0
0
Կիրակի Ապրիլ 23-ի կէսօրէ ետք, Պոսթընահայութիւնը ոգեկոչեց Հայոց Ցեղասպանութեան 108-ամեակը, յատուկ ձեռնարկով մը, որ աննպաստ օդին պատճառով, փոխան քաղաքի կեդրոնական շրջանի «Ժառանգութեան Այգի»-ի, տեղի ունեցաւ Ուաթըրթաունի Հայ Կեդրոնին մէջ։
Հ․Մ․Ը․Մ․-ի սկաուտական կազմի տողանցքէն ետք, Վիքթորիա Ստեփանեան մեներգեց Ա․Մ․Ն․-ի եւ Հ․Հ․-ի քայլերգները։ Որուն հետեւեցաւ տէրունական աղօթք, կատարողութեամբ հայ առաքելական եկեղեցւոյ ներկայացուցիչներ՝ հայր Առաքել քհնյ․ Ալճալեանի, Ստեփան քհնյ․ Պալճեանի եւ Հայ Կաթողիկէ Սուրբ Խաչ (Պելմոնթ, Մասաչուսէց)հովիւ՝ Ղազար վրդ․ Պետրոսեանի։
Օրուան հանդիսավարն էր Քրիսթինա Այանեան, որ շեշտեց, թէ 108 տարի ետք նոր մարտահրաւէրներու առջեւ կը գտնուի հայ ժողովուրդը։ Ան յայտնեց, թէ Արցախի պաշարումը կը շարունակուի ամիսներէ ի վեր, հակառակ բազմաթիւ խոստումներու եւ կոչ ուղղեց որպէսզի ամերիկահայութիւնը շարունակէ ճնշում բանեցնել ղեկավարութեան վրայ, ընդհատելու համար Ատրպէյճանի զինուորական օժանդակութիւնը։
Օրուան բանախօսն էր «Հարվըրտ» համալսարանի հայագիտական ուսումնասիրուիւններու «Մաշտոց» ամպիոնի ղեկավար Քրիստինա Մարանչի, որ կարճ եւ տպաւորիչ կերպով ներկայացուց հայկական արուեստի եւ մշակոյթի քանդումը, սկսելով Հայոց Ցեղասպանութեան օրերէն մինչեւ Արցախեան պատերազմը։
Այս յաջող ձեռնարկին ներկայ էր Ուաթըրթաունի ներկայացուցիչ՝ Սթիւըն Օուընզ (Դեմոկրատական):
Գեղարուեստական յայտագրով ելոյթ ունեցաւ «Զուլալ» քառեակի երգչուհի Թենի Հաժժար, իր կողքին ունենալով ուտահար Տաթեւ Գրիգորեան։
Նշենք, թէ օր մը առաջ, շրջանի երիտասարդականը կազմակերպած էր քայլաչշաւ-ցոյց մը՝ Թուրքիոյ հիւպատոսարանին դիմաց։
