0
0
«Այն ինչին, որ ականատես կը դառնանք այսօր, բացարձակապէս անընդունելի է եւ պէտք է արժանանայ հայ ազգի միահամուր հակազդեցութեան: Սերժ Սարգսեանի առաջնորդութեամբ կատարուած փորձը՝ իբրեւ թէ հայ եւ թուրք յարաբերութիւնները բարելաւելու ձգտող, ընդհակառակն, ապագայի նորանոր բարդութիւններու դուռ կը բանայ:…Կատարուածը խակութիւն է, կատարուածը թակարդ տանող է, կատարուածը բարոյականօրէն եւ քաղաքականօրէն սնանկացած քայլ մըն է, որ կրնայ շատ լուրջ հետեւանքներ ունենալ մեր երկրի անվտանգութեան եւ մեր ազգի վերելքին գծով: Մեր գործը պիտի ըլլայ ազգովին զգաստութեան հրաւիրել նախագահը եւ իր շրջապատը, ու խորտակել այս գործընթացը: Հետեւաբար, կը մնայ որ իւրաքանչիւր հայ մարդ, իւրաքանչիւր հայկական կազմակերպութիւն կամ միութիւն, իր խօսքը ըսէ եւ իր վերաբերմունքը արտայայտէ այս եղածին գծով, որպէսզի միահամուր ճիգերով կասեցնենք այս արշաւը, որ միայն Թուրքիոյ առաւելութիւններ մատուցելու հաշուոյն կը կատարուի:Թէ’ Հայաստանի եւ թէ Սփիւռքի տարբեր համայնքներուն մէջ բողոքի ալիքը պէտք է բարձրացնել յանուն մեր սերունդներու իրաւունքներուն եւ մեր ազգի գերագոյն շահերուն…» կը յայտնէ Հ.Յ.Դ. Բիւրոյի անդամ դոկտ. Վիգէն Յովսէփեան
