ԵՐԵՒԱՆ.- Յունիս 3-ին, Ազգային ժողովի ընդդիմադիր խմբակցութիւններու նախաձեռնած արտահերթ նիստը չկայացաւ:
Առաջին անգամ նիստը յետաձգուեցաւ չորս ժամով թիւ չապահովելու պատճառով: Քաղաքացիական պայմանագիր խմբակցութիւնը յայտարարած էր, որ պիտի չներկայանայ խորհրդարան եւ չ՛ուզեր մասնակցիլ Արցախի հարցով Ազգային ժողովի արտահերթ նիստին:
Միւս կողմէն Ֆրանսայի հրապարակին վրայ շարունակուեցաւ «Դիմադրութիւն» շարժման հանրահաւաքը:
Կատարուեցաւ քայլերթ դէպի Հ. Հ. կառավարութեան կեդրոնատեղի:
«Դիմադրութիւն» շարժման անդամները, քանի մը ժամ կառավարութեան բոլոր մուտքերը շրջափակելէ ետք, երթով քալեցին դէպի կառավարական ամարանոց:
Կառավարական ամարանոցի առջեւ մեծաթիւ ոստիկաններ` վահաններով եւ սաղաւարտներով զինուած, շղթայ կազմած էին:
Մասնակցող ցուցարարներուն եւ ոստիկանութեան միջեւ տեղի ունեցան ծանր բախումներ, բազմաթիւ ցուցարարներ բերման ենթարկուեցան:
