ԹԱՐԳՄԱՆՉԱՑ ՏՕՆԻ ՆՇՈՒՄ՝ ՆԻՒ ԵՈՐՔԻ ՍՈՒՐԲ ԼՈՒՍԱԻՈՐԻՉ ՄԱՅՐ ԵԿԵՂԵՑՒԷՅ ՄԷՋ
Նիւ Եորքի Սուրբ Լուսաւորիչ Մայր Եկեղցւոյ «Փաշալեան» սրահին մէջ, Կիրակի, 12 Հոկտեմբերին, յաւարտ Սուրբ Պատարագի տեղի ունեցաւ «Ոգեղէն հաց» խորագրով ձեռնարկը, նշելու համար Սրբոց Թարգմանչաց տօնը: Մասնակիցները եկեղեցւոյ 13 երիտասարդներ եւ ծխականներ էին, որոնք կարդացին կրօնական եւ աշխարհական հայ գրողներու գործը։
Յայտագիրը սկսաւ տիկին Լիզա Եսայեանի բացման խօսքով՝ «Սրբոց Թարգմանչաց տօնը եւ խորհուրդը» խորագրով։ Ան շեշտեց թէ ինչպէ՛ս Հայ Առաքելական Եկեղեցին կը տօնէ Սրբոց Թարգմանչաց տօնը, ամէն տարի Հոկտեմբեր ամսուն յիշատակելու համար Մեսրոպ Մաշտոցի կողմէ 405 թուականին ստեղծուած հայերէն այբուբենի գիւտը։ Աւելցուց, որ այս իրադարձութիւնը հայ մշակոյթի, կրթութեան եւ ազգային ինքնութեան անկիւնադարձային կէտը դարձաւ եւ Ոսկեդարու հիմքը դրաւ։ Այս դարաշրջանը ներառաւ Աստուածաշունչի թարգմանութիւնը, որ ծանօթ է «Թարգմանութիւններու թագուհի» անունով, եւ շատ կարեւոր դեր ունեցաւ հայ ազգային ու հոգեւոր ինքնութեան ամրապնդման մէջ։ Տիկ. Եսայեան աւարտեց իր խօսքը բացատրելով, թէ «ոգեղէն հաց» արտայայտութիւնը կը խորհրդանշէ հայոց լեզուի պահպանումը ազգի հոգիին, որ պաշտպանած է իր քրիստոնէական հաւատքը եւ ինքնութիւնը դարերու օտար տիրապետութեանց դէմ։
Յայտագրի ընթացքին տեղի ունեցաւ Եսայեանի կողմէ պատրաստուած սահիկներու ցուցադրութիւն մը։ Այս շարքը կը պարունակէր լուսանկարներ, որոնք կը ներկայացնէին հեղինակներուն կեանքը, մինչ անոնց կենսագրութիւնները կ’ընթերցուէին։
Ձեռնարկը իր աւարտին հասաւ եկեղեցւոյ հոգեւոր հովիւ՝ Արժպ. Տ. Մեսրոպ Ա․ Քհն․ Լագիսեանի պատգամով: Ան շնորհակալութիւն յայտնեց տիկին Եսայեանին յայտագիրը կազմակերպելու համար, անոր նուիրելով Տէրունական Աղօթքի խօսքերը պարունակող յուշատախտակ մը։ Տէր Հայրը նշեց նաեւ, թէ մասնակիցներէն շատերը նոր սկսած էին ծանօթանալ հայերէն տառերուն եւ գովասանքի խօսքեր արտայայտեց անոնց ջանքերուն համար, քաջալերելով զանոնք, որ շարունակեն իրենց ոգեշունչ ճամբորդութիւնը լեզուին հետ։ Իւրաքանչիւր մասնակից ստացաւ Պարոյր Վրդ․ Շէրնէզեանի «Ունկն դիր, Տէ՜ր» աղօթագրքի մէկ օրինակը։
Ս. Լուսաւորիչ Մայր Եկեղեցւոյ մէջ տեղի ունեցած այս հաւաքոյթը իմաստալից առիթ մըն էր համայնքին համար այս յատուկ տօնը յիշելու։
