0
0
Շաբաթ, Փետրուար 25-ին, աւելի քան 80 ընկերներու եւ համակիրներու ներկայութեամբ նշուեցաւ Հ․Յ․Դ․ Լօուըլի «Ահարոնեան» կոմիտէութեան 128-ամեակը, շրջանի Հայփոյնթի Հայ Առաքելական Եկեղեցւոյ «Էրմոնեան» սրահին մէջ։
Հակառակ աննպաստ օդին, շրջանի հովիւ Ստեփան Քհնյ․ Պալճեանի օրհնութեամբ, կարելի եղաւ նշել այս հանդիսութիւնը, որմէ ետք հնչեցին Ա․Մ․Ն․ եւ Հայաստանի քայլերգները։ Ապա Հ․Յ․Դ․-ի «Մշակ Բանուոր» օրհներգը կարդաց օրուան հանդիսավար Արա Ճգնաւորեան, որ ձեռնարկի ընթացքին նշեց նաեւ կատարուող ծրագրիրները շրջանի 25 աւաններէն ներս՝ հայոց ցեղասպանութեան մասին սեմինարներ, հայկական դրօշի բարձրացում եւ ի յիշատակ հայոց ցեղասպանութեան հռչակագիր։
Ապա բացման խօսքով ելոյթ ունեցաւ շրջանի Հայ Դատի ատենապետ Ստեփան Տիւլկարեան, որ նշեց, թէ գրեթէ վեց սերունդներէ ի վեր կը շարունակէ գործել այս կոմիտէութիւնը։
Հ․Յ․Դ․ Ա․Մ․Ն․ Արեւելեան շրջանի կեդրոնական կոմիտէի ներկայացուցիչ Անի Չաղլասեանը, իր խօսքին մէջ ողջունեց ներկաները եւ շնորհաւորեց Լօուըլի կոմիտէութեան 128-ամեակը։ Ան շեշտեց, թէ Հ․Յ․ Դաշնակցութիւնը ներկայ է եւ կը պայքարի բոլոր ճակատներուն վրայ։ Ան կոչ ուղղեց ներկաներուն շարունակել իրենց աջակցութիւնը Հ․Յ․Դ․-ին եւ Հայ Դատին։
Օրուան գլխաւոր բանախօսն էր Հայփոյնթի Հայ Առաքելական եկեղեցւոյ հոգեւոր հովիւ Տէր Վարդ քհնյ․ Կիւզէլեանը:
«Հայ ժողովուրդի համար դարերու կեղեքումներու ողբը, որ իր գագաթնակէտին հասաւ 1915-1923 թուականներուն սարսափելի ցեղասպանութիւններով, միայն քաջալերեց մեր ժողովուրդին ունենալ հաստատ յանձնառութիւն՝ պահպանելու աշխոյժ հայկական համայնքային կեանքը եւ մշակութային ինքնութիւն,ը ինչպէս Հայաստանի, այնպէս ալ ամէնուրէք՝ Արցախէն մինչեւ Սփիւռք»,- յատնեց ան։
Շրջանի հայ Դատի գործօն ընկերներէն՝ Ճօ Տակտիկեան ներկայացուց ներկայ Հայաստանի կեանքն ու պայմանները։ Ան թուարկեց եւ նշեց շարք մը ծրագրեր, որոնց միջոցաւ Հայաստանի քաղաքացիները կը նախաձեռնեն լուծել անձնական եւ հասարակական խնդիրները:
Օրուան ընթրիքը պատրաստուած էր շրջանի Հայ Օգնութեան Միութեան մասնաճիւղի կողմէ։
