0
0
ԹՂԹԱԿԻՑ
Հ.Մ.Ը.Մ.-ի Արեւելեան Միացեալ Նահանգներու 22-րդ միջ-մասնաճիւղային մարզական խաղերը տեղի ունեցան Չորեքշաբթի, Յուլիս 4-էն սկսեալ մինչեւ Կիրակի, Յուլիս 8, 2012, նախաձեռնութեամբ` Հ.Մ.Ը.Մ.-ի Շրջանային Վարչութեան, հովանաւորութեամբ` Ա.Մ.Ն. Արեւելեան Շրջանի Բարեջան Առաջնորդ Բարձրաշնորհ Տ. Օշական Արք. Չօլոյեանի, ներկայութեամբ` Հ.Մ.Ը.Մ.-ի Կեդրոնական Վարչութեան անդամ եւ Արեւելեան Միացեալ Նահանգներու Շրջանի կապ` եղբ. Հրաչ Մեսրոպեանի, պատուոյ նախագահութեամբ Տէր եւ տիկին Գէորգ եւ Էլիզապէթ Գազանճեաններու, եւ հիւրընկալութեամբ` Հ.Մ.Ը.Մ.-ի Ուաշինկթընի մասնաճիւղին:
Հ.Մ.Ը.Մ.-ի տարեկան այս մարզական խաղերը, առիթ մըն են սատարելու Հ.Մ.Ը.Մ.-ի վսեմ նպատակին, երբ շրջանիս 10 մասնաճիւղերէն, ժամանած Հ.Մ.Ը.Մ.ականներ եւ համակիրներ, գօտեպնդուած Հ.Մ.Ը.Մ.-ի շունչով եւ ոգիով, կը հաւաքուին Միջ-մասնաճիւղային խաղերու դրօշին տակ` մրցելու` հայկական ազնիւ ոգիով, ստեղծելու` խանդավառ մթնոլորտ մը, ծառայելու` “Բարձրացի՛ր-Բարձրացո՛ւր“-ին, եւ միշտ ի միտի ունենալով` թէ այս խաղերէն յաղթական դուրս պիտի գայ միայն Հ.Մ.Ը.Մ.-ը: Հ.Մ.Ը.Մ.-ն էր յաղթականը, բարձրացողը… եւ բարձրացնողը:
Չորս օրերու վրայ երկարող խաղերու ընթացքին` դաշտերու վրայ, պանդոկի միջանցքներուն եւ ամէնուրէք հայ մարզիկը հանդիպեցաւ իր եղբօր ու քրոջ, որոնք ժամանած էին Արեւելեան Ամերիկայի տասը շրջաններու մասնաճիւղերէն.- Ալպընի, Նիւ Եորք, Նիւ Ճըրզի, Շիքակօ, Պոսթըն, Տիթրոյթ, Փրովիտէնս, Ֆիլատելֆիա, Ֆլորիտա եւ հիւրընկալ մասնաճիւղ Ուաշինկթընէն:
Յուլիս 4ին բոլոր մարզիկները, սկաուտները եւ համակիրները, խումբ առ խումբ ժամանեցին Միացեալ Նահանգներու մայրաքաղաք` Ուաշինկթընի “Woodly Park Marriott“ շքեղ պանդոկ, ուր տեղի ունեցաւ մասնաճիւղերու պատասխանատուներու կարճ ժողով մը, բացատրելու սոյն շաբաթավերջի մարզախաղերու դասաւորումը, օրէնքները եւ խստապահանջ կարգապահական պայմանները:
ԽՄԲԱՅԻՆ ՄԱՐԶԱԽԱՂԵՐ
Հինգշաբթի, Յուլիս 5, առաւօտեան ժամը 9-ին “Germantown“ շրջանի “Discovery Sports Center“ մարզահաշալիրի դաշտերուն վրայ սկսան խմբային խաղերը: Մօտաւորապէս 450 մարզիկ-մարզիկուհիներ, ծիլ, փոքր, կրտսեր, երէց եւ վեթերան դասակարգերով, իրենց մասնակցութիւնը բերին հետեւեալ մարզախաղերուն, ոտնագնդակի 6 խումբեր, վոլիպոլի 15 խումբեր, պասքէթպոլի 35 խումբեր, ընդհանուր 56 խումբեր եւ 77 խմբային խաղեր: Երեք օրերու վրայ երկարող Հ.Մ.Ը.Մ.ական բարձր ոգիով տեղի ունեցած մրցումներու արդիւնքներն են.-
Խաղաձեւ Ախոյեան Փոխ ախոյեան
Pee Wee Basketball Նիւ Ճըրզի Ուաշինկթըն
Pee Wee Soccer Ուաշինկթըն Ա. Ուաշինկթըն Բ.
Midget Basketball Նիւ Ճըրզի Տիթրոյթ
Junior Men’s Basketball Ֆիլատելֆիա Պոսթըն
Junior Women’s Basketball Նիւ Ճըրզի Պոսթըն
Senior Men’s Basketball Նիւ Ճըրզի Նիւ Եորք
Senior Women’s Basketball Ուաշինկթըն Նիւ Ճըրզի
Senior Men’s Soccer Ուաշինկթըն Պոսթըն
Senior Women’s Volleyball Ուաշինկթըն Նիւ Ճըրզի
Senior Men’s Volleyball Ուաշինկթըն Շիքակօ
Veteran Basketball Նիւ Եորք Ֆիլատելֆիա
ԱՆՀԱՏԱԿԱՆ ՄԱՐԶԱԽԱՂԵՐ
Անհատական մարզական խաղերուն արձանագրուած էին` Լողի 37 մարզիկ եւ աթլեթիզմի 50 մարզիկներ: Օդի չափազանց տաքութեան պատճառաւ, եւ նկատի առնելով մարզիկներու առողջութիւնը, որոշուեցաւ ջնջել աթլեթի խաղերը, որոնք տեղի պիտի ունենային Շաբաթ, Յուլիս 7ի առաւօտեան: Լողի մրցումները տեղի ունեցան “Discovery Sports Center“ մարզահամալիրի լողաւազանին մէջ, ուր ծնողներու եւ համակիրներու ջերմ քաջալերանքով մարզիկները մրցեցան ապահովելու ոսկի կամ արծաթ մետալներ, հիւրընկալ մասնաճիւղ Ուաշինկթընի մարզիկները արժանացան առաւելագոյն մետալներուն:
ՊԱՐԱՀԱՆԴԷՍ ԽՐԱԽՃԱՆՔ
Մարզիկներու կեցութիւն հաստատած պանդոկին մէջ, Ուրբաթ երեկոյեան տեղի ունեցաւ պարահանդէս, մասնակցութեամբ այս առիթով Հայաստանէն ժամանած աստղ երգիչ` Թաթա Սիմոնեանին եւ իր նուագախումբին, ընկերակցութեամբ` DJ Ռաֆֆիին: Թաթան իր ազգագրական երգերով խանդավառեց ներկաները, որոնք առաւօտեան ժամը երեքին սրահէն հեռացան բարձր տրամադրութեամբ:
ԳՆԱՀԱՏԱՆՔԻ ԵՐԵԿՈՅ
Շաբաթ, Յուլիս 7ի երեկոյեան Շրջանային Վարչութիւնը “Գնահատանքի Երեկոյ“ ձեռնարկեց հրաւիրելով 22րդ Մարզական Խաղերու պատւոյ նախագահներ Տէր եւ Տիկին Գէորգ եւ Էլիզապէթ Գազանճեաններու: Ներկայ էին ԹԵմիս Բարեջան Առաջնորդ Տ. Օշական Արք. Չօլոյեանը, Հայաստանի Հանրապետութեան արտակարգ եւ լիազօր դեսպան Նորին վսեմութիւն տիար Թաթուլ Մարգարեանը, Կեդրոնական Վարչութեան ներկայացուցիչ եղբ. Հրաչ Մեսրոպեանը, Արցախի Հանրապետութեան Ուաշինկթընի գրասենեակի վսեմաշուք ներկայացուցիչ պարոն Ռոպերթ Աւետիսեանը, Հայաստանի Հանրապետութեան Դեսպանութեան զինուորական կցորդ Գնդապետ Մեսրոպ Նազարեանը, Հայոց Բանակի սպաներ` Արտակ Թոնոյեան եւ Արդիոմ Գէորգեանը, Ուաշինկթընի Սուրբ Խաչ եկեղեցւոյ Հոգեւոր Հովիւ` Արժ. Տ. Սարգիս քհնյ. Ագթաւուգեան, շրջանէս Ընթացաւարտ Կեդրոնական Վարչութեան եւ Շրջանային Վարչութեան անդամներ ու ներկայ Շրջանային Վարչութեան ծառայող եղբայրներ եւ քոյրեր, կազմակերպող մասնաճիւղի վարչութեան եւ խաղերու կազմակերպիչ յանձնախումբի ներկայացուցիչներ:
Հ.Մ.Ը.Մ.ի Շրջանային Վարչութեան ատենապետ` եղբ. Յովիկ Աբգարեան եւ Շրջանային Վարչութեան անդամ քոյր Էլիզապէթ Տրամկոչեան եռագոյն դրօշով պատուեցին օրուան պատւոյ նախագահները, որոնք խօսք առնելով գնահատեցին սոյն ձեռնադրութիւնը, մաղթելով առաւել յաջողութիւն:
ՅԱՂԹԱՆԱԿԻ ՃԱՇԿԵՐՈՅԹ–ՊԱՐԱՀԱՆԴԷՍ
Շաբաթ, Յուլիս 7ի երեկոյեան տեղի ունեցաւ յաղթանակի ճաշկերոյթ-պարահանդէսը Ուաշիկթընի “Woodly Park Marriott“ պանդոկի շքեղ սրահին մէջ: Պաշտօնական բաժինը բացուեցաւ պատւոյ հիւրերու մուտքով: Ներկայ էին 500-է աւելի Հ.Մ.Ը.Մ.ականներ եւ համակիր ազգայիններ, որոնք ապրեցան յիշատակելի երեկոյ մը Հ.Մ.Ը.Մ.ի մեծ ընտանիքին հետ: Պատւոյ սեղանին վրայ ներկայ էին Արեւելեան Միացեալ Նահանգներու Թեմի Բարեջան Առաջնորդ` Բարձրաշնորհ Տ. Օշական Արք. Չօլոյեան, Հայաստանի Հանրապետութեան արտակարգ եւ լիազօր դեսպան Նորին Վսեմութիւն տիար Թաթուլ Մարգարեան, Հ.Մ.Ը.Մ.ի Կեդրոնական Վարչութեան անդամ եւ Արեւելեան Շրջանի ներկայացուցիչ եղբ. Հրաչ Մեսրոպեան, պատւոյ նախագահներ` Տէր եւ Տիկին Գէորգ եւ Էլիզապէթ Գազանճեաններ, Արցախի Հանրապետութեան Ուաշինկթընի գրասենեակի Վսեմաշուք Ներկայացուցիչ` պարոն Ռոպերթ Աւետիսեան, Հայաստանի Հանրապետութեան Դեսպանութեան զինուորական կցորդ Գնդապետ Մեսրոպ Նազարեան, Հ.Յ.Դ. Արեւելեան Միացեալ Նահանգներու Կեդրոնական Կոմիտէի ներկայացուցիչ ընկ. Ժան Աւետիսեան, Շրջանային Վարչութեան ատենապետ եղբ. Յովիկ Աբգարեան, Հ.Մ.Ը.Մ.ի Ուաշինկթընի մասնաճիւղի ատենապե
տուհի` քոյր Երան Սիմոնեան, խաղերու կազմակերպիչ յանձնախումբի ատենապետ եղբ. Վահէ Թանաշեան եւ օրուան հանդիսավար ընկ. Յովսէփ Աւագեան: Պատուոյ հիւրերէն ներկայ էին Հ.Օ.Մ.ի Արեւելեան Շրջան
ի ներկայացուցիչ` ընկհ. Սիլվա Քէշիշեան: Շրջանային Վարչութեան սեղանին ներկայ էին փոխ ատենապետ եղբ. Թորոս Ոսպիկեան, ատենադպրուհի քոյր Էլիզապէթ Տրամկոչեան, գանձապահ քոյր Արշօ Գանթարճեան, մարզական ներկայացուցիչ` եղբ. Սարգիս Դարբինեան, Սկաուտական ներկայացուցիչ` եղբ. Արամ Գայսերեան եւ անդամներ եղբ. Յակոբ Սոլաքեան, եղբ. Ռազմիկ Փանոսեան եւ եղբ. Սեւան Թորոսեան:
Հանդիսութեան պաշտօնական բացումը կատարուեցաւ Միացեալ Նահանգներու քայլերգի կատարողութեամբ տիկին Էմմա Սողոմոնեանի, Հայաստանի եւ Հ.Մ.Ը.Մ.ի քայլերգներով կատարողութեամբ եղբ. Գէորգ Թաթարեանին:
Սրբազան Հօր սեղանի օրհնութենէ եւ ճաշէն ետք, օրուան պատշաճ յայտագիրը բացուած հռչակուեցաւ ընկ. Յովսէփ Աւագեանի կողմէ: Ան ներկաներուն բարի գալուստ մաղթելէ ետք, հաստատեց թէ այս ձեռնարկը Յաղթանակի Ճաշկերոյթ-Պարահանդէս կ՛անուանենք ոչ թէ անոր համար, որ այս խաղերուն արդիւնքով կան յաղթող մարզիկներ, այլ անոր համար որ այս խաղերէն միշտ ալ յաղթական դուրս եկած է Հ.Մ.Ը.Մ.ը, որովհետեւ Հ.Մ.Ը.Մ.ը ոտնագնդակի, վոլիպոլի, պասքէթպոլի կամ այլ մարզաձեւերու համախմբում մը չէ, այլ Հայկական Մարմնակրթական Ընդհանուր Միութիւն մըն է, որ կը ձգտի ազգային վսեմ նպատակներու հետեւաբար այսօրուան յաղթանակը այդ նպատակին իրագործման աշխատանքներու յաղթանակն է եւ որու հետեւանքով հայ ժողովուրդի յաղթանակն է:
Առաջին խօսքը առաւ հիւրընկալ մասնաճիւղի վարչութեան եւ կազմակերպիչ յանձնախումբի կողմէ ատենապետ` եղբ. Վահէ Թանաշեան, եղբայրը մասնաճիւղի անունով բարի գալուստ մաղթեց բոլոր ներկաներուն: Ան շնորհակալութիւն յայտնեց կազմակերպիչ յանձնախումբին, ենթայանձնախումբերուն եւ բոլոր անդամներուն, ընտանիքներուն եւ կազմակերպութիւններուն, որոնք ամիսներ շարունակ անսակարկ աշխատեցան այս խաղերու յաջողութեան համար եւ ի սէր` Հ.Մ.Ը.Մ.ին: Ան մասնաւոր շնորհակալութիւն յայտնեց Սրբազան Հօր, Պարոն Դեսպանին եւ պատուոյ նախագահին իրենց ներկայութեան ու նեցուկ կանգնելուն համար: Ան իր խօսքը շարունակեց.- “մեզի համար մեծ հաճոյք եւ ուրախութիւն էր հիւրընկալել այս տարուան խաղերը: Նաեւ պատիւ էր մեզի համար, այս առիթով տօնելու Հայաստանի Զինուած Ուժերու հիմնադրութեան 20-ամեակը, որուն համար յատուկ շնորհակալութիւն Հայաստանի Դեսպանութեան զինուորական կցորդ, գնդապետ` Մեսրոպ Նազարեանին (տեսնել խօսքը աւարտին)“:
Եղբայր Վահէ իր խօսքը փակեց ըսելով.- “Սիրելիներ … մեր հիմնադիրներու երազով ու մեր սկաուտներու ու մարզիկներու կամքով ամուր ու բարձր պահենք մեր եռագոյնը ու շարունակենք միասնաբար գործել մեր սիրելի Բարձրացի՛ր… Բարձրացո՛ւրի նշանաբանով“:
Հ.Յ.Դ. Արեւելեան Միացեալ Նահանգներու Կեդրոնական Կոմիտէի կողմէ խօսք առաւ ընկեր Ժան Աւետիսեան, ընկերը իր խօսքին մէջ ողջունեց Հ.Մ.Ը.Մ.ի հաստատաքայլ երթը շրջանի մէջ, ան ըսաւ թէ` “Արեւելեան Ամերիկայի Հ.Յ.Դ. Կեդրոնական Կոմիտէն, յանձինս Հայ Յեղափոխական Դաշնակցութեան մեծ ընտանիքին, կու գայ անգամ մը եւս ողջունելու Արեւելեան Ամերիկայի Հ.Մ.Ը.Մ.ի Շրջանային Ողիմպիական խաղերը, որոնք այս տարի նուիրուած են Հայաստանի Հանրապետութեան Ազգային Բանակի կազմութեան 20ամեակին ու անկասկածօրէն Հ.Մ.Ը.Մ.ական ընտանիքի բոլոր անդամներուն ու յատկապէս պատասխանատու մարմիններուն երկար եւ հետեւողական աշխատանքի, ճիգի ու քրտինքի արդիւնքն է, որ կը ներկայանայ մեզի այսօր, մեր անկախ հայրենիքի քաջարի բանակին արժանաւոր ներկայացուցիչներու մասնակցութեամբ տեղի ունեցող այս ողիմպիականը:
Այս առթիւ Հ.Յ.Դ. Արեւելեան Ամերիկայի Կեդրոնական Կոմիտէի կողմէ պարտականութիւնը ունիմ վերահաստատելու Դաշնակցական ընտանիքին պատրաստակամութիւնը ձեր կողքին կանգնելու մեր շրջանի համայն տարածքին:
Անկասկած, որ հայրենասէր հայու ոգիով պիտի շարունակէք գործել, մի՛շտ բարձրանալ ու բարձրացնել հայու պատիւն ու կորովը ըլլայ մարզադաշտի վրայ ըլլայ անձնական կեանքի օրինակով ի փառս հայ ժողովուրդին ու անոր վերականգնող Հայրենիքին:
Պարծանք ու պատիւ Հայ Մարմնակրթական Ընդհանուր Միութեան աննկուն ոգիով իրականացնող աշխատանքներուն եւ անոր միշտ բարձր ծածանող միութենական դրօշին“:
Հ.Մ.Ը.Մ.ի Արեւելեան Միացեալ Նահանգներու Շրջանային Վարչութեան ատենապետ եղբ. Յովիկ Աբգարեան իր խօսքին մէջ շնորհակալութիւն յայտնեց Սրբազան Հօր իր յարատեւ քաջալերանքին համար: Բարի գալուստ յայտնեց Հայաստանի Հանրապետութեան Ներկայացուցիչին, զինուորական կցորդին եւ Արցախի ներկայացուցիչին, որոնց ներկայութիւնը յաւելեալ պատիւ կը բերէ Հ.Մ.Ը.Մ.ին: Ան գնահատանքի խօսքեր ուղղեց հիւրընկալ Հ.Մ.Ը.Մ.ի Ուաշինկթընի մասնաճիւղի վարչութեան, կազմակերպիչ յանձնախումբին եւ Շրջանային Մարզական յանձնախումբին, իրենց տարած աշխատանքին համար, ինչպէս նաեւ շրջանիս տասը մասնաճիւղերու վարչութիւններուն, որոնք հսկայական աշխատանք կը տանին շարունակելով մեր հիմնադիրներուն աշխատանքը: Այս հրաշալի կազմակերպութեան, որպէս մէկ մասնիկ Արեւելեան Շրջանը կը ջանայ իր լաւագոյնը մատուցել ու նորահաս հայ սերունդի դաստիարակութեան ընդհանուր գործին իր անուրանալի ներդրումը ունենալ: Եւ ահա այս առաքելութեան շրջագիծին մէջ այսօր կը վայելենք մեր փոքրիկներու ու երիտասարդներու մասնակցութեամբ կատարուած 22րդ միջ-մասնաճիւղային խաղերու հրճուանքը: Այս խաղերը սովորական մրցաշարք մը չեն, ուր կ՛արձանագրուին յաղթողներ ու պարտուողներ, այլ անկէ անդին` նպատակ ունի Հ.Մ.Ը.Մ.ականին վայել, ազնիւ մրցակցութեան մթնոլորտի մը մէջ քով-քովի գալու, նախկին ծանօթութիւններ ամրապնդելու ու նոր ծանօթութիւններ հաստատելու, որոնք ի վերջոյ կը նպաստեն մեր հաւաքական կամքի ամրապնդման, մէկը միւսով հզօրանալով` իւրաքանչիւրս աւելի կը գօտեպնդուի Հ.Մ.Ը.Մ.ի նուիրական գաղափարներով եւ վերանորոգուած կորովով վերադառնալու մեր շրջանները` շարունակելու համար այն գործն ու ծառայութիւնը, ի խնդիր մեր ազգային գիտակցութեան պահպանման, ազգասիրութեան ու հայրենասիրութեան, ինչպէս նաեւ Հ.Մ.Ը.Մ.ի ընդմէջէն ծառայելու մեր համայնքի կարիքներուն Հայրենիքի հզօրութեան ու զարգացման:
Իր խօսքի աւարտին եղբ. Յովիկ բեմ հրաւիրեց խաղերու պատուոյ նախագահներ Տէր եւ Տիկին Գէորգ եւ Էլիզապէթ Գազանճեանները եւ անոնց յանձնեց յատուկ յուշանուէր մը: Այս առիթով պատւոյ նախագահներու կողմէ խօսք առաւ անոնց դուստրը Մարալ Գազանճեան-Պոզաճեանը: Ան ըսաւ թէ մեծ ուրախութիւն է իրեն համար ներկայ ըլլալ այս մեծ ընտանիքին մէջ, ուր ինք անցուցած է իր մանկութեան եւ պատանեկութեան տարիները ու ստացած էր իր հայեցի դաստիարակութիւնը: Ան շարունակեց ըսելով թէ իր ծնողքին փափաքն էր թէ ինք արտասանէ այս խօսքը, որովհետեւ անոնք կը հաւատան, որ մեր ազգի վերելքին համար միշտ կարիքը ունինք երիտասարդութեան: Ան հաստատեց թէ իր ծնողքը ընդունեցին խաղերու նախագահութեան պատիւը ի յիշատակ իր մեծ հօր Յովհաննէս Գազանճեանին, որ իր կեանքի ընթացքին եղած է Հայ Ազգի հաւատարիմ ծառան: Ան իր խօսքը ուղղելով իր մեծ հօր ըսաւ “Մեծ հայրիկ` քեզմով շատ հպարտ ենք, դուն ծառայեցիր ազգին ու Հայրենիքին, այսօր տղուդ զաւակները եւ թոռները իրենց ընկերներով, սկաուտներով եւ մարզիկներով եռագոյնը բարձր դրած ու ամուր պահած իրենց հոգիներուն մէջ` կը շարունակեն ձեր սուրբ գործը Հայութեան եւ Հայաստանի սիրոյն“: Քոյր Մարալը իր խօսքը փակեց ըսելով “Սիրելի Հ.Մ.Ը.Մ.ի պատասխանատուներ, ընտանիքիս անունով շնորհակալութիւն կը յայտնեմ այս մեծ պատիւին համար: Սիրելի ներկաներ, մնանք միասին ամուր, սիրով եւ մեր ապագայ սերունդին համար բարձրանանք ու բարձրացնենք Հայ Ազգը“:
Հ.Մ.Ը.Մ.ի Յաղթութեան այս ճաշկերոյթ-պարահանդէսին յատկանշական երեւոյթ էր Հայաստանի Հանրապետութեան արտակարգ եւ լիազօր դեսպան Նորին Վսեմութիւն տիար Թաթուլ Մարգարեանի ներկայութիւնը: Մեծարքոյ դեսպանը իր խօսքին մէջ բարձր գնահատեց Հ.Մ.Ը.Մ.ի ներկայութիւնը հայ կեանքէն ներս, մանաւանդ Սփիւռքի մէջ, ուր Հ.Մ.Ը.Մ.ի ջանքերով ի մի տեղ կը հաւաքուին Հայ մատղաշ սերունդները, որոնք մարմնով եւ հոգիով կը պատրաստուին, որպէս ապագայ հայ սերունդներ: Դեսպանը շնորհաւորեց նաեւ Հ.Մ.Ը.Մ.ի Արեւելեան Շրջանի կազմակերպած 22րդ միջ-մասնաճիւղային խաղերը:
Յաջորդ խօսք առնողն էր Հ.Մ.Ը.Մ.ի Կեդրոնական Վարչութեան ներկայացուցիչ` եղբ. Հրաչ Մեսրոպեան, որ շեշտեց թէ` “Հ.Մ.Ը.Մ.ը Հայրենազրկուածութեան 70 տարիներու ընթացքին սփիւռքահայութիւնը Հ.Մ.Ը.Մ.ի սկաուտական առինքնող շարքերուն մէջ կը տեսնէր հայոց բանակի խրոխտ ու հպարտ պատկերը եւ անոր պարզած Եռագոյնին մէջ կը տեսնէր ազատ ու անկախ պետականութեան տեսլականը:
Այս առիթով, յանուն Հ.Մ.Ը.Մ.ի Կեդրոնական Վարչութեան եւ Հ.Մ.Ը.Մ.ի մեծ ընտանիքին ի սրտէ կը շնորհաւորենք Հայոց Բանակի քսանամեակը եւ խաղաղ ծառայութիւն կը մաղթենք մեր զինուորներուն ու սպաներուն:
Հ.Մ.Ը.Մ.ի պայծառատես հիմնադիրներ
ը առաջին իսկ օրէն ընդգծեցին երիտասարդութեան կարեւորութիւնը եւ զայն նկատեցին ազգի ապագան, մարդկային ու ազգային արժէքներով զինեցին զայն, որպէսզի կարենայ դիմագրաւել մեր ազգին առջեւ դրուած մարտահրաւէրները:
Երիտասարդութեան կարեւորութիւնը շեշտող Հ.Մ.Ը.Մ.ի մօտեցումը նոյնն է նաեւ այսօր, որուն դրսեւորումներէն էր 2011 Սեպտեմբերին Ծաղկաձորի մէջ գումարուած 10րդ Պատգամաւորական Ժողովին որդեգրած Ռազմավարական Ծրագիրը, որուն կարեւոր կէտերէն մէկն էր երիտասարդութեան ներգրաւումը եւ հայախօսութեան զարկ տուող ծրագիրներու մշակումը: Աւելին, Հ.Մ.Ը.Մ.ի պատմութեան մէջ դժուար թէ գտնուի ժողով մը, ուր այնքան շատ մտածուած ու խօսուած ըլլայ երիտասարդութեան մասին, որքան 10 Պատգամաւորական Ընդհանուր Ժողովը:
Այսօր առաւել եւս համոզուած ենք, որ ազգային արժէքներով զինուած, ազգին ու հայրենիքին ծառայելու գաղափարին կառչած երիտասարդութիւնն է ազգի ու հայրենիքի գոյատեւման ու բարգաւաճման բանալին, իսկ գաղափարապաշտ երիտասարդութիւն կերտելու գործը Հ.Մ.Ը.Մ.ի նուիրական առաքելութիւնն է, որուն պէտք է աջակցինք բոլորս եւ մեր ունեցած բոլոր հնարաւորութիւններով:
Բարձրաշնորհ Սրբազան Հայր, Մեծարքոյ Արտակարգ եւ լիազօր դեսպան Հայաստանի Հանրապետութեան, Արժանապատիւ հոգեւոր հայ
րեր, Հ.Յ.Դ. Արեւելեան Շրջանի Կեդրոնական Կոմիտէի ներկայացուցիչ, Յարգարժան Շրջանային եւ Մասնաճիւղերու վարչութեանց եւ այլ մարմիններու ներկայացուցիչներ, սիրելի Հ.Մ.Ը.Մ.ականներ եւ յարգելի ներկաներ,
Շուրջ 94 տարիներ առաջ, խումբ մը հաւատաւոր ու հեռատես հայորդիներ հիմնեցին Հայ Մարմնակրթական Ընդհանուր Միութիւնը, որուն վսեմ նպատակը եղաւ ոչ միայն ֆիզիքական` այլ նաեւ բարոյական ու ազգային կրթութիւն ջամբել հայ պատանիին ու երիտասարդին եւ հայ պատանին ու երիտասարդը ներգրաւելով այս հզօր կազմակերպութեան մէջ ուզեցին առաջքը առնել ջարդէն ճողոպրած ու հայրենի օրրանէն տեղահան եղած հայ զանգուածի ձուլումին:
1970ական թուականներուն տարբեր համայնքներու մէջ նուիրական այս գործին լծուած առանձին-առանձին միաւորներ որակական նոր քայլ մը արձանագրեցին, երբ Հ.Մ.Ը.Մ.ի մասնաճիւղերու համագումարով հիմը դրին ոչ միայն համահայկական կառոյցին, այլ նաեւ Հ.Մ.Ը.Մ.ի առաքելութեան տուին Համահայկական մտածողութիւն, որպէսզի աւելի կազմակերպուած ու համադրուած ճիգով տանիլ հայեցի կարգապահութեամբ օժտուած այս կազմակերպութեան աշխատանքը:
Պատահական չէ, որ միջ-մասնաճիւղային Նաւասարդեան այս խաղերը նուիրուած են հայրենի բանակի քսանամեակին, որովհետեւ մենք նաեւ նմանութիւններ կը տեսնենք այս երկու կառոյցներուն միջեւ: Ճիշդ է Հ.Մ.Ը.Մ.ականը հայրենիքի սահմանները չի պաշտպաներ, բայց նաեւ ճիշդ է, որ Հ.Մ.Ը.Մ.ը իր ծննդեան առաջին օրէն եղած է հայապահպանման առաջին գիծերու վրայ: Ճիշդ է, որ մեր շարքերը զէնքով չեն զինուած, բայց նաեւ ճիշդ է, որ Հ.Մ.Ը.Մ.ականները զինուած ազգային արժէքներով ու գաղափարախօսութեամբ` ի պաշտպանութիւն մեր ազգային գոյատեւման ու իրաւունքներու ձեռքբերման:
Վերջին խօսքը առաւ Արեւելեան Միացեալ Նահանգներու Թեմի Առաջնորդ Բարձր. Տ. Օշական Արք. Չօլոյեան: Սրբազան Հայրը իր խօսքը ուղղելով երիտասարդութեան, շնորհաւորեց 22րդ Միջ-մասնաճիւղային մարզական խաղերու յաջողութիւնը եւ յիշեցուց, որ զանազան կազմակերպութիւններ եկած ու գացած են, բայց Հ.Մ.Ը.Մ.ը Մայիս 28, 1918 պայքարէն ու մեր ժողովուրդի ծոցէն, կը մնայ միշտ երիտասարդ: “Հ.Մ.Ը.Մ.ի սկզբունքները եւ մեր ազգային սրբութիւնը շունչ եւ արիւն տուած են մեզի եւ մեր բոլորին պարտականութիւնն է պահպանել զանոնք“,- ըսաւ Սրբազան Հայրը: Ան յիշեց իր պատանեկան տարիները երբ իբրեւ գայլիկ եւ սկաուտ կը կերտուէր Հ.Մ.Ը.Մ.էն ներս, ապա ըսաւ.- “Հաւատացինք այս ընտանիքին, որ հարազատ է մեր ժողովուրդի նկարագրին, Հ.Մ.Ը.Մ.ը մերն է ու կը պահէ զմեզ“: Անդրադառնալով Հայաստանի Զինուած Ուժերու Հիմնադրութեան 20ամեակին, ան ըսաւ.- “Հայ զինուորը, Հայաստանի լեռներուն վրայ կը պաշտպանէ Հայ ժողովուրդը, Հայաստանի սահմաններու արթուն հսկողութեամբ, եւ հոս Հ.Մ.Ը.Մ.ականները կը պաշտպանեն Հայ ժողովուրդը, արթուն պահակը դառնալով անոր իրաւունքներուն“: 
Ան շարունակեց ըսելով որ “այս օտար ափերուն վրայ այս կազմակերպութիւնը կը մնայ Հայ Ազգի սեփականութիւն եւ այսօր անոր դրօշը կը ծածանի աշխարհի բոլոր ծագերուն“: Յանուն Ազգային Առաջնորդարանի եւ Վարչութեան ան շնորհաւորեց Հ.Մ.Ը.Մ.ի 95ամեակը եւ յայտնեց որ այս տօնախմբութեամբ հայութիւնը կ՛անմահանայ: Փակեց իր խօսքերը ըսելով “կեցցէ՛ Հ.Մ.Ը.Մ.ը, Մայր Հայաստանը եւ մեր ժողովուրդը“:
Յայտագրի գործադրութեան աւարտին, ներկաները վայելեցին Գանատայէն ժամանած սիրուած երգիչ` Յարութ Պետրոսեանին եւ իր նուագախումբին, որոնք անընդհատ խանդավառեցին բոլորը ազգագրական եւ ժողովրդային ճոխ երգերով: Կէս գիշերէն ետք ժամը 1:30ին, երիտասարդ երգիչ` Քրիստափոր Արապեան մթնոլորտը խանդավառեց ազգային եւ յեղափոխական երգերու փունջով մը, խրախուսելով ներկայ երիտասարդութիւնը, որոնք եռագոյն դրօշները բարձրացուցած Ներսիկի հետ ձայնակցեցան մինչեւ առաւօտեան ժամը 3:00ը:
ՓԱԿՄԱՆ ՀԱՆԴԻՍՈՒԹԻՒՆ
Կիրակի, Յուլիս 8, կէսօրէ ետք ժամը 12:00ին տեղի ունեցաւ փակման հանդիսութիւնը, Ուաշինկթընի “Woodly Park Marriott“ պանդոկին շքեղ սրահին մէջ: 
Օրուան հանդիսավարն էր ընկեր Յովսէփ Աւագեան: Փակման հանդիսութեան, նախ մուտք գործեցին պատւոյ հիւրերը, ապա Ուաշինկթընի նորակազմ ֆանֆարի նուագացողութեամբ, դրօշակակիրներու եւ Շրջանային խմբապետի առաջնորդութեամբ` տողանցեցին շրջանիս արի եւ արենոյշներու, արծուիկներու եւ գայլիկներու խումբերը եւ յաջորդաբար 10 մասնաճիւղերու մարզիկները, յատուկ խանդավառութիւն ստեղծեցին եռագոյն դրօշակներ ծածանած գայլիկ-արծուիկներու` ապագայ սերունդի մուտքը եւ խաղերու կազմակերպիչ յանձնախումբի անդամներուն մուտքը, որոնք արժանացան ներկաներուն ծափողջոյններուն:
Հանդիսութեան պաշտօնական բացումը կատարուեցաւ Միացեալ Նահանգներու քայլերգի կատարողութեամբ տասամեայ Սարին Պալեանի, Հայաստանի եւ Հ.Մ.Ը.Մ.ի քայլերգներով կատարողութեամբ եղբայր Գէորգ Թաթարեանի:
Ընկեր Յովսէփ ներկայացուց օրուան պատւոյ հիւրերը Արեւելեան Միացեալ Նահանգներու Թեմի Բարեջան Առաջնորդ Բարձր. Տ. Օշական Արք. Չօլոյեան, Հայաստանի Հանրապետութեան արտակարգ եւ Լիազօր դեսպան Նորին Վսեմութիւն Տիար Թաթուլ Մարգարեան, Հ.Մ.Ը.Մ.ի Կեդրոնական Վարչութեան անդամ եւ Արեւելեան շրջանի ներկայացուցիչ եղբ. Հրաչ Մեսրոպեան, պատւոյ նախագահներ Տէր եւ Տիկին Գէորգ եւ Էլիզապէթ Գազանճեաններ, Արցախի Հանրապետութեան Ուաշինկթընի գրասենեակի Վսեմաշուք ներկայացուցիչ պարոն Ռոպերթ Աւետիսեան, Հայաստանի Հանրապետութեան Դեսպանութեան զինուորական կցորդ Գնդապետ` Մեսրոպ Նազարեան, Հ.Յ.Դ. Արեւելեան Միացեալ Նահանգներու Կեդրոնական Կոմիտէի ներկայացուցիչ ընկ. Ժան Աւետիսեան, Շրջանային Վարչութեան ատենապետ` եղբ. Յովիկ Աբգարեան: Եւ որովհետեւ 22րդ խաղերը նուիրուած էին Հայաստանի Զինուած Ուժերու 20ամեակին, Գնդապետ Մեսրոպ Նազարեանի կողքին, պատւոյ հիւրերու շարքին էին Հայաստանի Հանրապետութեան դեսպանութեան կարգադրութեամբ, Միացեալ Նահանգներու այլ նահանգներէ ժամանած Հայաստանի բանակէն երկու սպաներ` Արտակ Թոնոյեանը եւ Արդիոմ Գէորգեանը, որոնք կ՛ուսանին Ամերիկեան Ռազմագիտական Ուսումնական հաստատութիւններու մէջ:
Այս առիթով խօսք առին Արեւելեան Միացեալ Նահանգներու Շրջանային Վարչութեան ատենապետ եղբ. Յովիկ Աբգարեան, Հ.Յ.Դ. Կեդրոնական Կոմիտէի ներկայացուցիչ ընկ. Ժան Աւետիսեան, պատուոյ նախագահ` Տիար Գէորգ Գազանճեան, Արցախի Հանրապետութեան Ուաշինկթնի գրասենեակի ներկայացուցիչ պարոն Ռոպերթ Աւետիսեան, դեսպան Թաթուլ Մարգարեան, Կեդրոնական Վարչութեան անդամ` եղբ. Հրաչ Մեսրոպեան: Օրուան գլխաւոր պատգամախօսն էր Հայաստանի Հանրապետութեան Դեսպանութեան Զինուորական կցորդ Գնդապետ Մեսրոպ Նազարեանը: Ապա Թեմիս Բարեջան Առաջնորդ Բարձր. Տ. Օշական Արք. Չօլոյեանի հայրական պատգամով ու պահպանիչով ձեռնարկը հասաւ իր աւարտին:
Խօսք առնողները ընդհանրապէս գովաբանեցին Հ.Մ.Ը.Մ.ի դերակատարութիւնը սփիւռքեան մեր իրականութեան մէջ, եւ հաստատեցին այն իրականութիւնը, որ Հայրենիքը` իր պետականութեամբ եւ բանակով եւ Սփիւռքը` իր կազմակերպութիւններով, կը կազմեն մէկ ամբողջութիւն ի դէմ Հայ Ազգի դիմագրաւուած մարտահրաւէրներուն, այս իրականութիւնը լաւապէս արտացոլուած էր փակման հանդիսութեան ընթացքին, երբ Հայաստանի եւ Արցախի պետական ու զինուորական ներկայացուցիչները, Արեւելեան Միացեալ Նահանգներու Սփիւռքի հոգեւոր ու քաղաքական ղեկավարութեան հետ միասին, հաստատեցին մէկ Հայրենիք մէկ Ազգ իրականութիւնը:
ԲԱԺԱԿՆԵՐՈՒ ԲԱՇԽՈՒՄ
Փակման հանդիսութիւնը աւարտելէ առաջ, տեղի ունեցաւ ախոյեան խումբերու բաժակներու բաշխումը: Եղբ. Արա Մարկոսեանի յիշատակին հինգ տարուան համար շրջուն բաժակին տիրացաւ Ֆլորիտայի Մասնաճիւղը, որպէս լաւագոյն բարելաւում արձանագրած մասնաճիւղ: Շիքակոն ստացաւ լաւագոյն վարք ունեցող մասնաճիւղի բաժակը: Իսկ հիւրընկալ մասնաճիւղը Ուաշինկթընը ստացաւ խաղերու լաւագոյն մասնաճիւղի բաժակը տիրանալով խաղերու մրցանակներուն առաւելագոյն կէտերը:
Եւ այսպէս Միջ-մասնաճիւղային 22րդ խաղերը հասան իրենց աւարտին, անգամ մը եւս Հ.Մ.Ը.Մ.ի յաղթութեամբ, այս խաղերով Արեւելեան Ամերիկայի շրջանը յաւելեալ խթան ստացաւ, խաղերուն մասնակցող բոլոր Հ.Մ.Ը.Մ.ականները ձեւով մը վերանորոգեցին իրենց ուխտը, քսաներկու անգամ աւելի զօրաւոր կամքով շարունակելու “Բարձրացի՛ր Բարձրացո՛ւր“-ի ուղին, յուսալով որ 2013ի Միջ-Մասնաճիւղային մարզական խաղերը վերանորոգուած եռանդով տեղի պիտի ունենայ Ֆլորիտայի մէջ:
Խումբերու Ընդհանուր Դասաւորում
Մասնաճիւղ Կէտ
1 Ուաշինկթըն 49
2 Նիւ Ճըրզի 41
3 Պոսթըն 33
4 Նիւ Եորք 19
5 Ֆիլատելֆիա 12
6 Շիքակօ 9
7 Տիթրոյթ 5
8 Փրովիտէնս 4
9 Ֆլորիտա 4
10 Ալպընի
ՈՒԱՇԻՆԿԹԸՆԻ ԴԵՍՊԱՆԱՏԱՆ ՄՕՏ Հ.Հ.
ԶԻՆՈՒՈՐԱԿԱՆ ԿՑՈՐԴ ԳՆԴ. ՄԵՍՐՈՊ ՆԱԶԱՐԵԱՆԻ ԽՕՍՔԸ
Սիրելի քոյրեր եւ եղբայրներ,
Թոյլ տուէք ողջունել Ձեզ, Հ. Մ. Ը. Մ.-ի ամենամեայ խաղերի եւ Հայոց Բանակի քսանամեակի կապակցութեամբ կազմակերպուած այս գեղեցիկ միջոցառմանը: Արդեօք պատահակա՞ն է, որ այս երկու առիթները շաղկապւում են: Ի հարկէ‘ ոչ: Ոչ, որովհետեւ Հ.Մ.Ը.Մ.-ը մի կարեւորագոյն հայկական կառոյց է, որը տասնամեակներով կոփել եւ կոփում է առողջ երիտասարդ սերունդ, պատանիներ եւ աղջիկներ, որոնցից շատերը մի օր, եթէ Աստուած մի արասցէ հարկ լինի, կարող են գալ իրենց երկրի սահմանները պաշտպանելու: Որ մի հայը, Հայաստանում եւ Սփիւռքում չգիտէ այն ներդրումի մասին, որ Սփիւռքի մեր հայրենակիցները մօտ երկու տասնամեակ առաջ բերեցին Հայրենիքի պաշտպանութեան սրբազան գործին: Արտասահմանի մեր հայրենակիցները նաեւ կեդրոնական դեր ունեցան Հայաստանին նիւթական եւ մարդասիրական օգնութիւն տրամադրելու առումով: Ուրեմն կեցցէ Հ.Մ.Ը.Մ.-ը, որը վառ պահելով աւանդոյթները` հիմք է ստեղծում գալիք յաջողութիւնների համար, մարզում, կոփում առողջ, պատուախնդիր եւ հայրենասէր սերունդ այստեղ` Ամերիկայի Միացեալ Նահանգներում:
Սիրելի հայրենակիցներ,
Յունուարի 28-ը` Հայկական զինուած ուժերի քսանամեակի յոբելեանը անցեալում է, բայց տօնակատարութիւնները շարունակւում են եւ ընթանալու են ողջ յոբելեանական տարուայ ընթացքում: Ինչո՞ւ: Որովհետեւ չափազանց թանկ է մեզ համար մեր Հայոց անպարտ բանակը: Որովհետեւ դարերով պետականութիւն չունեցող մեր ժողովուրդը միայն երազել կարող էր, որ կու գայ օրը եւ սեփական դրօշի ու զինանշանի ներքոյ կ՛ունենանք նաեւ յաղթող բանակ: Չափազանց թանկ է մեզ համար ազատ Արցախը, որի գլխավերեւում այսօր հայկական հպարտ դրօշն է հէնց մեր բանակի, մեր համաժողովրդական հերոսական ազատամարտի շնորհիւ:
Հայաստանի զինուած ուժերը հետ պտտեցին պատմութեան անիւը եւ պարտութիւնների, ցեղասպանութեան դարաշրջանին յաջորդեց յաղթութեան եւ ազատագրութեան պատմական օրը:
Զեկուցում եւ հաւաստիացնում եմ Ձեզ, որ այսօր էլ Հայկական Բանակը ի զօրու է ոչ միայն պաշտպանելու մեր ժողովրդի անվտանգութիւնը, այլ նաեւ մէկ անգամ եւս թշնամուն ծնկի բերելու, քանի որ նրա ողջ անձնակազմը զինուած է ամենակարեւոր զէնքով` հաւատքով դէպի իրենց գործը, հայրենիքը պաշտպանելու հաստատակամութեամբ եւ այդ նպատակին հասնելու համար իրենց կեանքն իսկ զոհելու պատրաստակամութեամբ:
Ժամանակին այս յատկանիշներն էին, որ ձեւաւորեցին մի բռունցք, որի օգնութեամբ հայ ժողովուրդը տարաւ մի յաղթանակ, որը մինչ այժմ առաջացնում է միջազգային հանրութեան հիացմունքն ու զարմանքը: Օգտուելով առիթից, Հայ ժողովրդի անունից մէկ անգամ եւս կը ցանկանայի շնորհակալութիւն յայտնել բոլոր նրանց, ում ջանքերի շնորհիւ յաջողութեամբ պսակուեց այդ ազգանուէր գործը:
Գործ, որը կ՛ապրի դարեդար: Գործ, որի շնորհիւ 1994 թուականին ծնկի եկած թշնամու խնդրաքով հաստատուեց յարաբերական անդորր:
Սիրելի հայրենակիցներ,
Մեր օրերի հիմնական խնդիրը դժուար ու դինամիկ այս աշխարհում մեր պետականութեան առջեւ ծառացող խնդիրներին եւ մարտահրաւէրներին, մասնաւորապէս ազերիներին սանձահարելուն եւ անհրաժեշտութեան դէպքում մէկ անգամ եւս ծնկի բերելուն ունակ բանակ ունենալն է: Վստահեցնում եմ Ձեզ, որ ամենօրեայ աշխատանք է տարւում բանակի մարտունակութիւնը բարձր պահելու եւ հակառակորդի կողմից հայրենիքի սահմանը հատելու փորձերին դիմակայելու համար` լաւագոյն պաշտպանական եւ յարձակողական սպառազինութիւնների միջոցով:
Ինչպէս յայտարարել է Հայաստանի նախագահ, Զինուած Ուժերի Գերագոյն Գլխաւոր հրամանատար Սերժ Սարգսեանը “եթէ մեզ պարտադրեն պատերազմ, ապա այս անգամ մեր հարուածը կը լինի կործանարար եւ վերջինը“:
Սիրելի Հ.Մ.Ը.Մ.-ականներ,
Միացեալ Հայկական անվտանգութեան ուժերը այսօր չեն բաւարարւում միայն Հայաստանի եւ Արցախի անվտանգութիւնն ապահովելու խնդրով: Հայաստանի Հանրապետութիւնը նաեւ պատասխանատուութեան իր բաժինն է կրում համաշխարհային անվտանգութեան ապահովման համար:
Ակնյայտ է, որ այս խնդրի մասին կարող է մտածել միայն այն երկիրը, որը լիովին ապահովել է իր զինուած ուժերի կողմից երկրի ինքնապաշտպանութեան խնդրի կատարումը: Սա վկայում է այն մասին, որ երաշխաւորելով սեփական երկրի անվտանգութիւնը` Հայաստանն արդէն իսկ ի վիճակի է պաշտպանական աղբիւրներն ուղղել միջազգային անվտանգութեան ապահովմանը: Այսօր Հայաստանի զինուած ուժերի ստորաբաժանումները իրենց փայլուն մասնակցութիւնն են ունենում Իրաքում, Աֆղանիստանում, Քոսովոյում, Լիբանանում եւ Սուրիայում իրականացուող խաղաղապահ առաքելութիւններում, որտեղ մեր զինծառայողները իրենց ունակութիւններով եւ հմտութիւններով մշտապէս առաջացնում են ոչ միայն մեր հրամանատարութեան, այլ նաեւ արեւմտեան, ամերիկեան, եւ առհասարակ ՆԱԹՕ–ի անդամ պետութիւնների հրամանատարութեան գոհունակութիւնը:
Ակնյայտ է որ նման խնդիրների լուծման համար բանակի եւ ժողովրդի միջեւ ամուր կապը կարեւորագոյն նախապայմանն է: Այդ կապի ամրապնդման առումով ուղղակի անգնահատելի է այսպիսի միջոցառումների կազմակերպումն ու անցկացումը: Սրանք լաւագոյն առիթն են մի կողմից ամուր մարմին ու հոգի կոփելու, միւս կողմից հայրենասիրութեան ամուր ոգի ձեւաւորելու համար: Այսօր տեսնելով այս խանդավառութիւնը իւրաքանչիւր մասնակցի աչքերում մէկ անգամ եւս համոզւում եմ. հայ ազգն ունի հիանալի կարողութիւն, հայ ոգին անպարտելի է:
