0
0
ԵՐԵՒԱՆ․- Մայիս 16-ին Ազգային ժողովին մէջ լրագրողներու հետ զրոյցի ընթացքին, Հ․Յ․Դ․ Բիւրոյի քաղաքական ներկայացուցիչ, Ազգային ժողովի «Հայաստան» խմբակցութեան պատգամաւոր Արմէն Ռուստամեան յայտնեց, թէ «Երբ ատրպէյճանական զօրքերը Հայաստանի տարածք ներխուժեցին, ՀԱՊԿ-ը պատրաստ էր համապատասխան քայլերու ձեռնարկելու եւ կը սպասէր Հայաստանի արձագանգին. Հայաստանը քաղաքական գնահատական պահանջեց Ատրպէյճանի գործողութիւններուն` զայն դարձնելով նախապայման ՀԱՊԿ-ի համար»։
Ռուստամեան կոչ ուղղեց դուրս գալու բոլորը մեղադրելու մօտեցումէն. «Մենք պէտք է հասկնանք, թէ մեր ընելիքը ո՛րն է: Եթէ մենք չփորձենք մեզ պաշտպանել, ոչ ոք մեզ պիտի պաշտպանէ: Մենք մեզ ներսէն եւ դուրսէն թուլացուցած ենք, հիմա ալ կը յայտարարենք, որ ոչ ոք մեր կողքը կանգնած է: Եթէ դուն այդպիսի յայտարարութիւն կ՛ընես, քու հիասթափութիւնդ կ՛արձանագրես: Իսկ արտաքին գործոց նախարարութիւնը ինչի՞ համար է, եթէ պէտք է յայտարարես, որ ոչ ոք քու կողքդ կանգնած չէ»:
Անդրադառնալով այն դիտարկումին, թէ Ռուսիան եւ ՀԱՊԿ-ը չեն կատարեր իրենց պայմանագրային պարտաւորութիւնները Հայաստանի հանդէպ, ան նշեց, որ անոնք չեն կրնար աւելի հայ ըլլալ, քան մենք. «Միջնորդի դերով հանդէս եկող ՀԱՊԿ-ը կամ Ռուսիան ոչինչ կրնան ընել, եթէ Հայաստանը իր իրաւունքները չի պաշտպաներ, եթէ դուն կ՛երթաս կ՛ըսես` ես կը ճանչնամ Ազրպէյճանի տարածքային ամբողջականութիւնը, հիմա ալ արդէն թիւերով կ՛արձանագրենք: Միջնորդը ինչպէ՞ս պէտք է պաշտպանէ այն հարցը, որ այդ տարածքային ամբողջականութեան մէջ պէտք չէ ըլլայ Ղարաբաղը: Հայաստանի տարածք ներխուժման ժամանակ ալ ՀԱՊԿ-ը ըսած է` ես պատրաստ եմ իմ բոլոր միջոցներովս ներկայ գտնուելու, կը սպասենք Հայաստանի արձագանգին: Հայաստանն ալ կ՛արձագանգէ այնպէս, որ ՀԱՊԿ գոյութիւն չունի: Քաղաքական գնահատական պահանջելը նախապայման դարձնելը շատ սխալ է: Նախ դուն պէտք է քու անվտանգութիւնդ ապահովելու քայլերը ապահովես: Պարզ չէ՞, որ ՀԱՊԿ-ի մէջ կան երկիրներ, որոնք կրնան ատոր դէմ ըլլալ: Այդ կառոյցը փոխադարձ համաձայնութեան եղանակով կը գործէ, միթէ՞ ատիկա նորութիւն էր Հայաստանի համար: Այն երկիրները, որոնք դէմ են, թոյլ չեն տար, որ այդ քաղաքական գնահատականը հնչէ», ըսաւ Ռուստամեան:
Ռուստամեան, որ նախապէս խորհրդարանի Արտաքին յարաբերութիւններու յանձնաժողովի նախագահն էր, շեշտեց, որ պրիւքսէլեան բանակցութիւններուն մէջ շահողը միայն Ատրպէյճանը եղած է:
