0
0
ԵՐԵՒԱՆ․- Մայիս 25-ին, Երեւանի ժամանակացոյցով՝ կէսօրէ ետք ժամը 2:20-ի շուրջ, Ատրպէյճանի զինուած ուժերու խումբ մը զինուորներ, իրենց հրամանատարներուն կազմակերպութեամբ, ապօրինի կերպով հատեցին Հայաստանի Գեղարքունիքի մարզի Վարդենիս համայնքի վարչական տարածքին մէջ գտնուող Վերին Շորժա բնակավայրի սահմանային հատուածի Հայաստանի պետական սահմանը եւ, ունենալով Հայաստանի տարածքային ամբողջականութիւնը խախտելու դիտաւորութիւն` բռնութեան կոչեր ուղղեցին նշեալ շրջանին մէջ պահպանութիւն իրականացնող Հայաստանի զինուած ուժերուն նկատմամբ` պահանջելով դիմադրութիւն ցոյց չտալ ու ազատել տարածքը:
Յառաջացած վիճաբանութեան ընթացքին, անոնք դիտմամբ կրակոցներ արձակեցին Հայաստանի զինուած ուժերուն ուղղութեամբ, այդ պատճառով ալ N զօրամասի պայմանագրային զինուոր, կրտսեր քսանապետ Գէորգ Խուրշուտեան (1989-ի ծնունդ) վիրաւորուեցաւ որովայնէն: Ան փոխադրուելէ ետք Գեղարքունիքի հիւանդանոցը՝ մահացաւ: Գէորգ Խուրշուտեանը Հ․Յ․Դ․ Արարատի «Սմբատ Թաթոսեան» կոմիտէութեան վաստակաշատ անդամ Եուրա Խուրշուտեանի որդին էր եւ հայր՝ երկու անչափահաս երեխաներու:
Հայաստանի արտաքին գործոց նախարարութիւնը հրապարակեց յայտարարութիւն մը, որուն մէջ անդրադարձաւ հայ զինուորի նահատակութեան` նշելով, որ Ատրպէյճան կը փորձէ քողարկել Հայաստանի տարածքին մէջ ապօրինի զինուորական գործողութիւնները` շրջանառութեան մէջ դնելով կեղծ տեղեկատուութիւն: Նախարարութիւնը յայտնեց, որ հայկական կողմը պատրաստ է ներգրաւելու միջազգային հետաքննութիւն` նշեալ մահաբեր դէպքին բոլոր հանգամանքները յստակացնելու նպատակով: Նախարարութիւնը խստօրէն դատապարտեց Ատրպէյճանի կողմէ Մ․Ա․Կ․-ի անդամ պետութեան` Հայաստանի ինքնիշխան տարածքին նկատմամբ կատարուած բացայայտ ոտնձգութիւնը` զայն նկատելով միջազգային իրաւունքի սկզբունքներու խախտում:
