ՈՒՍՏԸՐԻ ՍՈՒՐԲ ԵՐՐՈՐԴՈՒԹԻՒՆ ԵԿԵՂԵՑՒՈՅ 91-ԱՄԵԱԿԻ ՆՇՈՒՄ

Կիրակի, 14 Սեպտեմբերին, Ա․Մ․Ն․ Արեւելեան Թեմի բարեջան Առաջնորդ՝ Գերշ. Տ. Անուաշաւան Արքեպիսկոպոս Դանիէլեան, Սուրբ Պատարագ մատուցանեց Ուստըրի (Մասաչուսէց) Սուրբ Երրորդութիւն եկեղեցւոյ 91-ամեակին եւ Սուրբ Աստուածածնի Խաչվերաց տօնին առթիւ։ Եկեղեցին լեցուն էր հաւատացեալներով, որոնց միացած էին մօտակայ Ուայթընզիլի Սուրբ Աստուածածին եկեղեցւոյ ծխականները։

Պատարագին երգեցողութիւնը լրիւ կատարեց նորակազմ պատանեկան դպրաց դասը։ Առաջնորդ Սրբազան Հայրը կատարեց ձեռնադրութիւնը Արմէն Եղիայեանի (սարկաւագ) եւ Կէրի Խաչերեանի (կիսասարկաւագ), յորդորելով, որ ծառայեն համեստութեամբ եւ օրինակ ըլլան։

Պատարագին ներկայ էին Գերպ. Տ. Հրանդ Ծ. Վրդ. Թահանեան՝ հոգեւոր հովիւ Սուրբ Ստեփանոս եկեղեցւոյ (Ուաթըրթաուն, Մասաչուսէց), Արժպ. Տ. Կոմիտաս Ա. Քհն. Պաղսարեան եւ Արժպ. Տ. Արամ Ա. Քհն. Ստեփանեան, իսկ ճաշկերոյթին միացան Արժպ. Տ. Ստեփան Քհն. Պալճեան՝ հոգեւոր հովիւ Սուրբ Գրիգոր Լուսաւորիչ եկեղեցւոյ (Նորթ Անտովըր, Մասաչուսէց) եւ Արժպ. Տ. Թադէոս Քհն. Բարսեղեան՝ հոգեւոր հովիւ Սուրբ Փրկիչ եկեղեցւոյ (Ուստըր, Մասաչուսէց)։

Պատարագէն ետք, տեղի ունեցաւ եկեղեցւոյ 91-ամեակի տօնախմբութիւնը։ Հոգաբարձութեան ատենապետ՝ տիար Կարօ Պեքիարեան, շնորհաւորեց համայնքը այս իրագործումին համար եւ շեշտեց հաւաքական յանձնառութիւնը որ հիմքը կը կազմէ ծխական կեանքի։ Գերպ. Տ. Արտակ Ծ. Վրդ. Արապեան՝ եկեղեցւոյ հոգեւոր հովիւը, իր կարգին անդրադարձաւ ծուխի հարուստ պատմութեան եւ Ուստըրի ունեցած հիմնական դերին՝ հայութեան քրիստոնէական կեանքի ձեւաւորման մէջ, շնորհակալութիւն յայտնելով հաւատացեալներուն իրենց մշտական աջակցութեան համար։ Յատուկ պարգեւատրում եղաւ այն ընտանիքներուն, որոնց նիւթական աջակցութիւնը կարելի դարձուցած է եկեղեցւոյ նորոգման ու բարեզարդման կարեւոր ծրագիրներ։

Սրբազան Հայրը, յանուն Ազգային Վարչութեան Կրօնական եւ Քաղաքական Ժողովներուն, բարձրօրէն գնահատեց հոգեւոր հովիւ՝ Գերպ. Հ. Արտակին պատանեց երգչախումբի նախաձեռնութիւնը, դրուատեց հոգաբարձութեան եւ համայնքին յանձնառութեան ոգին։