Հ.Յ.Դ. Բիւրոյի ներկայացուցիչ Յակոբ Տէր Խաչատուրեան`Արցախի Մէջ

0 0
Read Time:3 Minute, 7 Second

ՍՏԵՓԱՆԱԿԵՐՏ («Ապառաժ»)․- Հոկտեմբեր 27-29-ին, Հ․Յ․Դ․ Բիւրոյի ներկայացուցիչ Յակոբ Տէր Խաչատուրեան հերթական այցելութիւն մը կատարեց Արցախ: Հ․Յ․Դ․ Բիւրոյի ներկայացուցիչը իր այցելութեան ընթացքին ունեցած է շարք մը հանդիպումներ, խորհրդակցութիւններ եւ ժողովներ:

Այցելութեան առաջին օրը Յակոբ Տէր Խաչատուրեան հանդիպած է Հայ առաքելական եկեղեցւոյ Արցախի թեմի առաջնորդ Վրթանէս եպս. Աբրահամեանի եւ Արցախի Ազգային ժողովին մէջ ներկայացուած ընդդիմադիր «Արդարութիւն» եւ «Արցախի ժողովրդավարական» կուսակցութիւններու ղեկավարներուն հետ:

Այցելութեան երկրորդ օրուան սկիզբը հանդիպում տեղի ունեցաւ Արցախի Հանրապետութեան Անվտանգութեան խորհուրդի քարտուղար Վիթալի Բալասանեանին հետ: Իսկ օրուան մնացած մասը ամբողջացաւ Հ․Յ․Դ․ կազմակերպական միաւորներու եւ շարքերուն հետ հանդիպումներով եւ ժողովներով: Առաջին հերթին կայացաւ հանդիպում Հ․Յ․Դ․ Արցախի երիտասարդական միութեան վարչութեան հետ, ապա գումարուեցաւ ժողով` Հ․Յ․Դ․ Արցախի Հայ դատի յանձնախումբին հետ: Օրուան երկրորդ կիսուն տեղի ունեցաւ նաեւ Հ․Յ․Դ․ Արցախի ընկերական ընդլայնուած ժողով` շրջաններէն Ստեփանակերտ հասած ընկերներու եւ ներկայ ու նախկին պատասխանատու մարմիններու հետ:

Այցելութեան ընթացքին Յակոբ Տէր Խաչատուրեան հանդիպումներ ունեցաւ նաեւ Արցախի Հանրապետութեան նախագահ Արայիկ Յարութիւնեանի եւ նախկին նախագահներ Արկադի Ղուկասեանի ու Բակօ Սահակեանին հետ:

Այցելութեան աւարտին Հ․Յ․Դ․ Արցախի Կեդրոնական կոմիտէին հետ ամփոփուեցան հանդիպումներուն արդիւնքները: Այս հանդիպումներու ընթացքին Հ․Յ․Դ․ Բիւրոյի ներկայացուցիչին ընկերակցեցաւ Հ․Յ․Դ․ Արցախի Կեդրոնական կոմիտէի ներկայացուցիչ Արթուր Մոսիեան:

Անդրադառնալով հանդիպումներու ընթացքին արծարծուած նիւթերուն` Յակոբ Տէր Խաչատուրեան նշեց, որ հիմնականին մէջ քննարկուած են Արցախի կարգավիճակին, անոր անվտանգութեան, ժողովուրդի տրամադրուածութեան, Արցախ-սփիւռք կապերու ամրապնդման վերաբերող շարք մը հարցեր, ինչպէս նաեւ անդրադարձ կատարուած է Արցախի մէջ կատարած աշխատանքին, մասնաւորապէս տեղահանուած բնակչութեան բնակարանային ապահովուածութեան եւ անոնց ընկերային-տնտեսական խնդիրներու լուծման ուղղութեամբ:

Արցախի Հանրապետութեան իշխանութիւններուն հետ ունեցած հանդիպումները Յակոբ Տէր Խաչատուրեանը արդիւնաւէտ նկատեց` նշելով, որ իշխանութիւններուն հետ ունեցած տարակարծութիւնները չեն կրնար խոչընդոտել Հ․Յ․Դ․-ին` Արցախի կողքին կանգնելու, անոր ամէն գնով աջակցելու եւ սկսուած քաղաքական ու մարդասիրական աշխատանքները շարունակելու համար:

Հ․Յ․Դաշնակցութեան Արցախի համար տարուող աշխատանքները այս պահուն կ՛ընթանան չորս ուղղութիւններով: Նախ` միջազգային առումով Արցախի կարգավիճակի հարցի միջազգայնացում, ԵԱՀԿ-ի Մինսքի խմբակի ձեւաչափով բանակցութիւններու վերսկսման խթանում եւ Արցախի անկախութեան ճանաչման` ազգերու ինքնորոշման իրաւունքի սկզբունքի կիրարկման ուղղութեամբ աշխատանքներ, երկրորդ` Հ․Յ․Դ․ Արցախի Կեդրոնական կոմիտէին միջոցով Արցախի ներքաղաքական կեանքին մասնակցութիւն եւ խնդիրներու լուծում, երրորդ` ներկուսակցական առումով ներքին կազմակերպական քննարկումներ, երիտասարդութեան ներգրաւում եւ Հայ դատի աշխատանքներ, եւ վերջապէս` Արցախի համար մարդասիրական եւ նիւթական օժանդակութեան տրամադրում:

Յակոբ Տէր Խաչատուրեան կարեւոր նկատեց Հ․Յ․Դ․ Արցախի Կեդրոնական կոմիտէի եւ շրջաններու կոմիտէներու ու պատասխանատու ընկերներու հետ հանդիպումը: Քննարկուած են Արցախի իրավիճակի, առաջնահերթութիւններու եւ ապագայ ընելիքներու վերաբերեալ շարք մը հարցեր: Հ․Յ․Դ․ Բիւրոյի ներկայացուցիչը ո՛չ միայն զեկուցած է Հայաստանի ու Արցախի ներկայ իրավիճակի եւ աշխարհով մէկ տարուող աշխատանքներու մասին, այլ նաեւ լսած է Արցախի պատասխանատու մարմիններու ներկայացուցիչներու կարծիքներն ու առաջարկները:

Անդրադառնալով Արցախի ապագային վերաբերեալ Դաշնակցութեան տեսլականին` Յակոբ Տէր Խաչատուրեան ընդգծեց, որ Դաշնակցութեան համար անընդունելի է, որ Արցախը ըլլայ Ազրպէյճանի գերիշխանութեան տակ: Հ․Յ․Դ․-ի օրակարգին վրայ է Արցախի` իբրեւ անկախ պետութեան կայացումը, զարգացումը եւ միջազգային հանրութեան կողմէ անոր անկախութեան ճանաչումը, որմէ ետք բնականոն հոլովոյթով մայր հայրենիքի հետ վերամիաւորումը:

Ըստ անոր, Հ․Յ․Դաշնակցութիւնը ո՛չ պատերազմի ընթացքին եւ ո՛չ ալ անկէ ետք դադրեցուցած է իր ամբողջ ներուժը ի սպաս դնել Արցախի եւ Հայաստանի հզօրացման:

Անդրադառնալով Հայաստանի մէջ ստեղծուած ճգնաժամին` Յակոբ Տէր Խաչատուրեան նշեց, որ այդ ճգնաժամը արդիւնք է Հայաստանի  իշխանութիւններու ապազգային քաղաքականութեան, հայրենիքը ահաւոր պարտութեան առաջնորդելուն եւ ծայրայեղ զիջումներու երթալու իրենց պատրաստակամութեան: Այս իրավիճակը ստեղծելէ բացի, Հայաստանի գործող իշխանութիւնները նպաստած են նաեւ ընդհանուր համազգային օրակարգի շուրջ հայութեան համախմբումը ապահովելու փոխարէն պառակտիչ գործունէութիւն ծաւալելուն: «Այդ պառակտիչ գործողութիւնները հիմա կ՛ուզեն տեղափոխել նաեւ սփիւռք: Ամէն ինչ կը կատարուի ատիկա դիմակայելու, այդ կործանարար քաղաքականութեան առաջքը առնելու եւ պառակտում թոյլ չտալու համար», ըսած է ան:

Հ․Յ․Դ․ Բիւրոյի ներկայացուցիչը անդրադարձաւ նաեւ համայն հայութեան մօտ առկայ ընկճուածութեան մթնոլորտին, որ հետեւանքն է պատերազմին կրած աղէտալի պարտութեան: Ան վստահ է սակայն, որ մեր ժողովուրդը կը վերագտնէ իր ասպետական ուժն ու վճռականութիւնը, ոտքի կը կանգնի եւ կը շարունակէ իր իրաւունքներուն ի խնդիր ազգային-ազատագրական պայքարը:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %
Previous post ԱԿՆԱՐԿ.- ՀԱՔԻ ՊԻ-ՀԱՔԻ՞… (ԽՕՍՔ ԵՒ ԽՕՍՔ)
Next post Հ.Յ. Դաշնակցութիւնը Կը Մասնակցի Տեղական Ինքնակառավարման Մարմիններու Ընտրութիւններուն

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles