0
0
Ռոտ Այլընտի Քրենսթըն քաղաքին քաղաքապետական խորհուրդը Ապրիլ 24-ին հաստատեց այդ քաղաքին եւ Արցախի Հանրապետութեան մայրաքաղաք Ստեփանակերտի միջեւ գոյացած՝ «Բարեկամ Քաղաքներ» դառնալու հռչակագիրը, կը հաղորդէ Ռոտ Այլընտի Հայ Դատի յանձնախումբը։
Յիշեցնենք, որ Ռոտ Այլընտի Հայ Դատի յանձնախումբին ջանքերով, Ռոտ Այլընտի նահանգային խորհրդարանը 2012-ին պաշտօնապէս ճանչցած էր Արցախի Հանրապետութեան անկախութիւնը։
Համաձայնութիւնը ամուր հիմերու վրայ պիտի դնէ երկու հեռաւոր քաղաքներուն միջեւ բազմամակարդակ եւ սերտ յարաբերութիւններ հաստատելու ջանքերը, նպատակ ունենալով զօրակցիլ Ստեփանակերտի տնտեսական կայունութեան եւ մշակութային հարստութեանց պահպանութեան, ինչ որ յոյժ կարեւոր է այս օրերուն, երբ Արցախը պաշարուած կը մնայ։
Դրուատելով Քրենսթընի քաղաքապետական խորհուրդի այս քայլը, Ռոտ Այլընտի Հայ Դատի յանձնախումբի ատենապետ Սթիւ Էլմասեան շնորհակալութիւն յայտնեց յատկապէս քաղաքապետ Քենեթ Հափքինզին, որ նեցուկ կանգնեցաւ Հայ Դատի այս նախաձեռնութեան։
Ռոտ Այլընտի երկրորդ մեծագոյն քաղաքն է Քրենսթընը։ Այդ շրջանին մէջ կը բնակի նահանգին հայութեան մեծամասնութիւնը։
