ՄԻ՛ՇՏ ԱՐԹՈՒՆ ԵՂԻՐ…ԺՈՂՈՎՈՒՐԴ ՀԱՅՈՑ

0 0
Read Time:1 Minute, 38 Second

main

Հայոց Ցեղասպանութեան 101-ամեակը նշուեցաւ ամենուրեք:
Մի՛շտ արթուն էր հայորդին…:
Արդարեւ, յիշատակի արարողութիւններ կատարուեցան Հայաստանի, Արցախի եւ Սփիւռքի բազմաթիւ քաղաքներու մէջ:
Ա.Մ.Ն. Արեւելեան շրջանէն ներս, բազմաթիւ գաղթօճախներ, որոնց կարգին յատկապէս Նիւ Եորք, Ուաշինկթըն, Պոսթըն, Շիքակօ եւ Տիթրոյթ, կազմակերպեցին հաւաքներ եւ ցոյցեր: Պարագան նոյնն էր Գալիֆորնիոյ, ուր աւելի քան վաթսուն հազար հայորդիներ ցոյց կատարեցի Թուրքիոյ հիւպատոսարանին մօտ:
Գանարայի մէջ, նոյնքան գործունեայ էր գաղութը, որ մայրաքաղաք Օթաուա մեկնելով կատարեց քայլարշաւ եւ ցոյց: Իսկ վարչապետ Թրիւտօ, ամենայն իրապաշտութեամբ շեշտեց թէ 101-եակին պատահածը՝ Ցեղասպանութիւն էր, բառ մը՝ հաստատում մը…որ անգամ մը եւս Ա.Մ.Ն.-ի նախագահ Օպաման չուզեց արտասանել:
Լատին Ամերիկայի, Ովկիանիոյ, Եւրոպայի եւ Միջին Արեւելքի զանազան գաղութներ նոյնքան եռանդով նշեցին 101-ամեակը:
Ապրիլ 24-ին Հայաստանի Հանրապետութեան բարձրագոյն ղեկավարութիւնը Ծիծեռնակաբերդի յուշահամալիրին մէջ յարգանքի տուրք մատուցեց 1915-ին Թուրքիոյ կողմէ կատարուած այս ոճիրին` Հայոց ցեղասպանութեան անմեղ զոհերու յիշատակին:
Ծիծեռնակաբերդի բարձունք ժամանած էին աշխարհահռչակ հայ երգիչ Շարլ Ազնաւուր, հոլիվուտեան դերասան Ճորճ Քլունի, «Օրորա» մրցանակաբաշխութեան յաւակնորդներն ու մասնակիցները, «Ընդդէմ ցեղասպանութեան յանցագործութեան» համաշխարհային երկրորդ համաժողովի մասնակիցները:
Հայաստանի Հանրապետութեան նախագահ Սերժ Սարգսեան` իր կողակից Ռիթա Սարգսեանի հետ, օրէնսդիր եւ գործադիր մարմիններու ներկայացուցիչներ, զինեալ ուժերու բարձրագոյն սպայակազմը, քաղաքական գործիչներ, մտաւորականներ, Հայաստանի մէջ հաւատարմագրուած դիւանագիտական ներկայացուցչութիւններու ղեկավարներ, հայրենակցական միութիւններու, հասարակական կազմակերպութիւններու անդամներ ժամանած էին Ծիծեռնակաբերդ:
Պաշտօնական բարձրաստիճան այցելուներէն կողքին, օրուան կանուխ ժամերէն մինչեւ երեկոյ, բազմահազար հայորդիներ այցելեցին Ծիծեռնակաբերդի բարձունք` իրենց յարգանքի տուրքը մատուցելու հայութեան մէկուկէս միլիոն սուրբ նահատակներու յիշատակին:
Անմար կրակին մօտ, Ամենայն Հայոց Գարեգին Բ. կաթողիկոսին հանդիսապետութեամբ Սրբոց Նահատակաց բարեխօսական յատուկ կարգ կատարեց հոգեւոր դասը, ներկաները մէկ վայրկեան լռութեամբ յարգեցին նահատակուած 1,5 միլիոն հայերուն յիշատակը:
Նշենք թէ, օր մը առաջ՝ Ապրիլ 23-ին, Հայոց Ցեղասպանութեան 101-րդ տարելիցին առիթով, Երեւանի Ազատութեան հրապարակէն դէպի Ծիծեռնակաբերդի յուշահամալիր սկիզբ առաւ ջահերով աւանդական երթը, որուն մասնակցեցան բազմահազար երիտասարդներ, տարբեր կուսակցութիւններու, հասարակական կազմակերպութիւններու, ուսանողական միութիւններու ներկայացուցիչներ:
Մասնակիցները Ծիծեռնակաբերդի անմար կրակին շուրջ իրենց յարգանքի տուրքը մատուցեցին Ցեղասպանութեան անմեղ սուրբ զոհերուն յիշատակին: Անոնք միասնաբար աղօթեցին, ապա կրակին շուրջ խոնարհեցուցին Հայոց ցեղասպանութիւնը ճանչցած երկիրներուն դրօշակները:
Նշենք, որ նմանօրինակ ջահերթ տեղի ունեցաւ նաեւ Արցախի Հանրապետութեան մայրաքաղաք Ստեփանակերտի մէջ:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %
Previous post «ՀԱՅԵՐԸ ԵՒ ՊԱՂ ՊԱՏԵՐԱԶՄԸ» ԳԻՏԱԺՈՂՈՎԸ՝ ԱՆՀՐԱԺԵՇՏ ԵՒ ՈՒՍԱՆԵԼԻ ՁԵՌՆԱՐԿ ՄԸ
Next post Վենետիկի Սուրբ Ղազար Մայրավանքին Մէջ Հայոց Ցեղասպանութեան Լուսանկարներու Ցուցահանդէս

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles