Գորիս-Կապան Մայրուղիին Վրայ Ատրպէյճանական Անցակէտ

0 0
Read Time:1 Minute, 22 Second


Ատրպէյճանի զօրքերու կողմէ Հայաստանի սահմաններուն դէմ կատարուած ոտնձգութիւնները կը շարունակուին։
Ամիսներէ ի վեր Գորիս-Կապան միջպետական ճանապարհի որոշ հատուածները Ատրպէյճանի վերահսկողութեան տակ կը մնան։ Շաբաթավերջին՝ Սեպտեմբեր 12-էն ի վեր, Հայաստանի Ազգային անվտանգութեան ծառայութիւնը տեղեկացուց, որ այդ մայրուղիին վրայ, Որոտան բնակավայրի մօտակայքին, Էյվազլի հատուածէն ներս Ատրպէյճանի ոստիկանութեան կողմէ փաստաթուղթերու ստուգումներ կը կատարուին Իրանէն Հայաստան մուտք գործող բեռնատարներու եւ անոնց վարորդներու պարագային։ Իրանական պետական համարանիշերով բեռնատարներու վարորդներն ու անոնց փոխադրած բեռներու փաստաթուղթերը կը պահանջուին Ատրպէյճանի ոստիկանութեան կողմէ։ Հայաստանի Ազգային անվտանգութեան ծառայութեան սահմանապահ զօրքերը եւ Ռուսաստանի սահմանապահ ծառայութեան զինուորները համատեղ աշխատանքներ կ՚իրականացնեն՝ յառաջացած իրավիճակը կարգաւորելու ուղղութեամբ։
Վերոնշեալ մայրուղիին վրայ, Ատրպէյճանի կողմէ անցակէտի մը ստեղծման վերաբերեալ լուրերուն շուրջ ընդդիմադիր շրջանակները միջոցէ մը ի վեր ահազանգ կը հնչեցնէին Հայաստանի մէջ։ Պաշտօնական մարմինները, սակայն, կը հերքէին այդ լուրերը։ Այս գործողութիւններուն կողքին, Ատրպէյճանի Պաշտպանութեան նախարարութիւնը շաբաթավերջին նամակներ ուղարկեց Ռուսաստանի Պաշտպանութեան նախարարութեան եւ Արցախի մէջ ու շրջակայքին տեղակայուած ռուսական խաղաղապահ զօրքերու հրամանատարութեան։ Այդ նամակներուն մէջ Պաքու պնդեց, թէ այլ երկիրներու փոխադրամիջոցներ ապօրինի ձեւով կ՚անցնին Ատրպէյճանի տարածքով, ուր ժամանակաւորապէս տեղակայուած են խաղաղարարները։ Ատրպէյճան այդ նամակներով պահանջեց, որ այլ երկիրներու պատկանող ինքնաշարժներու Արցախ մուտքը արգիլուի։ Ըստ Պաքուի, հայ բնակչութիւնով, ժամանակաւորապէս ռուս խաղաղարարներու վերահսկողութեան տակ գտնուող շրջաններէ ներս այլ երկիրներէ ինքնաշարժներու մուտքը խոտոր կը համեմատի Նոյեմբեր 10, 2020 թուականին, Հայաստանի, Ռուսաստանի եւ Ատրպէյճանի միջեւ ստորագրուած հրադադարի յայտարարութեան։ Ընկերային ցանցերու վրայ ալ տեղ գտած էր, թէ Իրանէն բեռնատարներ մուտք կը գործեն այդ շրջանները։ Ուստի, անցեալ ամիս Ատրպէյճան այս կապակցութեամբ վերջնագիր մը տուած էր Իրանին։
Յառաջացած նուրբ կացութիւնը այս առաւօտ Հայաստանի Ազգային ժողովի նիստին ընթացքին երեսփոխաններու ուշադրութեան ալ առարկայ դարձաւ։ Ընդդիմադիր «Հայաստան» խմբակցութեան երեսփոխաններէն Վահէ Յակոբեան, որ Սիւնիքի նախկին մարզպետներէն է, զգայացունց յայտարարութիւնով մը ահազանգեց, թէ Ատրպէյճան որեւէ ատեն կրնայ Կապանը կտրել Հայաստանէն։

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %
Previous post Պատմական Իրողութիւններ Եւ Ճակատագրական Հետեւանքներ
Next post Էրտողանի, Անգարայի Եւ Թալիպաններու Անթաքոյց Համագործակցութեան Հեռանկարը

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles