ԱՅՈ’ …ԽՈՐՀՐԴԱՐԱՆԱԿԱՆ ՀԱՄԱԿԱՐԳ

0 0
Read Time:1 Minute, 46 Second

khemp

ՀԱՅՐԵՆԻՔ

Խմբագրական

Դեկտեմբեր 8, 2015

Անակնկալ մը չէր այս արդիւնքը, սակայն անսպասելի էր մասնակցողներուն սակաւ թիւը: Այո՛ կը խօսուէր որոշ անտարբերութեան մը մասին, սակայն երբ քուէարկողներու հազիւ 50.51 առ հարիւրը միայն մասնակցած է, սա կը նշանակէ թէ անտարբերութեան ալիք մը ստեղծուած է, որ գերմտահոգիչ է եւ կրնայ ապագային ալ շարունակուելով ստեղծել պարապութիւն մը:
Հետաքրքրականը այն է թէ զարմանալիօրէն այդ սահմանադրական բարեփոխումներու դէմ արտայայտուեցան եւ ամենայն ծայրայեղութեամբ «Ո՛չ»ին կառչած մնացին բազմաթիւ խմբաւորումներ, որոնց համար միայն սահմանադրական բարեփոխումով, այսինքն «Այո՛»ով կարելի էր քաղաքական աւելի թափանցիկ գործելաձեւ ստեղծել: Անոնք չէին հաւատար, որ իշխող Հանրապետական Կուսակցութիւնը, կրնար այսպէս ամենայն դիւրութեամբ տեղի տալ:
Դժբախտաբար, քաղաքական բեմահարթակին վրայ բեւեռացումը այնպիսի մակարդակի հասած է որ, խմբաւորումներ գերադասած են իրենց հաշիւները…մութ հաշիւներ, որոնք ուղղակիօրէն կ՛արտացոլացնեն իրենց մեծամոլութիւնն ու հալածախտը:
Այսօր, Դեկտեմբեր 6-էն սկսեալ, մենատիրական դրութենէ դուրս գալով եւ խորհրդարանական գործելաձեւ որդեգրելով, Հայաստանի Հանրապետութիւնը անցաւ յառաջադէմ երկիրներու շարքին, հանգրուան մը, եղելութիւն մը, որուն մասին անտարբերութեամբ մօտենալը շատ աւելի մտահոգիչ է քան «Ո՛չ» քուէարկելը: Հաւանաբար, նոյնի՛նք այլ «Ո՛չ» մըն է այդ անտարբերութիւնը, շատ աւելի խոր ժխտողական ու մերժողական կեցուածք մը, քան պարզապէս անձնական հաշիւներով, բեմ ներկայացած «Ո՛չ» քուէարկող խմբաւորումը:
Քուէարկողներու կէսէն քիչ մը պակասը բացակայ էր Կիրակի օր, Դեկտեմբեր 6-ին: Այս բացականերուն անտարբերութեան մասին խօսիլը կը կարօտի լուրջ քննարկման: Անոնք կը պատկանին այն խաւին, որոնք յուսահատ եւ յուսախաբ ներկայ իրավիճակէն, պարապութեան մը մէջ կը գտնուին, եւ պարզապէս իրենց «կեանքը ինչպէս որ է»ն կը շարունակեն, առանց միջամուխ ըլլալու եւ ներդրում կատարելու:
Այս անտարբերութեամբ տարուած խաւէն ներս խանդավառութիւն եւ հետաքրքրութիւն ստեղծելու համար, հետեւողական աշխատանք ունի կատարելիք յաչս բարեփոխումներու եւ արդարութեան համար պայքարած եւ այդ հաւատքով «Այո՛» քուէարկած հայորդին:
Այդ իսկ պատճառով, յառաջիկայ ամիսներուն իսկական բարեփոխումներու ազդանշանը պէտք է որ տրուի, որպէսզի Յունիս 1, 2016-էն սկսեալ կիրարկուի այս խորհրդարանական գործելաձեւը: Առաջին փորձաքարը պիտի ըլլան 2017-ի խորհրդարանական ընտրութիւնները, որոնց համար պէտք է որ այս անտարբեր մասսան, խոր թմբիրէն դուրս բերելու աշխատանք կատարուի:
Աշխատա՛նք, որուն համար պէտք է գործունէութիւն, հետեւողականութիւն, հաւատարմութիւն եւ յատկապէս ուղղամտութիւն:
Խիստ կարեւոր եւ անկիւնադարձային են յառաջիկայ ամիսները, որոնք կը բնորոշուին սահմանադրութեան բարեփոխման գործընթացի առաջին քայլերով:
Կարելի չէ սխալիլ եւ տեղի տալ: Ի վերջոյ այդ հաւատքով «Այո՛» քուէարկած ենք:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %
Previous post Հ.Մ.Ը.Մ.-ի Կեդրոնական Վարչութեան Հանդիպումները Երեւանի Մէջ
Next post Հ.Յ.ԴԱՇՆԱԿՑՈՒԹԵԱՆ 125-ԱՄԵԱԿ՝ ՓՐՈՎԻՏԵՆՍԻ ՄԷՋ

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles