Արգելքը Վերցուեցաւ Թրքական Ապրանքներու Հայաստան Ներածման 

ԵՐԵՒԱՆ․- Դեկտեմբեր 30-ին, Հայաստանի տնտեսութեան նախարարութիւնը հրապարակեց հաղորդագրութիւն մը, որուն մէջ նշուեցաւ, որ միջնախարարական քննարկումներու հիմամբ, որոշում առնուած է չերկարաձգելու թրքական ապրանքներու ներմուծման արգելքը: Վերջին մէկ տարուան ընթացքին դրուած արգելքը ունեցած է դրական եւ բացասական տնտեսական անդրադարձներ։

Նշենք, որ հոկտեմբեր 2020-ին, Հայաստանի կառավարութեան որոշումով, արգիլուած էր թրքական ապրանքներու Հայաստան ներածումը` հաշուի առնելով Անգարայի անթաքոյց աջակցութիւնը Պաքուին` 44-օրեայ պատերազմի ընթացքին: