Հ․Յ․Դ․ Հայաստանի Գերագոյն Մարմինի Յայտարարութիւնը
«Համախմբուելու եւ այս անհեռանկար ընթացքը կասեցնելու ժամանակն է»
Վերջին օրերին երկրում ընթացող զարգացումները եւ, յատկապէս, դատաիրաւական համակարգի վերաբերեալ վարչապետ Նիկոլ Փաշինեանի մօտեցումները կրկին մեր հանրային-պետական կեանքի ալեկոծման պատճառ են դարձել: Այս կապակցութեամբ հարկ ենք համարում կատարել հետեւեալ արձանագրումները.
– Տարբեր հարցերի վերաբերեալ իշխանութիւնների չկշռադատուած, խնդրայարոյց եւ տարակուսանքի տեղիք տուող որոշումները, այլակարծութեան ակրեսիւ մերժումը թշնամանքի եւ անհանդուրժողականութեան մթնոլորտ են ստեղծում, ինչը ջլատում է մեր ժողովրդի հաւաքական ներուժը:
-Քաղաքական, հանրային դաշտում դաւադիրներ եւ դաւաճաններ փնտռելու մտասեւեռումը հարուածի տակ է դնում մեր ազգային անվտանգութիւնը, համերաշխութիւնը, Հայաստան-Արցախ միասնութիւնն ու մեր պաշտպանական համակարգը:
– Վերջին մէկ տարում երկրի քաղաքական իշխանութիւնն ունէր բաւարար օրիանակութիւն, իսկ 2018-ի Ազգային ժողովի արտահերթ ընտրութիւններից յետոյ լիակատար հնարաւորութիւն հանրային կեանքի բոլոր ոլորտներում, այդ թւում` դատաիրաւական համակարգում (դատարաններ, դատախազութիւն, քննչական մարմիններ, ոստիկանութիւն) սկսելու բոլորիս կողմից այդքան սպասուող բովանդակային եւ խորքային փոփոխութիւնները:
-Ըստ էութեան չիրացնելով գործող Սահմանադրութեամբ եւ Հայաստանի Հանրապետութեան օրէնսդրութեամբ վարչապետին վերապահուած լայն լիազօրութիւններն ու պարտականութիւնները` Փաշինեանը որդեգրել է ժողովրդի գործօնը շահարկող մարտավարութիւն:
-Դեռեւս մեքանիզմներով եւ բովանդակութեամբ անորոշ անցումային արդարադատութեան նպատակների համար դատական իշխանութեան կազմաքանդումը վտանգում է մեր երկրի արդարադատութեան համակարգը:
Սիրելի՛ հայրենակիցներ, Հ․Յ․ Դաշնակցութիւնը իրավիճակը գնահատում է տագնապեցնող. սխալ ճանապարհով ճիշդ հանգրուանի չենք հասնի:
Ստեղծուած իրավիճակի եւ հետեւանքների ամբողջ պատասխանատուութեան հասցէատէրը առաջին հերթին իշխանութիւններն են: Այնուամենայնիւ, ոչ ոք իրաւունք չունի դիտորդի կարգավիճակով փաստելու, թէ ինչպէս է մաշւում ու հիւծւում պետութիւնը, թէ ինչպէս է ոչ խոհեմ գործելաոճն ու քաղաքական վարքագիծը սասանում մեր պետականութեան հիմքերը:
Համախմբուելու եւ այս անհեռանկար ընթացքը կասեցնելու ժամանակն է:
Դաշնակցութիւնը նախաձեռնում է բոլոր կողմերի հետ քննարկել իրավիճակը լիցքաթափելու, պետականաշինութեան գործընթացը բնականոն հուն տեղափոխելու, ժողովրդի ակնկալած բարեփոխումներն իրականութիւն դարձնելու ուղիները:
Մայիսի 23-ին, ժամը 19:00-ին, Հ․Յ․Դ․-ն հրաւիրում է հանրահաւաքի` ներկայացնելու առկայ իրավիճակից դուրս գալու ելքերի վերաբերեալ իր մօտեցումներն ու տեսակէտները:
Հ․Յ․Դ․ ՀԱՅԱՍՏԱՆԻ ԳԵՐԱԳՈՅՆ ՄԱՐՄԻՆ
21 Մայիս 2019
