Վենետիկի Սուրբ Ղազար Մայրավանքին Մէջ Հայոց Ցեղասպանութեան Լուսանկարներու Ցուցահանդէս

0 0
Read Time:1 Minute, 49 Second

 

DSC04681

Ապրիլ 24-ին, Մխիթարեան Միաբանութեան Վենետիկի Սուրբ Ղազար Մայրավանքին մէջ, տեղի ունեցաւ Հայոց Ցեղասպանութեան 101-րդ ամեակի յիշատակում:
Հայ եւ օտարազգի հաւատացեալներու հոծ բազմութեան ներկայութեամբ՝ հանդիսաւոր Պատարագ մատուցուեցաւ Մխիթարեան Միաբանութեան Ընդհ. Աբբահայր Հ. Եղիա Ծ. Վրդ. Քիլաղպեանի կողմէ:
Աբբահայրը իր քարոզին մէջ շեշտեց կարեւորութիւնը այս նուիրական թուականին, մանաւանդ յիշատակումը մեր բիւրաւոր մարտիրոսներուն, որոնք իրենց արիւնով մեզի կտակեցին քրիստոնէական հաւատքն ու մեր ազգային արժէքները, ինչպէս նաեւ հայրենի հողերուն կառչած մնալու սրբազան աւանդը:
Այս առիթով պատարագի աւարտին, գորգագործ Մեգերեան ընտանիքի կողմէ Մխիթարեան Միաբանութեան նուէր յանձնուեցաւ, Հայոց Ցեղասպանութեան հարիւրամեակին նուիրուած հայկական ձեռագործ նրբահիւս գորգ մը ի յիշատակ իրենց ծնողներուն:
Արարողութեան ներկայ էր Հայաստանի Հանրապետութեան Հռոմի Ս. Աթոռի մօտ դեսպան, Մեծարգոյ Պրն. Միքայէլ Մինասեանը, որ իտալերէնով խօսք առնելով յիշեցուց կարեւորութիւնը Հայոց Ցեղասպանութեան հարիւրամեակի առիթով Սուրբ Պետրոս տաճարին մէջ մատուցուած պատարագին՝ Հռոմի Քահանայապետ, Փրանկիսկոս Պապի կողմէ, որուն ընթացքին Ս. Գրիգոր Նարեկացին հռչակեց որպէս Տիեզերական եկեղեցւոյ վարդապետ: Դեսպանը նշեց թէ Ապրիլ 24-ը կամ ընդհանրապէս 1915ը մեզի համար լոկ թուական մը չէ միայն, այլ մեր կեանքին, մեր մշակոյթին ու մեր գոյապայքարին հետ սերտ առնչութիւն ունեցող իրականութիւն մը, քանի մենք ցեղասպանուած ամբողջ ժողովուրդի մը ժառանգորդներն ենք: Ան շեշտեց նաեւ թէ ինչպէս Հայոց Մեծ եղեռնը առնչուած է այսօրուան աղետալի դէպքերուն, որոնց ականատեսն ենք Միջին Արեւելքի մէջ, յատկապէս Քրիստոնեաներու կրած հալածանքներն ու բազմաչարչար տառապանքները. այսօր քրիստոնեաներու ներկայութիւնը վտանգուած է այնտեղ, եւ Հայաստանը գրեթէ միակ Քրիստոնեայ երկիրը կը մնայ այդ տարածաշրջանին մէջ: 20160422_145305IMG-20160425-WA014
Այս նուիրական առիթով, Մայրավանքի քարայատակին մէջ բացումը տեղի ունեցաւ «Ժողովուրդի մը տառապանքէն անդին – Հայոց Ցեղասպանութեան յիշողութեան ուղիներով» լուսանկարներու ցուցահանդէսին: Հ. Վահան Ծ. Վրդ. Օհանեան՝ գլխաւոր հեղինակն ու կազմակերպողը, համառօտ ներկայացուց երկար ամիսներու աշխատանքի արդիւնքը, ցուցահանդէսի իմաստը եւ փոխանցուող պատգամը:
Ցուցահանդէսի գլխաւոր նպատակն է մօտէն ծանօթացնել իտալացի հասարակութեան Հայոց Ցեղասպանութիւնը՝ պատմական, մշակութային տարբեր երանգներով: Մօտաւորապէս հարիւրի չափ պաստառներ ժամանակագրական հերթականութեամբ՝ կը ներկայացնեն հայ ժողովուրդի առօրեան օսմանեան կայսրութեան մէջ, համիտեան ջարդերը, սահմանադրութեան հռչակումը, Ատանայի կոտորածը, ջարդի հեղինակները, գլխաւոր հայ մտաւորականներու եւ իրենց ընտանիքներու լուսանկարներ, Մխիթարեան նահատակ Հայրեր, զանգուածային տեղահանութեան տպաւորիչ տեսարաններ, սպանդի ահարկու պատկերներ, օտար հեղինակաւոր դեսպաններու, մտաւորականներու եւ ականատեսներու վկայութիւններ, տարբեր որբանոցներու եւ որբերու խմբանկարներ, որբահաւաքի դերակատարներ, հարեմի զոհ կիներ, կործանած եկեղեցիներ, վանական համալիրներ ու առյաւէտ կորած պատմամշակութային գանձեր, աշխարհի տարբեր երկիրներու մէջ կանգնած Ցեղասպանութեան յուշարձաններ, հայ որբերու ի նպաստ անգլիատառ դրամահաւաքի կոչեր, Ցեղասպանութիւնը Հայ արուեստագէտներու աչքերով եւ իւղանկարներ ու քանդակներ:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles