ԱզգայինՅօդուածներ

Երիտասարդական Անկիւն.- Նոր Սերունդը Դաստիարակել Ֆետայիի Եւ Հայ Դատի Ոգիով

Սարհատ Մելքոնեան
Նիւ Ճըրզի

Ամէն տարի, երբ տասնեակներով Հ.Ե.Դ.–ական պատանիներ կը մասնակցին Սեմինարին, անոնք իրենց հետ կը բերեն ոգեւորութիւն, ընկերութիւններ, երգեր եւ խաղեր։ Անոնք կու գան հիմնականօրէն մէկ հարցումի պատասխանը գիտնալու, թէ՝ ի՞նչ կը նշանակէ ըլլալ հայ երիտասարդ, առանց ուղղակիօրէն տալու այդ հարցումը:

Սեմինարը այս հարցումին կը պատասխանէ ոչ միայն դասերով, կամ խաղերով։ Ան կը փոխանցէ հոգի մը, որ կը բխի ֆետայիի գաղափարէն։

Գէորգ Չաւուշը, Անդրանիկը, Նժդեհը՝ միայն զինուած մարտիկներ չէին։ Անոնք կ՛ապրէին իրենց ժողովուրդին, հողին ու լեզուին համար։
Հ.Ե.Դ. սեմինարը, այսօր, կը շարունակէ այդ պայքարը՝ գիրքով եւ դասերով։ Սեմինարը կը սորվեցնէ, թէ Հայ Դատը ապրող շարժում մըն է, որ կը պահանջէ ճշմարտութիւն, արդարութիւն եւ պայքարի ոգի։
Պատանիները կը սորվին՝
• Հայ Դատը միայն Ցեղասպանութեան ճանաչում չէ։ Անիկա նաեւ հայրենիք պահել է։
• Հայ Դատը այսօրուա’ն պայքարն է. Արցախը, Սիւնիքը եւ մեր ինքնութիւնը զօրաւոր պահելն է։
• Պայքարը կը շարունակուի, երբ երիտասարդը սորվի եւ գիտնայ իր դերը հայապահպանման եւ հայ դատի այս ծրագրին մէջ։
Ինչպէս Սիմոն Զաւարեան ըսած է՝
«Միասնաբար մենք ուժեղ ենք, անհատաբար՝ անհրաժեշտ»։
Այս է Հ.Ե.Դ.-սեմինարին նպատակը՝ Սորվեցնել, պատրաստել, ոգեշնչել։ Եւ այս բոլորը ընելով միասին։

Երբ սեմինարի աւարտին պատանի մը ինքն իրեն հարցնէ՝ «Ի՞նչ կրնամ ընել ժողովուրդիս համար», ան պիտի գիտնայ իր կարեւորութիւնը իր ապրած շրջանէն ներս: Ան, մասնակցելով այս սեմինարին, որուն նպատակն է Հայ Դատին ծանօթանալը, կը գտնէ իր հարցումին պատասխանը:

Եւ այսպիսով մեր պայքարը կը շարունակուի եւ կը փոխանցուի նոր սերունդին՝ գիրքով, մտածումով, հաւատքով եւ վերջապէս, կուսակցական ընկերներ դառնալէ ետք՝ զէնքով։
Hairenik Media Hairenik Media

Leave a Reply

Your email address will not be published. Required fields are marked *

Back to top button