ՀԱՄԲԻԿ ՍԱՍՈՒՆԵԱՆԻ ԱԶԱՏՈՒԹԻՒՆԸ՝ ԴԻՄԱԴՐՈՒԹԵԱՆ ՄԵՐ ՈԳԻՆ ԱՄՐԱՊՆԴՈՂ ԱԶԴԱԿ

0 0
Read Time:3 Minute, 4 Second

ԺԱԳ ՅԱԿՈԲԵԱՆ

«Հայրենիք»

Շուրջ 39 տարի Քալիֆորնիոյ բանտերուն մէջ անազատութեան մէջ մնալէ ետք, շաբաթ, 30 հոկտեմբերի վաղ առաւօտեան Հայկական ցեղասպանութեան արդարութեան մարտիկ Համբիկ Սասունեան համայն հայ ազգին յղուած պատգամի մը մէջ աւետեց ազատութեան մէջ իր գտնուիլը՝ Հայաստանի Հանրապետութեան հողին վրայ, իր հարազատներուն կողքին:
1975-1985 երկարող ժամանակաշրջանը յատկանշած Հայ դատի ուժական պայքարի վերջին քաղաքական բանտարկեալն էր Համբիկ Սասունեան: 39 տարի շարունակ ան իր խաչը կրեց կատարեալ համբերութեամբ՝ քաջ հաւատալով, որ օր մը ազատութեան արեւը անպայման պիտի ծագի: Այս ժամանակաշրջանին ան քանի մը սերունդի դաստիարակութեան եւ ներշնչման աղբիւր հանդիսացաւ: Բանտէն դուրս իր ընկերները, պաշտպան փաստաբանները եւ Հայ դատի յանձնախումբերը տասնամեակներ շարունակ իր ազատութեան հարցը միշտ արծարծ պահեցին, իսկ բանտին մէջ Սասունեան մղեց իր իւրայատուկ պայքարը Հայ դատին համար՝ մոռացումին դէմ: Այդ պայքարը մղեց հայ քրիստոնեայի յամառ վճռականութեամբ՝ իրեն զէնք ունենալով կուրծքէն կախուած Տիրոջ խաչը միայն: Երիտասարդներու եւ պատանիներու սերունդներ իրեն նամակցեցան, եւ ինք իր ճգնարանին մէջ փորձեց անպատասխան չձգել որեւէ նամակ: Այդ նամակները շատ շատերու համար դարձան սրբազան մասունքներ: Ահա այսպէս է, որ տարիներու թաւալումին հետ Համբիկ Սասունեանը դարձաւ Հայ դատի պայքարի խորհրդանիշ շատ ու շատ հայորդիներու համար՝ ըլլան անոնք սփիւռքի թէ հայրենիքի մէջ:
Վստահաբար թշնամի Թուրքիոյ պետութիւնն ու Միացեալ Նահանգներու մէջ թրքական լոպին անցնող տարիներուն ընթացքին ուշի ուշով պիտի հետեւէին Համբիկ Սասունեանի ազատ արձակման համար տարուող ճիգերուն: Անցնող տարիներուն ընթացքին նմանօրինակ բազմաթիւ ճիգեր ձախողութեան մատնուեցան թրքական հակազդեցութեան, հակաքարոզչութեան եւ տեղեկատուական գրոհին հետեւանքով: Նոյնիսկ երբ վերջնականապէս ազատ արձակուեցաւ ան, թշնամի պետութիւնը ամէնէն բարձր մակարդակով դատապարտեց «ահաբեկիչ»-ին ազատ արձակումը եւ Միացեալ Նահանգներէն Հայաստան տեղափոխումը՝ նշելով, որ այս իրադարձութիւնը կրնայ մեծապէս վնաս հասցնել թուրք-ամերիկեան յարաբերութիւններուն, որոնք արդէն իսկ այդքան ալ հեզասահ չեն ընթանար վերջին տարիներուն ընթացքին: Թրքական ցեղապաշտական պետութիւնը միշտ ալ մեր արդարութեան մարտիկը ներկայացուցած է իբրեւ հասարակ «ահաբեկիչ», բայց ինչպիսի՞ որակում տալ այն գործելակերպին, որ այս պետութիւնը կը կիրարկէ իր դրացի երկիրներու ժողովուրդներուն նկատմամբ: Ուրիշ որակում կարելի չէ տալ, բացի «պետական ահաբեկչութենէն», որուն դառն բաժակէն հայութիւնը 21-րդ դարուն դարձեալ ցմրուր ըմպեց՝ անցեալ տարուան Արցախեան Բ. պատերազմին Արցախի եւ Հայաստանի Հանրապետութիւններուն վրայ Ազրպէյճան-Թուրքիա դաշինքին շղթայազերծած յարձակումին ժամանակ: Արդարութեան մարտիկը 39 տարուան իր զոհաբերուող համբերատարութեամբ եւ միշտ թրքական խարդաւանքին թիրախը դառնալով մեզի կը սորվեցնէր, թէ ինչպիսի՛ թշնամիի հետ մենք գործ ունինք: Համբիկի օրինակին ընդմէջէն մենք՝ հայերս, գիտցանք մեր թշնամին՝ Թուրքիան, եւ գիտցանք նաեւ, որ այսպիսի նենգ թշնամիի դիմաց մեզի չի մնար ուրիշ բան ընել, քան անտեղիտալի պայքար մղել: Այս պայքարը 40 տարի առաջ կ՛արտայայտուէր ուժական եւ ցուցական միջոցներով, իսկ հիմա աւելի քաղաքական եւ քարոզչական միջոցներով, բայց նպատակը մէկ է՝ հայութեան նկատմամբ պատմական արդարութիւնը վերահաստատել:
Համբիկ Սասունեանի ազատ արձակումը եւ հայրենիքի մէջ հաստատուիլը կը զուգադիպի ճակատագրորոշ փուլի մը՝ հայ ազգի պատմութեան մէջ: Արդէն անցեալ տարուան 44-օրեայ պատերազմին պարտութեան եւ ստորագրուած յանձնուողական յայտարարութիւններուն պատճառով տիրական էին յուսաբեկումի եւ տեղատուութեան երեւոյթները, միւս կողմէ ալ հիմա, այս օրերուն, մնայուն վտանգը կայ Հայաստանի իշխանութիւններուն կողմէ զիջումի եւ յանձնուողականութեան ընթացքը շարունակելու՝ «խաղաղութեան դարաշրջան» բանալու պատրուակին ներքեւ: Արդէն իսկ Հայաստանի գերիշխանութիւնը եւ ինքնիշխանութիւնը մեծապէս խոցելի դարձած են՝ Ազրպէյճանի զինեալ ուժերուն կողմէ Հայաստանի սահմանի զանազան հատուածներու խախտումին եւ թշնամի ուժերու վերահսկողութեան տակ առնուելուն պատճառով: Այս ամբողջ գորշ պատկերին դիմաց, յաւելեալ զիջումներու եւ յանձնուողականութեան հաւանութիւնը կանխելու նպատակով, այս օրերուն կը խօսուի հայրենիքի եւ սփիւռքի մէջ համազգային Դիմադրութեան շարժում սկսելու անհրաժեշտութեան մասին: Եւ Համբիկ Սասունեանի ազատութիւնը՝ արդարութեան մարտիկ ըլլալու անոր ամբողջ խորհրդանշականութեամբ, հայութեան դիմադրութեան ոգին ամրապնդող ազդակ է այս օրերուն: Դիմադրութիւն նախ եւ առաջ համաթուրանական ծրագիրներուն, որոնք կը սպառնան Հայաստանը զինուորապէս ծունկի բերելէ ետք զայն պարտութեան մատնել նաեւ քաղաքական եւ տնտեսական բնագաւառներուն մէջ՝ մեղսակցութեամբ օտար, ոչ ազգային օրակարգերու սպասարկող իշխանութիւններուն:
Դիմադրութիւն՝ վասն ազգային անժանապատուութեան վերականգնումին, դիմադրութիւն՝ վասն Հայաստանի Հանրապետութեան ինքնիշխանութեան եւ գերիշխանութեան պահպանման, դիմադրութիւն վասն Արցախի կարգավիճակի ճշդման՝ ազգերու ինքնորոշման իրաւունքի սկզբունքին հիման վրայ, եւ դիմադրութիւն՝ վասն հայութեան ազգային իրաւունքներու պահանջատիրութեան պայքարի շարունակման, որուն համար Համբիկ Սասունեանը եւ արդարութեան մարտիկներու հոյլ մը զոհողութիւններ ստանձնեցին 46 տարիներ առաջ սկսած Հայ դատի ուժական պայքարով:

 

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %
Previous post Հ.Յ.Դ.-ի Ուղեկից Միութիւններու Կեդրոնական Վարչութիւններուն Հետ Առցանց Խորհրդաժողով
Next post Հալէպի Մէջ Նշուեցաւ Հ․Յ․Դ․ 131-ամեակը

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles