Հ.Օ.Մ.-ի Արեւմտեան Շրջանի Հիմնադրութեան 40-ամեակ

1 0
Read Time:3 Minute, 9 Second

Աւելի քան 600 հազար տոլար հանգանակուեցաւ Հ.Օ.Մ.-ի Արեւմտեան շրջանի հիմնադրութեան 40-ամեակին, որ տեղի ունեցաւ Մարտ 12-ին Կլէնտէյլի Տաղլեան սրահին մէջ:

Նշենք, թէ Հ.Օ.Մ.-ի Արեւմտեան Ա.Մ.Ն.-ի Շրջանը, Հ.Օ.Մ.-ի Հիւսիսային Ամերիկայի շրջանէն բաժնուած էր 1984-ին, կեդրոնատեղի ունենալով Կլէնտէյլ ( Քալիֆորնիա)։ Շրջանը  ունի չորս Նահանգներու վրայ տարածուած 23 մասնաճիւղերու պատկանող շուրջ 1,100 անդամներ։ Հ.Օ.Մ.-ը ունի Ընկերային Ծառայութեան բաժանմունք մը, ինչպէս նաեւ Հոգեբանական Կեդրոն մը, 15 միօրեայ վարժարաններ, մանկամսուր մը եւ բազմաթիւ երիտասարդական ծրագիրներ, կրթաթոշակներ եւ այլ մարդասիրական օժանդակութեան ծրագիրներ։

Պատուոյ հիւրերու շարքին էին Տ. Պարգեւ Արք. Մարտիրոսեան (Արցախի նախկին Առաջնորդ), Առաջնորդ Հիւսիսային Ամերիկայի եւ Գանատայի Արհիապատիւ Տէր Միքայէլ Եպս. Մուրատեանի ներկայացուցիչ Տ. Արմենակ վրդ. Պետրոսեան, Հ.Օ.Մ.-ի Կեդրոնական Վարչութեան Ատենապետ դոկտ. Նայիրի Տէրտէրեան եւ անդամներ Մարալ Մաթոսեան եւ Արուսեակ Մելքոնեան, շրջանի Հայ Յեղափոխական Դաշնակցութեան Կեդրոնական Կոմիտէի ներկայացուցիչ Տարօն Տէր Խաչատուրեան եւ անդամներ, Հայ Մշակութային Հիմնարկութեան վարչութեան ներկայացուցիչ Դոկտ. Միրէյ Համբարեան, Ազգային Առաջնորդարանի Կեդրոնական Վարչութեան անդամ Ռոստոմ Այնթապլեան, եւ Ազգային Վարչութեան անդամ Ծովիկ Զէյթլեան:

Նաեւ ներկայ էին Քալիֆորնիոյ Նահանգային Ծերակոյտի անդամ Անթոնի Փորթոնթինօ, Նահանգային Խորհրդարանի անդամ Լօրա Ֆրիտմըն, ինչպէս նաեւ քոնկրէսական Ատամ Շիֆի ներկայացուցիչ Մարի Յովակիմեան։

Ա.Մ.Ն. Արեւմտեան Թեմի Առաջնորդ Թորգոմ Եպս. Տօնոյեան օրհնեց Հ.Օ.Մ.-ը յայտնելով.- «Աստուածային օրհնութիւնը անպակաս մնայ Հ.Օ.Մ.-ի ընդհանրական կեանքէն, Կեդրոնական Վարչութեան վրայէն, մեր շրջանի Շրջանային Վարչութեան վրայէն եւ բոլոր մասնաճիւղերու վրայէն, որովհետեւ Հ.Օ.Մ.-ը իր եզակի նկարագրով եւ իր յատուկ առաքելութեամբ մեր Ազգային, հայրենական ու Հայաստան, Արցախ, Ջաւախք եւ սփիւռս աշխարհի շատ յատուկ անմրցելի ծառայութիւն կը կատարէ որու համար մենք … բոլորս կը խոնարհինք Հ.Օ.Մ.-ի ծառայութեան առջեւ»։

Հ.Օ.Մ.-ի Արեւմտեան Շրջանի Շրջանային Վարչութեան ատենապետուհի Վիքի Մարաշլեան փոխանցեց վարչութեան խօսքը, տեղեկացնելով, «Չորս տասնամեակներ շարունակ Հ.Օ.Մ.-ի մեր ակնառու միաւորը, իր նուիրեալ ընկերուհիներուն անխոնջ փաղանքով, հոգեկան ու ֆիզիքական անքակտելի կապերով ապրած է հայ ժողովուրդի մութ թէ լուսաւոր օրերուն մէջ: Շրջանս կարողացաւ իր նիւթական եւ բարոյական անընդհատ օգնութիւնը հասցնել հայրենի աղէտեալ շրջաններուն եւ սփիւռքի հայրենակիցներուն, ու կը շարունակէ նոյն ոգիով: Վստահ եղէք թէ կը ցանկանայինք որ այս ձեռնարկի հասոյթը յատկացուէր մեր ամբողջական եւ միասնական հայրենիքի զարգացման, հայրենիքի բարգաւաճման եւ հայ ազգի բարօրութեան: Ցաւոք սրտի՝ այս չէ այսօրուայ իրականութիւնը: Պարտաւոր ենք մեր ուղղութիւնը կեդրոնացնել լայնածաւալ մեր աշխատանքներուն տեղական եւ միջազգային գետնի վրայ՝ հասնելու մեր ժողովուրդին կարիքներուն, վտանգուած հայրենիքին, տեղահան եղած ընտանիքներու, զոհուած ազատամարտիկներու ծնողազուրկ երեխաներու եւ այրիներու, աղէտէ տուժած Լիբանանի եւ Սուրիոյ մէջ ապրող անյոյս հայ ժողովուրդին, եւ բազմազան այլ ծրագիրներու։…Հաւատարիմ ըլլալով “Ժողովուրդիս Հետ, Ժողովուրդիս Համար” իր կարգախօսին, աւելի քան մէկ դար ապրած Հ.Օ.Մ.-ը, ձեռք ձեռքի տուած իր անհամար համակիրներուն, ու իր ազգաշէն գործունէութեան զօրավիգ կանգնած հայ ժողովուրդին, անընկուն կամքով ու հաւատքով պիտի շարունակէ բարձր պահել մարդասիրական իր երկնագոյն դրօշը՝ մինչեւ մեր ազգային երազանքներու իրականացման պանծալի օրը»:

Մարաշլեան յատուկ շնորհակալութիւն յայտնեց Տէր եւ Տիկ. Ճէք եւ Զարիկ Եուրէճեաններուն, որոնք երկու յաջորդական տարիներ սրտաբուխ կերպով ստանձնեցին Հ.Օ.Մ.-ի Կալա ձեռնարկներու հովանաւորութիւնը, ինչպէս նաեւ Եմենիճեան եւ Գուճաքեան ընտանիքներուն եւ Հ.Օ.Մ.-ի Լաս Վեկասի  «Շուշի» մասնաճիւղի «Վերժին Գուճաքեան» շաբաթօրեայ վարժարանին, որ, ի յիշատակ իրենց մօր եւ վարժարանի հիմնադրին, առատաձեռն եւ իշխանական նուիրատուութիւն կատարեցին նպաստելու կարեւորագոյն ծրագիրներու:

Մոմավառութեան արարողութիւնը առիթ տուաւ որ յիշատակուին անոնք որոնք եկան, գործեցին ու անցան, ինչպէս նաեւ առիթ տալու որ վերահաստատուի մեր յանձնառութիւնը Հ.Օ.Մ.ի առաքելութիւնը շարունակելու։

Ընկերուհի Վիքի Մարաշլեան յուշատախտակ մը յանձնեց ձեռնարկի հովանաւորներ Տէր եւ Տիկին Ճէք եւ Զարիկ Եուրէճեաններուն: Կալային գլխաւոր բարերարներ՝ Եմենիճեան եւ Գուճաքեան ընտանիքները, նուիրեցին 250 հազար տոլար ի յիշատակ իրենց մօր ։

Գուճաքեան եւ Եմենիճեան ընտանիքներուն անունով խօսք առնելով Արտա Եմենիճեանը իր երախտագիտութիւնը յայտնեց իրենց մօր ժառանգութիւնը յարգող գեղեցիկ երեւոյթին նկատմամբ յիշելով թէ իրենց մայրը իր ժամանակակիցներէն յառաջադէմ էր, միշտ ինքնազարգացման կը դիմէր եւ միշտ մտահոգ էր յաջորդ սերունդի հայեցի դաստիարակութեամբ:

Ցուցադրուեցաւ Հ.Օ.Մ.-ի շրջանի պատմութեան եւ ներկայ աշխատանքներուն վերաբերեալ տեսաերիզ մը, նաեւ հանգուցեալ Վերժին Գուճաքեանի յիշատակին նուիրուած նմանօրինակ երիզ մը։

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles