Հ.Յ.Դ.-Ի ԱՌԱՋԻՆ ՆԱԽԸՆՏՐԱԿԱՆ ՀԱՆՐԱՀԱՒԱՔԸ` ԱՊՐԻԼ 10-ԻՆ
Երեւան (“Երկիր“, “Նիուզ“).- Հ.Յ.Դ. Հայաստանի Գերագոյն մարմնի անդամ Սպարտակ Սէյրանեան, Երեքշաբթի Մարտ 27-ին, տեղեկացուց թէ, Հ.Յ.Դ.-ի առաջին նախընտրական հանրահաւաքը տեղի պիտի ունենայ Երեքշաբթի Ապրիլ 10-ին` Երեւանի Ազատութեան հրապարակին վրայ:
Այս գծով, յարգելու համար օրինականութիւնը, հանրահաւաքի կայացման մասին համապատասխան դիմումը արդէն ներկայացուած է Երեւանի քաղաքապետարանին:
Սպարտակ Սէյրանեան նշեց, թէ այլ հանրահաըաքներ տեղի պիտի ունենան Հայաստանի մարզերուն մէջ, այլ թուականներու ընթացքին: Ան տրամաբանական չնկատեց այն հարցումը, թէ Հ.Յ.Դաշնակցութիւնը որքա՞ն մասնակից կ՛ակնկալէ իրենց հանրահաւաքին: Ան նաեւ զարմանք յայտնեց հանրահաւաքի առանձին կարգախօսի մասին հարցադրումին առնչութեամբ, եւ պատասխանեց թէ.-“Կուսակցութիւնը կարգախօս ունի: Ո՞ւր լսուած է, որ հանրահաւաքը եւս կարգախօս ունենայ“:
