0
0
Արցախի ժողովուրդին նկատմամբ լիակատար զօրակցութիւն ցուցաբերելու եւ Արցախի սահմանագիծին վրայ Ատրպէյճանի զինեալ ուժերու զինուորական գործողութիւնները դատապարտելու նպատակով, Ապրիլ 3-ին, Աթէնքի մէջ Ատրպէյճանի դեսպանատան դիմաց համախմբուեցաւ Աթէնքի հայութիւնը:
Բազմամարդ ցոյցը կազմակերպուեցաւ Հ.Յ.Դ. Յունաստանի Հայ դատի յանձնախումբին նախաձեռնութեամբ:
Հ.Յ.Դ. Երիտասարդական եւ Պատանեկան միութեան անդամները, իրենց պարզած պահանջատիրական պաստառներով եւ Հայաստանի ու Արցախի Հանրապետութեան դրօշներով` գլխաւորեցին խաղաղ, բայց եռանդուն ցոյցը:
Համախմբուած ժողովուրդը իր կարգախօսներով խստօրէն դատապարտեց Ատրպէյճանի զինուորական գործողութիւնները:
Ցոյցէն կարճ ժամանակ ետք Ազրպէյճանի դեսպանատան մէկ պաշտօնատարը ստանձնեց Ատրպէյճանի պետութեան ուղղուած բողոքի յուշագիրը, մինչ դեսպանատան դիմաց գտնուող հայութիւնը բարձրաձայն կը կրկնէր. «Արցախը մերն է»:
Հայութեան կողքին գտնուեցաւ նաեւ Պոնտական միութեան երիտասարդական խումբը` իր զօրակցութիւնը յայտնելով Արցախահայութեան:
