0
0
ԻՍԹ ՌԱՏԸՐՖՈՐՏ (Նիւ Ճըրզի)․- Շաբաթ, Մարտ 25-ի երեկոյեան տեղի ունեցաւ «Վերածնունդ.- Երգահանդէս՝ Նուիրուած Մեր Հերոսներուն» ձեռնարկը կազմակերպութեամբ տեղւոյն Հ.Օ.Մ.-ի «Ակնունի», «Արմենուհի», «Շաքէ» մասնաճիւղերուն, Հ.Մ.Ը.Մ.-ի, «Համազգային»-ին եւ Հ.Ե.Դ. «Արսէն» մասնաճիւղին:
Ամիսներ շարունակ աշխատանք տարուեցաւ մեծ յաջողութեամբ կազմակերպելու համար այս երեկոն, որուն տոմսերը սպառած էին շաբաթներ առաջ։
Ձեռնարկը սկսաւ Ա․Մ․Ն․-ի, Հայաստանի եւ Արցախի քայլերգներով, մասնակցութեամբ Հ․Մ․Ը․Մ․-ի սկաուտական երկսեռ կազմին եւ Հ․Ե․Դ․-ի անդամներուն։
Ապա բեմ բարձրացաւ ուտի մասնագէտ Արա Տինքճեան, որ տոհմիկ գործեր իւրայատուկ ոճով հրամցուց ունկնդիրներուն։ Ապա կարգը եկած էր «դէպի հայրենի հողեր կանչող» յուզիչ տուտուկը, յանձին Արսէն Պետրոսեանի։
Ստեփանակերտի «Համազգային»-ի գրասենեակի տնօրէն՝ հեղինակ Հերմինէ Աւագեան արտասանեց իր գործերէն քերթուածներ, ակնթարթ մը հանդիսատեսը փոխադրելով շրջապատուած Արցախ եւ խոր յուզում յառաջացնելով։
Ապա յաջորդաբար բեմ բարձրացան Արաբօ Իսպիրեան եւ Նունէ Եսայեան, որոնք իրենց երգերով մեծ խանդավառութիւն ստեղծեցին։ Անոնց երգացանկը հարուստ էր տոհմիկ, ազգային եւ յեղափոխական երգերով։
Այս հանդիսութեան տարբեր փայլք մը տուաւ «Համազգային»-ի «Նայիրի» պարախումբը, որուն աւելի քան հարիւր պարողներուն տարիքը կը տարուբերի երեքէն երեսունի միջեւ։ Հայրենի տոհմիկ տարազներով այս պարախումբին պարուսոյցն է Պարգեւ Սանոսեանը, որ տարիներէ ի վեր ամէնայն բծախմդրութեամբ եւ նուիրումով կը կատարէ իր պաշտօնը։ Այս ձեռնարկին համար, յատուկ Հայաստանէն ժամանած էր նաեւ Գագիկ Գինոսեանը, որ տարիներ շարունակ պրպտումներ կատարած էր հաւաքելով հին սովորութիւններ, կշռոյթներ եւ երանգներ։
Իր կողքին ունենալով թմբկահար Մխիթար Յակոբեանը, Գագիկ նաեւ բեմ բարձրացաւ եւ սուրերու պարերով խառն ներկայացուց «Չալմէ» գործը, որ մեծ խանդավառութիւն ստեղծեց, թնդացնելով սրահը։
Այսպէս, բազմաթիւ աստղեր երաժշտութեամբ, պարով եւ մշակոյթով ելոյթ ունեցան եւ յարգեցին յիշատակը 44-օրեայ պատերազմին նահատակուած հերոսներուն։
«Վերածնունդ»-ի կազմակերիչ յանձնախումբը խորին շնորհակալութիւն կը յայտնէ, բոլոր անոնց, որոնք թէ՛ նիւթապէս եւ թէ՛ բարոյապէս քաջալերեցին եւ օժանդակեցին։
Թղթակից
