդքան ալ ապահով չէ Թուրքիոյ մէջ շրջիլը: Վերադարձած են վտանգաւոր օրերը:
Եւ կացութիւնը հետզհետէ կը վատթարանայ պայթուցիկ ըլլալու աստիճան:
Կը սպասուէր որ այսպիսի իրավիճակ ստեղծուի, նկատի ունենալով որ քանի մը շաբաթ առաջ թրքական օդուժը կատարած էր Սուրիոյ եւ Իրաքի հողամասերուն վրայ, իբրեւ թիրախ ունենալով թէ՛ քրտական եւ թէ՛ իսլամական պետութեան ուժերու պատկանող կեդրոններ:
Հաւանաբար խորհրդարանի ընտրութիւններուն բաւական մը աթոռ կորսնցնելով, շրջանէն ներս նախագահ Էրտողան  իր խաղաքարտը փոխած էր եւ  դիմած՝ Տոն Քիշոթեան յարձակումներու:
Նոյնիսկ, թրքական օդուժի առաջին օրերու յարձակումներուն, պաշտօնապէս խօսք առնելով Էրտողան քննադատած էր քրտական անջատողական ուժերն ու ծայրայեղական իսլամ պետութեան ետին կանգնող հոսանքը:
Յաջորդող օրերուն, Էրտողանի յայտարարած «պատերազմը՝ ահաբեկչութեան դէմ», աւելի կեդրոնացած էր քրտական կեդրոններու վրայ, իսկ ծայրայեղ իսլամականներու դէմ յարձակումները գրեթէ ընդհատուած էին:
Այսպէս «թելը փրթած» էր եւ քիւրտ անջատողականներն ալ, իրենց կարգին դիմած էին զէնքի:
Այս յարձակումները այնքան մը յաճախակի էին որ, նոյնիսկ Իրաքի ղեկավարութիւնը պաշտօնապէս դժգոհած էր Անգարային, յայտնելով թէ երկրի գերիշխանութիւնն էր խնդրոյ առարկան:
Այս փոփոխութիւններու լոյսին տակ, եւ Արեւմտեան աշխարհին դրական գործակցութիւն եւ կեցուածք ցոյց տալով, Էրտողան նաեւ արտօնեց Ինճիրլիքի զինուորական օդակայանին գործածութիւնը, ամերիկեան օդուժին կողմէ:
Սակայն այս բոլոր ճարպիկ ու խորամանկ մօտեցումներն ու որոշումները, չհասան իրենց նպատակին:
Առաջին հերթին, պաշտօնապէս աւարտած է, քանի մը տարիէ ի վեր գոյութիւն ունեցող զինադուլը: Իսկ դեռ աւելին, արեւմտեան աշխարհը եւ յատկապէս Միացեալ Նահանգները, լաւապէս կը հետեւին իրադարձութիւններուն: Անոնք քաջատեղեակ կը թուին ըլլալ թէ, թրքական օդուժի կիզակէտը …շրջանէն ներս իրենց զինակից քիւրտերն են:
Աւելի՛ն, Միացեալ Նահանգներու գաղտնի սպասարկութեան գրասենեակը յստակ փաստաթուղթեր ունի, թէ թուրք պետութիւնն ու իսլամական պետութիւնը մօտէն կը գործակցին քարիւղի վաճառքով եւ անշուշտ Անգարա անտարբեր է ապօրինի կերպով Սուրիա մուտք գործող ծայրայեղական զինեալներուն նիւթին առնչութեամբ:
Վայրկեան մը մէկդի դրած այս թրքական օդուժին յարձակումները եւ վերադառնալով Թուրքիա..Հոն կացութիւնը լրջօրէն պայթուցիկ կը թուի ըլլալ, մանաւանդ որ աթոռամոլ եւ աւատապետական ձգտումներով տարուած Էրտողան այս անգամ կը փորձէ խորհրդարանէն ներս բուռն պայքար մղել հակադրուած կուսակցութիւններուն դէմ, որոնց կարգին յատկապէս Սալահետտին Տեմիրթաշի ղեկավարած քրտամէտ Ժողովուրդի Ժողովրդավարական Կուսակցութիւնը:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles