ՀԱԼԷՊԻ ՄԷՋ ԼՈՅՍ ՏԵՍԱՒ ԼԵՒՈՆ ՇԱՌՈՅԵԱՆԻ ՆՈՐ ԳԻՐՔԸ

0 0
Read Time:2 Minute, 27 Second

levon sharoian

Արտասահմանի հայ գաղութներուն համար զարմանալի, ու նոյնիսկ անհաւատալի պիտի թուի այսպիսի լուր մը,- Հայերէն նոր գիրքի մը հրատարակութիւնը Հալէպ՝ պատերազմի ամենէն դաժան պայմաններուն տակ, տնտեսական, կենցաղային ու հոգեբանական վհատեցուցիչ մթնոլորտի մէջ։
Մարդ ինքնաբերաբար հարց պիտի տայ.-«Ուրկէ՞ կը գտնէ մեր ժողովուրդը դիմադրողական այս ոգին իր մէջ, ուրկէ՞ կը ստանայ՝ անբնական պայմաններու տակ գեղեցիկը ստեղծագործելու այս ներուժը»։
Ահաւասիկ իրական խապրիկ մը Հալէպէն։
Դեռ քանի մը օր առաջ, Հալէպի Ոսկետառ տպարանէն լոյս տեսաւ հալէպաբնակ մեր սիրելի աշխատակից Լեւոն Շառոյեանի նոր մէկ գիրքը, որ կը կրէ թելադրական խորագիր մը,- «Դեգերումներ Հայ Գիրի Եւ Պատմութեան Գետեզրին»։
Հատորը հրատարակուած է Բերիոյ Հայոց Թեմի «Այգ» մատենաշարով, որպէս այդ շարքին 20-րդ թիւը։ Գիրքը ծաւալուն է ու պատկերազարդ, կը բաղկանայ 320 էջէ։
Հատորը կը բացուի զոյգ նախաբաններով։ Մէկը՝ ստորագրուած է Բերիոյ Թեմի առաջնորդ Շահան Արք. Սարգիսեանի, միւսն ալ՝ Պոլսոյ «Մարմարա»-ի խմբագրապետ Ռոպէր Հատտէճեանի կողմէ։
Նորատիպ այս ժողովածուն Շառոյեանի ստորագրութիւնը կրող երրորդ գիրքն է։ Ինչպէս պիտի յիշեն մեր ընթերցողները, Լ. Շառոյեանի անդրանիկ գիրքը, որ ի մի կը բերէր Պոլիս տրուած այցելութեան մը տպաւորութիւնները, հրատարակուած էր 2003-ին, «Մարմարա»-ի նախաձեռնութեամբ։ Աւելի ուշ, Շառոյեան հրատարակեց շատ սիրուն երկրորդ գիրք մըն ալ՝ «Պուէնոս Այրէս, Արմենիա փողոց» (2014), որ ամբողջովին ձօնուած էր Արժանթինի հայ գաղութին եւ լուսարձակ կը բանար անոր վերելքին ու ժամանակակից ընկրկումներուն վրայ։
Այս նոր գիրքով, մեր սիրելի գրողը անցում մը կը կատարէ տպաւորապաշտ գրականութենէն դէպի գրավերլուծական աշխարհ, որ արդէն իր նախասիրած հիմնական մթնոլորտն է։ Շառոյեան վարպետ գրավերլուծող մըն է, գիրքերու մնայուն սիրահար մը, որ տեւաբար կը պեղէ մեր գրականութեան ակօսները, կը սիրէ ոգեկոչել հայ մշակոյթի մեծ ու երախտարժան դէմքեր, նորութիւններ յայտնաբերել անոնց կեանքին ու վաստակին մէջ։
Հիմա, այս գիրքով՝ ա՛յդ է որ կ՚ընէ Շառոյեան։ Ան շատ հաճելի պտոյտի մը կ՚առաջնորդէ մեզ՝ դէպի «հայ գիրի եւ պատմութեան գետեզերքը»։ «Դեգերումներ»ը շա՛տ տեղին գործածուած վերնագիր մըն է այս գիրքին համար, որովհետեւ իւրաքանչիւր ընթերցող կը պտըտկի, կը դեգերի հեղինակին հետ թեւանցուկ՝ նախ դէպի սփիւռքահայ գրականութեան երփներանգ պարտէզները, յետոյ ալ՝ դէպի մեր մօտիկ անցեալի պատմութեան բաւիղները…։
Շառոյեան հիւթեղ ու սրտախօսիկ լեզու մը ունի, վճիտ արեւմտահայերէն մը, պատմելու, վերլուծելու, բացատրելու կամ պարզաբանելու ինքնուրոյն եզակի ոճ մը, որ իր գլխաւոր արժանիքն է։ Այս արժանիքին վրայ կ՚աւելնայ՝ շարունակ հետաքրքրաշարժ ու շահեկան նիւթեր մշակելու իր շնորհքը, որ դիւրաւ իրեն կը կապէ բոլո՛ր ընթերցողները անխտիր։ Ու հոսկէ ալ՝ իր գրութիւններուն վայելած լայն ժողովրդականութիւնը, տարածուն գնահատանքը։
«Դեգերումներ»ը մեզ դէմ յանդիման կը բերէ հայ մշակոյթի ու գիրի բազմաթիւ սիրելի դէմքերու։ Հոս կը տողանցեն Յակոբ Մարթայեանն ու Վազգէն Շուշանեանը, Կարօ Փօլատեանն ու Զարեհ Որբունին, Արփիկ Միսաքեանն ու Անդրանիկ Ծառուկեանը, Սիրան Սեզան ու Պօղոս Սնապեանը, Արմէն Դարեանն ու բանաստեղծուհի Մետաքսէն, պատմական դէմքերէն՝ տոքթ. Սերվիչէնն ու տոքթ. Տիգրան փաշա Փէշտիմալճեանը, եւայլն, եւայլն։ Ընդարձակ ուսումնասիրութիւններ կան Ատրպատականի ու Մարսիլիոյ հայ գաղութներուն մասին։ Կան հետաքրքրական անդրադարձումներ հալէպահայ կեանքի ինչ-ինչ երեսներուն, հալէպահայ թերթերու պատմութեան, սփիւռքահայ բժշկական գրականութեան ու մամուլի, հայրենակցական միութիւններու անցեալի փառքին մասին, ու դեռ շատ բան։
Ճոխ նիւթերով, բովանդակալից ու պատուաբեր հրատարակութիւն մըն է այս, որ կրկնակիօրէն կ՚արժեւորուի՝ ծննդավայր ունեցած ըլլալով Հալէպը։ Այրո՜ղ ու քանդուո՜ղ Հալէպը, որ յուսահատ կը սպասէ բաղձալի խաղաղութեան։

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles