ԵՐԵՒԱՆ.- Ուրբաթ, Մայիս 31-ին, վարչապետ Նիկոլ Փաշինեանի հրաժարականը պահանջող «Տաւուշը յանուն հայրենիքի» շարժումը քայլերթ կատարեց, որուն մեկնարկը տրուեցաւ Սուրբ Աննա եկեղեցւոյ մօտէն: Ապա, շարժման մասնակցողները անցան Գլխաւոր դատախազութեան եւ արտաքին գործոց նախարարութեան շէնքերու մօտ, ուր ոստիկանական մեծաթիւ ուժեր տեղակայուած էին:
Գլխաւոր դատախազութեան շէնքին դիմաց շարժումի ղեկավար Բագրատ արք. Գալստանեան յայտարարեց, որ այս կառոյցը «Քաղաքացիական պայմանագիր» կուսակցութեան «ծառայութիւն մատուցող ծառայութիւն է»:
Սրբազանը ընդգծեց, որ մինչեւ այսօր որեւէ գործ, սկսած շարժման մասնակիցները գործակալներ պիտակաւորելէն մինչեւ «Հայաքուէ»-ի կողմէ ապօրինի սահմանազատման հետ կապուած հաղորդումը, Գլխաւոր դատախազութիւնը չէ յարուցած:
Արտաքին գործոց նախարարութեան դիմաց` ոստիկանական պատին առջեւ կանգնելով` Բագրատ արք. Գալստանեանը յիշեցուց Ատրպէյճանի նախագահին յայտարարութիւնները` ըսելով, որ անոնք կը նուաստացնեն հայ ժողովուրդը: Ան մեղադրեց իշխանութիւնները անոնց համարժէք պատասխան չտալու յանցանքով:
Բագրատ սրբազանը արտաքին գործոց նախարարութեան աշխատակիցներուն յորդորեց ներկայանալ եւ պատասխան տալ բոլոր նուաստացումներուն համար, հակառակ պարագային, պնդեց, անոնք «Ատրպէյճանի ու Թուրքիոյ գործակալներ են»:
Բագրատ սրբազանը կոչով դիմեց ներքին գործոց նախարար Վահէ Ղազարեանին` պահանջելով չարգիլել իրենց մուտքը արտաքին գործոց նախարարութիւն:
Ոստիկանութենէն յայտնեցին, որ արտաքին գործոց նախարարութիւնը անցագրային դրութեան համակարգով գործող կառոյց է եւ որեւէ մէկը իրաւունք չունի հոն բարձրանալու: Արտաքին գործոց նախարարութեան շէնքին առջեւ լարուած իրավիճակը աւելի եւս սրեցաւ: Ոստիկանութեան գործողութիւններուն հետեւանքով բերման ենթարկուած է բողոքի ցոյցի 29 մասնակից: