0
0
Փրովիտընս, Րոտ Այլընտ.- Հ.Ե.Դ.-ի 76րորդ Ողիմպիական խաղերը տեղի ունեցան Րոտ Այլընտ նահանգի մայրաքաղաքին մէջ, որ տեւեց Հինգշաբթի Սեպտեմբեր 3էն մինչեւ Երկուշաբթի Սեպտեմբեր 7, հիւրընկալութեամբ տեղւոյն «Վարանդեան» մասնաճիւղին: Մասնակիցներն ու ներկաները ժամանած էին տարբեր նահանգներէն, եւ ոմանք նոյնիսկ դրացի երկիրներէ: Անոնք բոլորն ալ վայելեցին Փրովիտընսի կեդրոնի պանդոկներն ու ճաշարանները: Այս առթիւ տեղւոյն նահանգային կեդրոնական շէնքին վրայ կը ծածանէր հայոց եռագոյնը:
Ժողովուրդը առիթն ունեցաւ, ոչ միայն խաղերուն ներկայ գտնուելու, այլ նաեւ ճաշկերոյթներու եւ պարահանդէսներու մասնակցելու, ըմբոշխնելու հայկական երաժշտութիւններ, գնահատելու հայկական նկարիչներու գործերը, որոնք ցուցադրուած էին Gallery Z-ի մէջ, եւ օգտուելու պանդոկներու կողքի գտնուող հսկայական վաճառատուներու ճոխութենէն… Եւ Վերջապէս, Սեպտեմբեր 5ին, վայելելու քաղաքին կեդրոնը կատարուող գետակներու վրայ կատարուող հրավառութիւնը (waterfire), որուն ընթացքին երգուեցան հայկական գործեր: Մանուկ Գաբրիելեանի շնորհիւ, ճոխ էր հայկական երաժշտութիւնը: Երգերուն ձայնը արձագանգեց մօտակայ պանդոկներու սենեակներէն ներս՝ դէպի գետ հրաւիրելով երիտասարդ հայորդին:
Ուրբաթ երեկոյ, վեթերաններու համար տեղի ունեցաւ յատուկ ընդունելութիւն,որուն ընթացքին ներկաները ճաշեցին եւ հայրենի երաժշտութիւնը վայելեցին: Նուագախումբը բաղկացած էր աւագասրինգի վարպետ Հաչիկ Գազարեանէ, ուտի վարպետ ու երգիչ Ճօ Գույումճեանէ, կիթարահար Քէն Գալայճեանէ, եւ թմբկահար Ճէյսըն Նարոյեանէ: Միեւնոյն գիշերը, այլ պարահանդէս մը տեղի ունեցաւ, ու «Արցախ» նուագախումբը ելոյթ ունեցաւ, որուն հետեւեցաւ Տի.Ճէյ. Յարութը: Շաբաթ օրուայ պարահանդէսի աստղերն էին «Առաւօտ» նուագախումբը, մասնակցութեամբ Մէլ Պարսամեանի: Կիրակի գիշերուայ պարահանդէսը աւելի հարուստ մթնոլորտ ստեղծեց:
Կիրակի կէսօրուան ընթացքին, բացման արարողութիւնը տեղի ունեցաւ, ուր խօսք առին Րոտ Այլընտի Ուորուիք քաղաքի քաղաքապետ Սքաթ Աւետիսեանը, Քրէնսթըն քաղաքի քաղաքապետ Ալըն Ֆանկը, Արեւելեան Առաջնորդարանի Փոխառաջնորդ, Բարեջան Եպիսկոպոս Անուշաւան Դանիէլեանը, Սբ. Վարդանանց Եկեղեցւոյ հովիւ հյր. Կոմիտաս Պաղսարեանը, Հ.Ե.Դ. կեդրոնական կոմիտէութեան ատենապետ Լօրըն ՏաՍիլվան, եւ ուրիշներ: «Հայ Երիտասարդաց Դաշնակցութիւնը կարեւոր դեր խաղացած է հայ երիտասարդներու միջեւ կապերը տոկուն պահելու ուղղութեամբ: 
Երբեք չմոռնաք ձեր արմատները եւ ձեր ամերիկահայ ինքնութիւնը. Մնացէք հաւատարիմ ձեր հայկական տոհմային աւանդութիւններուն. Գործունեայ եղէ’ք, եւ միշտ յիշեցէք թէ մեր եկեղեցին ու ազգը պէտք ունին ձեզ», ըսաւ Եպիսկոպոս Դանիէլեանը, եւ աղօթքով ու օրհնութեամբ իր խօսքը աւարտեց:
Ողիմպիական խաղերու առնչութեամբ՝ ամէնէն բարելաւուած մասնաճիւղը Պոսթընի շրջանն էր: «Ըրնըսթ Նահիկեան Լաւագոյն Մարզական Ոգի» գնահատագրին արժանացաւ Նիւ Եորքի Ճասթին Գալաճեանը, իսկ Փրովիտընսէն Արմէն Թենքարեան ( 80 տարեկան) արժանացաւ “Քորի Թոսոյեան” վեթերաններու Կոլֆի գնահատագրին:
Ստորեւ, խմբային դասաւորումը.-
1. Փրովիտընս- 252.5 կէտեր
2. Ֆիլատէլֆիա- 232
3. Պոսթըն- 46.5
4. Տիթրոյթ- 43.5
5. Նիւ Ճըրզի- 20
6. Կրանիթ Սիթի – 17.5
7. Շիքակօ- 2
8. Ռէյսին- 1
9. Նիւ Եորք- 1
